ARIYANNUR AKSHARASLOKAKALAKSHETHRAM

അരിയന്നൂര്‍  

 

ഏപ്രില്‍ 2019 ലക്കം 88

പത്രാധിപര്‍ : അരിയന്നൂര്‍ ഉണ്ണിക്കൃഷ്ണന്‍ 

 

[മാസികയുടെ പഴയ ലക്കങ്ങള്‍ കാണുവാന്‍ ഹോംപേജില്‍ Archives ക്ലിക്കു ചെയ്യുക] 

 

 

തത്വമുക്തകം  84

 

അവശ്യം ഭാവിനോ ഭാവാ

ഭവന്തി മഹതാമപി

നഗ്നത്വം നീലകണ്ഠസ്യ

മഹാഹിശയനം ഹരേഃ

 

മഹാന്മാര്‍ക്കും വരേണ്ട അവസ്ഥ വരാതിരിയ്ക്കില്ല. ശിവന്‍ നഗ്നനായിരിയ്ക്കുന്നതും വിഷ്ണു പെരുമ്പാമ്പിന്മേല്‍ കിടക്കുന്നതും എല്ലാം അതു കൊണ്ടാണ്.

ശ്ലോക‍വും ലോകവും

 

അക്ഷരശ്ലോകസദസ്സ് 

 

31/03/2019 കാവീട്ടിൽ  അക്ഷരശ്ലോക അഹസ്സ് നടന്നു.

പങ്കെടുത്തവര്‍: ദാമോദരപ്പണിക്കർ, പ്രസന്നൻ, വിവേക്‌, ജയൻ വാര്യർ, കൽപക്‌, അരിയന്നൂർ ഉണ്ണിക്കൃഷ്ണന്‍, പുരുഷോത്തമൻ നായർ, കൊങ്ങൂർപ്പിള്ളി, കെ എസ്‌ രാജൻ, മുതുപറമ്പ്‌, ചെറുതുരുത്തി, അയിരിൽ നാരായണൻ

അരിയന്നൂര്‍ അക്ഷരശ്ലോകകലാക്ഷേത്രത്തിന്റെ അക്ഷരശ്ലോകം WhatsApp ഗ്രൂപ്പില്‍ ഏപ്രില്‍ 1 ന്  ഏകാക്ഷര‌ (അക്ഷരം ന‌) നിശാസദസ്സ് നടന്നു. 


പങ്കെടുത്തവര്‍ : അരിയന്നൂര്‍ ഉണ്ണിക്കൃഷ്ണന്‍, കൊങ്ങൂര്‍പ്പള്ളി, തൃക്കഴിപ്പുറം രാമന്‍, മുതുപറമ്പ് നാരായണൻ, കാലടി രാജന്‍, ദാമോദരപ്പണിക്കര്‍, ശോഭ രവി നമ്പൂതിരിപ്പാട്, യു ഭാസ്ക്കരന്‍, അനിരുദ്ധ വര്‍മ്മ, സ്വസ്തി ചന്ദ്രന്‍, ഗോകുല്‍, ദേവിപ്രകാശ്, നീലകണ്ഠന്‍ നമ്പൂതിരി, ശ്രീജ മനോജ്, ഗോപിനാഥന്‍, ഉഷ, ലീല അത്തിപ്പറ്റ, ഉമാദേവി, ജയരാജന്‍, ജ്യോതിർമ്മയി, അഭിജിത്ത്, രുഗ്മണി വാര്യര്‍, വിവേക്, ജയശോഭ, അനില്‍ക്കൃഷ്ണന്‍ അരിയന്നൂര്‍



സംസ്ക്കൃതത്തില്‍ നിന്നൊരു മുത്ത് 86

 

വിലസദ് ഘനപുഷ്പപുഷ്പപുഷ്പം

വിരഹസ്ത്രീജനമാരമാരമാരം

വിനതാമരരാജരാജരാജം

വിഷമാക്ഷം ഭജ കാലകാലകാലം 

 

ഘനപുഷ്പം (ജലം -ഗംഗ), പുഷ്പം (ചന്ദ്രന്‍ ) എന്നിവ പുഷ്പം (ചൂടാനുള്ള പൂവ്)ആക്കി വിലസുന്നവനായ ; വിരഹിണികള്‍ക്കു മാരനായ(മരണമായ) മാരന്റെ (കാമദേവന്റെ) മാരനായ (മാരകനായ) ; അമരരാജനും (ദേവേന്ദ്രനും ) രാജരാജനും (കുബേരനും) നമസ്ക്കരിക്കുന്നവനായ ; കാലകാലനായ (കാലനെ കൊന്ന) വിഷമാക്ഷനായ(മുക്കണ്ണനായ) കാലനെ (ശിവനെ) ഭജിക്കൂ. 

advt.

ഭാഷാനാരായണീയം 
 
അര്‍ത്ഥം അറിഞ്ഞു പഠിയ്ക്കുവാനും പഠിപ്പിയ്ക്കുവാനും റെഫറന്‍സിനും ഉതകുന്ന വിധത്തില്‍ നാരായണീയം മൂലവും ലളിതമായ ഭാഷാവൃത്തത്തിലുള്ള പരിഭാഷയും

യവനീ നവനീതകോമളാംഗീ
ശയനീയം യദി നീയതേ കഥഞ്ചില്‍
അവനീതലമേവ സാധു മന്യേ
ന വനീ മാഘവനീ വിനോദഹേതു:

ഷാജഹാന്‍ ചക്രവര്‍ത്തിയുടെ വിദ്വത്സദസ്സിലെ കവിയായിരുന്ന ജഗന്നാഥപണ്ഡിതര്‍ ഒരു യവന സുന്ദരിയില്‍ ആകൃഷ്ടനായിരുന്നു . അദ്ദേഹത്തിന്റെ ഒരു ശ്ലോകമാണ് ഇത്.

നവനീത കോമളാംഗീ : വെണ്ണ പോലെ മാര്‍ദ്ദവമുള്ള ശരീരമുള്ള
യവനീ  :   യവനസുന്ദരി
യദി കഥഞ്ചില്‍  ശയനീയം നീയതേ   :എങ്ങനെയെങ്കിലും കിടക്കയിലേക്കു എത്തിക്കപ്പെട്ടാല്‍
അവനീതലമേവ സാധു   മന്യേ:   ഭൂമി തന്നെ ഉത്തമമെന്നു ഞാന്‍ വിചാരിക്കും
ന മഘവനീ വനീ വിനോദഹേതു:   ദേവേന്ദ്രന്റെ ഉദ്യാനമല്ല വിനോദകാരണമാകുന്നത്  

പരിഭാഷകന്‍ അരിയന്നൂര്‍ ഉണ്ണിക്കൃഷ്ണന്‍


വില : 350 രൂപ‌


പുസ്തകം ലഭിയ്ക്കാന്‍ ബന്ധപ്പെടേണ്ട ഫോണ്‍/വാട്ട്സ് ആപ്പ് 

നമ്പര്‍ : 9447129500

advt.

 

പുതിയ കവിതകള്‍

 

കപിലോപദേശം
അരിയന്നൂര്‍ ഉണ്ണിക്കൃഷ്ണന്‍
(ദശകം 15  ‍ നാരായണീയം വൃത്താനുവൃത്തം,
വൃത്തം മാലിനി)
1
മതി ഗുണമൊടു ചേർന്നാൽ ബന്ധ,മല്ലെങ്കിലില്ലാ 
മൃതിനില , തടയുന്നൂ സക്തിയെബ്ഭക്തിയോഗം 
അതിനു കഴിവരുന്നൂ സത്തരായൊത്തു ചേർന്നാ -
ലിതി കപിലശരീരൻ ചൊല്ലി നീയമ്മയോടായ്
2
പ്രകൃതി മഹദഹങ്കാരാദി മാത്രാദി ഭൂതാ -
ദിക ഹൃദയ ദശാക്ഷീ സംയുതൻ പൂരുഷൻ താൻ 
തികവൊടിതിരുപത്തഞ്ചോരുവോനെ ത്യജിപ്പൂ 
പ്രകൃതി , കപിലനാം നീ യമ്മയോടേവമോതി
3
പ്രകൃതിയുടെ ഗുണൗഘം പൂരുഷന്നേശുകില്ലാ 
പ്രകൃതിയൊടഥ ചേർന്നാൽ വന്നു ചേരും ഗുണങ്ങൾ 
പ്രകൃതിയൊഴിയുമീയെൻ ഭക്തിതത്വം ഗ്രഹിയ്ക്കും 
സുകൃതിയെ,  കപിലൻ നീയമ്മയോടേവമോതി
4
ഗരുഡനു പുറമേറിദ്ദിവ്യഭൂഷാദിയോടും 
സുരുചിരഘനവർണ്ണം പൂണ്ടൊരെൻ രൂപമെന്നും 
കരുതി യമനനിഷ്ഠാപൂർവ്വമുൾശ്ശുദ്ധിയോടേ 
മരുവുക , കപിലൻ നീയമ്മയോടേവമോതി
5
മമ ഗുണകഥ കേട്ടും വാഴ്ത്തിയും ചിത്തതാരി-
ന്നമരനദി കണക്കെക്കുത്തൊലിക്കുന്ന ഭക്തി 
സമധിഗത,മതോ ഹാ! മൃത്യുവേയും ജയിപ്പൂ 
വിമലകപിലനാം നീയമ്മയോടേവമോതി
6
ഗൃഹതനയകളത്രാദിയ്ക്കു വേണ്ടിപ്പണിപ്പെ -
ട്ടഹഹ! പലതൊരോരോ ഹിംസ ചെയ്യുന്ന സക്തർ 
മഹിത മമ പദത്തെച്ചിന്തിയാതത്തലേൽക്കു -
ന്നിഹ കപിലശരീരൻ ചൊല്ലി നീയമ്മയോടായ്
7
തരുണിയുടെ വയറ്റിൽ ബോധമാർന്നും , ജനിയ്ക്കേ 
തരമൊടതു മറന്നും, കഷ്ടബാല്യം കഴിച്ചും 
തരുണനിലയിൽ വീണ്ടും മോഹമാളുന്നു കഷ്ടം 
നരനിഹ കപിലൻ നീയമ്മയോടേവമോതി
8
സുരപിതൃയജനത്താലാത്തപുണ്യൻ ഗൃഹസ്ഥൻ 
ധരയിലണവു വീണ്ടും തെക്കുഭാഗേ ഗമിപ്പോൻ ,
വരുമിവനിലകാമം കർമ്മമാർഗ്ഗേ ചരിച്ചാൽ 
പരഗതി കപിലൻ നീയമ്മയോടേവമോതി
9
പരമമറിവു നേടിക്കൂപ്പിടും ദേവഹൂതി -
യ്ക്കരുളി വര, മവൾക്കോ ഭക്തിയാൽ മുക്തി കിട്ടി 
വരമുനികളൊടും ചേർന്നങ്ങു പോയ് , ലോകനന്മ-
യ്ക്കരമിഹ നിവസിപ്പൂ പ്രാഗുദീക് ദിക്കിലിന്നും
10
ഇനിയുമധികമെന്തുണ്ടോതുവാൻ ത്വദ് പദത്തിൻ 
നിനവു ഭയമൊഴിപ്പൂ കാമമെല്ലാം തരുന്നൂ 
കനിവൊടു പറവൂ നീ തന്നെ , യെൻ രോഗമാകും 
വിന കളയുക വാതാധീശ , നിൻ ഭക്തി നല്ക
മുക്തകമുത്തുകള്‍
മോഹനന്‍ മൂലയില്‍
ഒരിറ്റുതണ്ണീരിനു നാവു നീട്ടി -
പ്പുരയ്ക്കു മുറ്റ,ത്തരിമുല്ലവീഴ്കെ
വരണ്ടിടുംചിത്തസരിത്തടത്തിൽ
സ്ഫുരൽപ്രഭാതത്തിനുമില്ല ഭംഗി!
തീയാളുന്നു,ധരയ്ക്കു ജീവകണികാബന്ധങ്ങൾ വിച്ഛിന്നമായ്-
ത്തീരുന്നൂ,ഗഗനാന്തഗംഗയിലുയിർക്കൊണ്ടാവു നീർക്കൊണ്ടലേ 
ഹാ!നാടും നഗരങ്ങളും കതിരണിപ്പാടങ്ങളും ചാരമായ്-
മാറുംമു, മ്പനവദ്യതീർത്ഥമധുരം പെയ്താവു ജാതാദരം!
മല കേറിയിറങ്ങിടുമ്പൊഴ-
ക്കുളിരിൻകൂടു കുടഞ്ഞുടച്ചുഞാൻ
കലയോടിയ കാട്ടുപാതയിൽ
ത്തടയാനെത്തി വിഭാതസൗഭഗം !
മുക്തകങ്ങള്‍
സന്തോഷ് വര്‍മ്മ
കരിച്ചു ഭുവനങ്ങളെപ്പകലവൻ മറഞ്ഞാഴിയിൽ 
ചിരിച്ചു കളിയോടിതാ ശശി വരുന്നു താരങ്ങളും 
നരച്ചു ജരയാർന്നിടും തനുവൊടിന്നു സേവിപ്പു ഞാൻ 
ഹരിക്കു ഹരസംഗമേ തനയനയ്യ! നീ കാക്കണം
പകലൊക്കെയുമതിജാഗ്രത കലരുന്നൊരു തപനൻ 
പകയുള്ളതുപടി വെന്തുടനലയാഴിയിൽ മുഴുകി 
പകരൂ ഹൃദി നിറയുന്നൊരു കൃപയെന്നിലുമിനി നീ 
പകരം മമ സകലം ശിവ! തരുവൻ തിരുനടയിൽ
കടുക്കും താപത്താൽ ഭുവനമഖിലം മുക്കിയൊടുവിൽ 
പടിഞ്ഞാറെത്തീ പോൽ പകലിനരചൻ വീണു കടലിൽ 
മുടക്കാതെന്നെന്നും ചരണയുഗളേ സേവയരുളാം 
തടുക്കൂ രോഗങ്ങൾ പഴനിമലമേലാറുമുഖനെ
പൈതലേ പൊറുക്കുക
ശ്രീകല നായർ
അമ്മതന്‍ നിതാന്തമാം രമ്യതയടര്‍ന്നുള്ളില്‍
കല്‍മഷം പെരുകിയ മാതൃജന്മങ്ങളേ കേള്‍
നിര്‍മ്മല ഹൃദന്തമാംപൊന്‍ കുരുന്നിന്റെ ജന്മ-
മന്ധത നടിച്ചെന്തേ അന്തകന്‍ കയ്യിലാക്കി
എത്ര നൊമ്പരം പേറി നിന്നിടുമ്പൊഴുംകണ്ണില്‍
ഉഗ്രമാം സ്നേഹത്തിന്റെ വാഞ്ഛ നീ കണ്ടതല്ലേ
നിന്നുടെ തലോടലും ചുംബനപൂവര്‍ഷവും
കുഞ്ഞിളം ഹൃത്തു വീണ്ടും മോഹിച്ചു പോയി കഷ്ടം
സ്വര്‍ഗ്ഗഗോപുരം കണ്ട ചിത്തമപ്പഴും നിന്നെ
വ്യഗ്രതപ്പെട്ടു പുല്‍കാന്‍ എത്രയോകൊതിച്ചു പോയ്
ദുഷ്ടയാം നിശാചരീ നിന്നുടെ ഗര്‍ഭത്തിലായ്
വ്യര്‍ത്ഥമായ് പിറന്നല്ലോ കഷ്ടമീ നരജന്മം
കേവലം നിശാചര പ്രീതിയ്ക്കായ് നീയുതിര്‍ത്ത
ക്രൂര ബാണങ്ങളേറ്റു വീണിതാ പൊടിപ്പൈതല്‍
ഓര്‍മ്മകള്‍ വിതുമ്പുന്നു, മാറില്‍ നീ പെയ്തുതീര്‍ത്ത
തേന്‍ മഴ വിഷത്തുള്ളിയായതും ചിത്രം ചിത്രം..
അമ്മ,യെന്നടങ്ങാത്തനൊമ്പരം നെഞ്ചിലേറ്റി
ഹന്ത! കൈവിട്ടുപോയ പൈതലേ പൊറുക്കുക
നിന്നുടെ വിയോഗത്തില്‍ കണ്ണുനീര്‍ പൊഴിയ്ക്കാത്ത
നിന്ദ്യയാണിവള്‍, നിന്റെ കണ്ണുകള്‍ തുടയ്ക്കുക

♥♥♥

 

വിഷു കവിതകള്‍

 

പുലരെ
സച്ചിദാനന്ദന്‍ പുഴങ്കര
പുരമുറ്റം - ഒരുത്തിയെപ്പൊഴും
നിറയെപ്പച്ചയുടുത്തുനിന്നവൾ
വിഷുവന്നു വിളിച്ചിടുമ്പൊഴും
ചെറുതങ്കത്തരിയിട്ടിടാത്തവൾ...
കണ്ണുപൊത്തുന്നൂ മേടം...
കണ്ടില്ല കണി... കൊന്ന -
ത്തെങ്ങിന്റെ തലകൊയ്ത
മിന്നലുമറിഞ്ഞില്ല..... .
എന്തിനോ... മുറ്റത്തുള്ള
കൊന്നയും പച്ചസ്സാരി -
കൊണ്ടതാ മിന്നാമിന്നും
മുഖവും മറയ്ക്കുന്നു...
കണിയും കവിതയു -
മില്ലാത്ത വിഷുവിതെ -
ന്നറിയുമാകാശമാ -
ണിരുണ്ടുമൂടിക്കെട്ടി...
കുയിലിൻ കുരൽ തേങ്ങി -
പ്പോകുന്നുണ്ടിടക്കിടെ...
കുടിനീർ വറ്റും കുടം
തല്ലുന്നു പ്രണയവും...
വിഷുമംഗളം
ജോയ് വാഴയില്‍
നിറഞ്ഞ നന്മ തന്‍ വിഷുദിനം വിഭോ,
പിറന്നു, കേൾപ്പു തേരുരുളിൻ ശബ്ദം ഞാൻ.
ഒരു വട്ടം കൂടി വരികയാണിന്നു
തിരുമുമ്പില്‍ വിഷുക്കണിയുമേന്തി ഞാന്‍.
പ്രിയവിഭാകര, അവിടുത്തേക്കതി-
പ്രിയങ്കരിയായി മരുവിയോളിവള്‍,
വസുധ, പൂവണിക്കണിയുമായങ്ങേ
വരവേറ്റോളെല്ലാ വരിഷവും മുദാ.
വരമഹാശയ, കരുതിടൊല്ല മേ,
തിരുമനസ്സിലപ്രിയമൊടൊട്ടുമേ.
അമൃതധാരയായ് വിഷുവണഞ്ഞ നാ-
ളഖിലമാ പ്രഭ ഹൃദിയിലേറ്റിവള്‍,
അനുകനങ്ങു വന്നണയുമാ ക്ഷണം
അനുഗയെത്തിടുന്നതു മറക്കൊലാ.
ഇവളിലന്നതിപ്രമദചിത്തനായ്
അവിടുന്നോതിയീവിധമതോർപ്പു ഞാൻ:
ഹരിതവാസനം കുസുമമഞ്ജിതം,
സ്ഫുരിതനിർമ്മലം ചികുരസഞ്ചയം,
അളകസുന്ദരം ലലിതഭ്രൂലതം
അളികം യക്ഷകർദമവിരാജിതം,
അതിമനോഹരം വദനസുസ്മിതം
അതിലലിയുന്നെൻ പുളകിതം മനം.’
നിറന്ന വാസരമണഞ്ഞു പിന്നെയും,
നിറഞ്ഞു വിണ്ടലം നിറകതിർക്കണി.
വരികയാണു നിന്നരികിൽ വീണ്ടുമീ
ധരണി, കൈകളിൽ കണിയുമേന്തി ഞാൻ.
പരിണതയെനി,ക്കരുളി മക്കളീ
പലനിറങ്ങളില്‍ വിരചിതാംശുവെ.
കുസുമരാജിയി,ല്ലതിനു കൃത്രിമ-
ലസിതമഞ്ജരീനിര ചമച്ചവര്‍.
കനകവർണത്തിൽ കണിമലരുകൾ
മെനയും കൊന്നകൾ മറഞ്ഞുപോയല്ലോ.
സുവർണകത്തിനു പകരമായൊട്ടു
സുവർണനാണയക്കണി തന്നെൻ സുതർ.
പുതുഫലങ്ങളെ ജനിതകത്തിനാല്‍
കൃതമതികളാം തനയര്‍ തീർത്തതാം.
അമൃതധാരയായ് ചൊരിയുമോ വിഷു
അകവിശുദ്ധികള്‍, അറിവതില്ല ഞാന്‍.
വരമഹാശയ, കരുതിടൊല്ല മേ,
തിരുമനസ്സിലപ്രിയമൊടൊട്ടുമേ.
സമയവാജിയാല്‍ ത്വരിതചാലിതം
മമ തനൂജര്‍ തൻ ഭുവനജീവിതം.
സകലതും മാറിമറിയുന്നെപ്പൊഴും,
സകലമോരുന്നോനവിടുന്നാണല്ലോ.
വിമുഗ്ധ ഞാനിതേവിധമവിടത്തെ
വിമലസന്നിധി വിഷുവിൽ പൂകുവാൻ.
കുറവും കുറ്റവും പരിഗണിക്കൊലാ,
ക്ഷമയെ ദേവ, നീ പരിത്യജിക്കൊലാ.
വരമഹാശയ, പുലരിയൊത്തു നിന്‍
വരവു കാത്തിതാ വസുധ നില്പു, ഞാന്‍.
കരുതിടൊല്ല മേ പതിതയായ്, തവ
കരുതലിന്നേറ്റമനർഹയായുമേ.
തിരിഞ്ഞു വന്നിടാം സമയത്തേരുരുൾ,
തിരികെ വന്നിടാം സുവർണസൂനങ്ങൾ.
ഹരിതഭൂഷയാർന്നരികെയെത്തിടു-
മൊരിക്കൽ കൂടിയന്നിവൾ സുരൂപയായ്.
വരമഹാശയ, കരുതിടൊല്ല മേ,
തിരുമനസ്സിലപ്രിയമൊടൊട്ടുമേ.
വീണ്ടും വിഷു
സിവിപി
മേടം, എൻ മിഴിപൊത്തി
പിന്നെയും വിഷുക്കണി
കാണുവാൻ നടത്തുന്നൂ
ഇടനാഴിയിലൂടെ .
ഞാൻ നടക്കുന്നൂ തപ്പി-
ത്തടഞ്ഞ് ,കൈകൾ തൊട്ട-
തേതുവീടിനെ,ഏതു
ജന്മത്തിൻ തണുപ്പിനെ ?
പാദങ്ങളളക്കുന്ന-
തേതു സ്നേഹത്തിണ്‍ ദൂരം ?
'വീഴായ്ക, വീഴായ്ക 'യെ-
ന്നാരുടെ സ്വരം കാതിൽ ?
മനസ്സിൽ കിനാവു പോൽ
കൊന്നപൂക്കുന്നൂ, നില -
വിളക്കിൻ വെളിച്ചത്തി-
ലെൻ നടുതലപ്പാടം .
പുഴ കണ്ണാടി , വെയിൽ
രാശി,സംക്രമഫലം
പറയാൻ കാറ്റ് ;മെല്ലെ
ഞാൻ മിഴി തുറക്കുന്നൂ....
കനത്ത വേനല്‍ച്ചൂടില്‍
പൂവിട്ടു നിൽപ്പു ണ്ടൊരു
കവിത; വാക്കേ ,വിഷു -
ക്കൈനീട്ടം നൽകൂ വീണ്ടും!
അപേക്ഷ
മോഹനന്‍ കാരണത്ത്
സമാനതയെഴാത്തതാം കഠിന വേനലേ! കൊന്നതൻ
സുമങ്ങളെയശേഷവും കവരുവാൻ കരം നീട്ടി നീ
കുമാനസ! വിഷുക്കണിയ്ക്കിവിടെയല്പമാണെങ്കിലും
ഫലങ്ങൾ നിലനിർത്തുവാൻ കനിവു കാട്ടുവാൻ കൂപ്പുകൈ.
വിഷു
ഡോ രാജന്‍
കണിക്കൊന്ന തൻ പൂവു സർവ്വത്ര കാണാം
വിഷുപ്പക്ഷി തൻ പാട്ടു കേൾക്കുന്നിതെങ്ങും
സമസ്തർക്കുമുത്സാഹമിക്കേരളത്തിൽ
ഭവിക്കുന്നിതീയുത്സവം വന്നിടുമ്പോൾ
കണിയൊരുക്കൽ:
തൃക്കഴിപ്പുറം രാമന്‍
വീഴ്ചതെല്ലുമണയാതെതാൻ കണിശമായ്കണിക്കുകരുതേണ്ടതുൾ
ക്കാഴ്ച കൊണ്ടു വഴിപോലെകണ്ടവമുറക്കു ശേഖരണ ജോലിയാം
ആഴ്ചയോള,മൊടുവെത്തിടും വിഷുദിനത്തിലൊക്കെയുമൊരുക്കി, മൽ
ക്കാഴ്ചപൊത്തി,യ തുകാട്ടുവാൻ വഴി നയിക്കു ,മെൻ ഗൃഹിണിയെത്തൊഴാം!
വിഷുപ്പാട്ട്
രമേശന്‍ തമ്പുരാന്‍
ഞാനിന്നീ വിഷുസംക്രമപ്പുലരിയിൽ, 
വിശ്വപ്രപഞ്ചങ്ങൾ തൻ
കോണിൽ, മാനവർ ചിത്രശില്പകലകൾ 
തീർക്കുന്നൊരീ ഭൂമിയിൽ
തേനിൽ മുക്കിയെടുത്ത പുണ്യമധുര-
സ്സങ്കല്പവും പേറിയീ
വാനിൻ കീഴിലലഞ്ഞിടുന്നു കണികാ-
ണാനായുഷസ്സന്ധ്യയെ.
മോടിയ്ക്കൊത്തു വസുന്ധരയ്ക്കു പുളകം 
ചേർക്കാൻ കണിക്കൊന്നയും
ചൂടി, ചൈത്രമൊരുങ്ങിവന്നൊരു വിഷു-
പ്പാട്ടൊന്നു പാടീടവേ
മേടക്കാററിലുലഞ്ഞു നർത്തനമുതിർ-
ത്തീടും മരച്ചില്ലമേ-
ലാടിപ്പാടിയ ചക്രവാകമിഥുന-
ങ്ങൾക്കെൻെറ ഗാനാഞ്ജലി.
വിഷുവിന്നു നല്കുവാന്‍
ഉണ്ണിക്കൃഷ്ണന്‍ ശ്രീലകം
കര്‍ണ്ണികാരമലരേ മനോഹരീ
സ്വര്‍ണ്ണ ഭൂഷകളണിഞ്ഞു മോടിയില്‍
വര്‍ണ്ണഭംഗിവിഷുവിന്നു നല്കുവാന്‍
നിര്‍ണ്ണയം കരുതിവന്നതാണു നീ
നല്ല നാളെ
ശ്രീജ പ്രശാന്ത്
പുലരാനൊരുക്കിയവയൊന്നുചേർക്കെയതിനുള്ളിലായ്
കല്ലു വച്ച നുണ'യെന്നു ചൊല്ലിയൊരു തങ്കവർണ്ണമുലയുന്നുവോ?
ഇല്ല, പേരിനൊരു കർണ്ണികാരമണി,യുള്ള പൂക്കളിലുമേറെയാ-
ണല്ലലിൻ പലനിറങ്ങളെങ്കിലുമകത്തറിഞ്ഞു കണി കണ്ടിടാം .
രണ്ടു മുക്തകങ്ങൾ
ദീപ കരുവാട്
കൊന്നപ്പൂക്കൾ നിറവൊടഴകായ് പ്പൂത്തുനില്ക്കും പുലർച്ചേ
മണ്ണും  വിണ്ണും  സുഖസുഖദമാം സ്വർഗ്ഗമായ് മാറിയെന്നിൽ
കണ്ണില്‍ നിന്റേ മുഖകമലമിന്നാകെ പൂവിട്ടു നില്‍ക്കേ- 
യുണ്ണിക്കണ്ണാ! വരിക കണിയായ്  കാണുവാനെന്നുമെന്നില്‍
മന്നിൻചന്തം കുളിരുചൊരിയും കണ്ണിലാക്കർണ്ണികാരം
മന്ദസ്മേരം വിടരുമതിലെൻ പ്പൊൻകിനാവായി സാന്ദ്രം
മത്ഹൃത്തിൽ പ്പൂ ത്തുലയുമനുരാ ഗത്തിനോമൽത്തിടമ്പേ!
മായാതെന്നും മമസുരഭില സ്വപ്നമായെത്തു, ദേവാ!
കണ്ണീര്‍പ്പൂത്തിരി 
ഗീത വാസുദേവന്‍
ഓരോരോ ദിനവുംപുലര്‍ന്നിടുവതേറ്റം ദുസ്സഹം വാര്‍ത്തയാ-
ലോരോന്നും കരളില്‍ത്തറയ്ക്കു മൊരു നൂറാണിത്തലപ്പെന്ന പോല്‍ 
നേരായ്ത്താണ്ഡവമാടിടുന്നു കലിയിബ്ഭൂവില്‍സ്സദാ നേരമെ-    
ന്നോരേണം മനുജാ,വരുന്നതു മിരട്ടിക്കെന്ന മട്ടായിടാം 
 
തീരാവേദനയായ്, മനസ്സിലണപൊട്ടീടുന്ന കണ്ണീര്‍പ്പുഴ-
ത്തീരത്തെന്നുടെ തൂലികയ്ക്കു വിറയാര്‍ന്നീടുന്നു,താങ്ങില്ല മേ 
ക്രൂരന്മാരുടെ ചക്രവര്‍ത്തിയൊരുവന്‍ തന്‍ കൈകളാലേ, കൊടും
ദുര്യോഗത്തിനു പാത്രമായ ചെറു ബാലന്‍ തന്നെയോര്‍ത്തീടവേ
സാരം നെഞ്ചിലെ ദുഗ്ദ്ധ മാക്കി യരുമക്കുഞ്ഞിന്‍ വളര്‍ച്ചക്കുതാ- 
നോരാതേകിയ മാതൃചിത്തമിതു മട്ടാകുന്നതെമ്മട്ടു താന്‍? 
തോരാതേ നിജ പുത്രരില്‍ ക്കഠിന ദണ്ഡം മാരിപോല്‍ പ്പെയ്യവേ  
നീരിന്‍ തുള്ളിയുതിര്‍ത്തിടാത്ത മിഴിയോ?, ഹാ! ക്രൂര നീയമ്മയോ?   
കാണാന്‍ വയ്യ തെളിഞ്ഞു പുഞ്ചിരി വിളങ്ങീടുന്നൊരാ നന്മുഖം
വീണീടുന്നൊരു ബാഷ്പധാര, തടയാനാവുന്നതില്ലീശ്വരാ 
ക്ഷോണീമാതിരുകൈകളാലരിയനെഞ്ചില്‍ ച്ചേര്‍ത്തു ലാളിക്കയായ്-   
ക്കാണാം കൈകളെ നീട്ടിടുന്നു പ്രിയ താതന്‍ പുത്രനേ വാങ്ങുവാന്‍  
കാണിച്ചില്ല ,വിഷുക്കണിപ്പുലരി നിന്നേ ദുര്‍വ്വിധി ക്രൗര്യമെ-  
ന്നാലും പൂത്തിരിയൊന്നു ഞാനിവിടെ  നിന്നോര്‍മ്മയ്ക്കു കത്തിച്ചിതാ  
കാണാനെത്തുകയില്ലയോ ,പിതൃസമേതംവാനി ലാമോദമാ-, 
യീലോകത്തു ലഭിച്ചിടാത്ത സുഖമോടും വാഴ്കയെന്‍  പൈതലേ
കൊന്നപ്പൂവും, വിഷുവും, നീയും
കുട്ടന്‍ ഗോപുരത്തിങ്കല്‍
അന്നൊക്കെ
ഒരു കൊന്നപ്പൂവുമതി
വസന്ത സമൃതികളുണ൪ത്തി
വിഷുവിനോടൊപ്പം
നിൻമുഖവും എന്റെ മനസ്സിലെത്തിക്കാൻ
ഇന്ന്,
എമ്പാടും കൊന്നകൾ പൂത്തുനിൽക്കെ,
എനിക്ക് വിഷു അനുഭവവേദൃമാവുന്നില്ല..
മനസ്സിൽ നിൻ മുഖം മാത്രമുണ്ട്.
അതും മാഞ്ഞുതുടങ്ങുന്നൂ..
വിഷുപ്പക്ഷിയുടെ
ഉണ൪ത്തുപാട്ടുപോലേ...
കണ്ണനോട് 
രാധാദേവി
കണ്ണനുണ്ണിതൻ കിങ്ങിണിയാകുമോ 
മണ്ണിൽ വന്നു പിറന്നൊരീക്കൊന്നകൾ 
കണ്ണുകൾക്കു കണിയൊരുക്കീടുവാ-
നുണ്മയാർന്നു ചിരിക്കുന്ന  പുണ്യമോ!
സ്വർണ്ണ നാണ്യവും ചക്കയും മാങ്ങയും 
വർണ്ണമേഴും നിറഞ്ഞ പൂത്താലവും
കർണ്ണികാരവും കണ്ണനും കൂടിയെൻ 
കണ്ണുകൾക്കു പകർന്നീടുമുത്സവം
പൂത്തുനിൽക്കുന്ന മാവിന്റെ കൊമ്പിലായ്
കീർത്തനം പാടിയെത്തീ വിഷുക്കിളി 
ചിത്തമാകെയുണർത്തുന്ന നന്മതൻ 
വിത്തുപാകുവാനെത്തിയതാണവൾ
കാലമാകുമുരുളിയിൽജ്ജീവിതം
ചേലെഴുന്നൊരു പൊൻകണിയാക്കണേ
മെല്ലെയെന്നകക്കണ്ണു തുറക്കവേ
ഉള്ളിലെന്നും ചിരിതൂകി നിൽക്കണേ
പൊന്നണിഞ്ഞൊരീ മേടപ്പുലരിയെ 
ധന്യമാക്കുന്ന സംക്രമവേളയിൽ 
വന്നു കൈനീട്ടമേകുകെന്നുള്ളിലെ -
ക്കൊന്നയെന്നുമേ പൂത്തുലഞ്ഞീടുവാൻ !!
വിഷുത്തേങ്ങലുകൾ
ജ്യോതിര്‍മ്മയി ശങ്കരന്‍
ആർക്കോ വേണ്ടി വരുന്നുവോ വിഷു, പലപ്പോഴും മനം നൊന്തു ഞാ-
നോർക്കും, കൊന്നകൾ മേടമൊന്നണയുവാൻ കാക്കാതെ പൂക്കുന്നിതാ.
കോർക്കാനുണ്ടനുഭൂതിയാൽ തരളിതം ഹൃത്തിന്മണിച്ചെപ്പിലായ്
കാത്തെന്നോ പലനാളിലായ് കരുതി ഞാൻ വച്ചോരു പൊന്മുത്തുകൾ.
നേരാണെന്മനമിപ്പൊഴും പറയുവാൻ പറ്റാത്തവണ്ണം ഉദാ-
സീനം, പോയൊരു കാലമേ ! കദനമെന്തിന്നേകി നീയിവ്വിധം?
 ഞാനോർത്തില്ല, കടന്നു പോം ദിനമതെല്ലാം നഷ്ടമെന്നുള്ളതും
നാമെല്ലാമിവിടത്തിലിന്നതിഥി മാത്രം, സ്വപ്നമാണൊക്കെയും. 
ജീവൻ തന്നവരെങ്ങുപോയ്, വഴികളിൽക്കണ്ടെത്തിയോ ജീവിത-
പ്പാന്ഥാവൊന്നിലെ യാത്രികർ, സ്വജനമാ,രാരാണു ശത്രുക്കളും.
ഏറിക്കൂട്ടിയതിമ്പുറം ഗുണനവും ചെയ്തോ, കിഴിയ്ക്കേണ്ടതൊ-
ന്നാണോ ചെയ്തവ, തെറ്റിനെശ്ശരി നിനച്ചോ, ഗർവ്വമൊന്നേറിയോ?
കാലംപോയതറിഞ്ഞു ഞാൻ, കരയുവാൻ തോന്നുന്നു നഷ്ടങ്ങളെൻ
നേരേ നോക്കിയിളിയ്ക്കവേ, യെവിടെയെൻ തെറ്റെന്നറിഞ്ഞീല ഞാൻ.
വേവുന്നൂ മനമോർമ്മയിൽക്കണിയുമായെത്തുന്നൊരെന്നമ്മയും
താതൻ സ്നേഹപുരസ്സരം തരുമൊരാ കൈനീട്ടവും ബാക്കിയായ്.
വിഷു-എന്റെ-നമ്മുടെ-അവരുടെ 
മധുരാജ് പി സി
ചരിഞ്ഞും ചാഞ്ഞും നോക്കീ കാക്ക, കാക്കണം നമ്മൾ
കുറഞ്ഞതൊന്നോ രണ്ടോ നാളുകളെന്തായാലും;
ചാടിവീണള്ളിപ്പിടിച്ചോടിയും മണപ്പിച്ചും
നാടിനെയറിയിച്ചൂ നാളെയെന്നണ്ണാർ ക്കണ്ണൻ
മുറ്റത്തെപ്പ്ളാവിന്നൊറ്റച്ചക്കഞാൻ മുറിച്ചേകീ
ചുറ്റുമുള്ളവർ ക്കെത്തലോരോന്നു കണിവെക്കാൻ
എന്തൊരൌദാര്യം , നല്ലസോഷ്യലിസ്റ്റല്ലോ നിങ്ങ-
ളെന്നവർ പ്രശംസതൻ പട്ടെന്നെയണിയിക്കേ
ശ്രീശുകബ്രഹ്മർഷിപോൽ വന്നൊരു പനന്തത്ത
യാശ്വസിപ്പിച്ചൂ മ്ലാനമുഖനാം മരത്തിനെ
വേരിലും മുകളിലുമേറെയുണ്ടാകും ചക്ക
വേഗത്തിൽ വരുംകൊല്ലം വിഷുവെല്ലാർക്കും നല്കാൻ!
നാളേയ്ക്കായ്...
അത്തിപ്പറ്റ രവി
വരുന്നിതാ വിഷു കനകാംഗിയായ്; നമു-
ക്കൊരുക്കിടാം കണി വരവേൽക്കുവാൻ മുദാ,
പുരുപ്രഭം പ്രതിദിവസം ശുഭങ്ങൾ കൈ-
വരുന്നതിന്നൊരുമ പുണർന്നുണർന്നിടാം.
കണികാണാനായ്
അനിരുദ്ധ വര്‍മ്മ‌
മീനം തീരുകയായിയെന്നു ഹൃദയം ചൊല്ലുന്നുവെന്നാകിലും
വേനല്‍ച്ചൂടു കുറഞ്ഞതില്ല മനുജന്‍ കഷ്ടത്തിലാണിപ്പൊഴും
ആനന്ദം തിരതല്ലി മേടവുമിതാ വന്നെത്തിയല്ലോ സഖേ
തേനും പാലുമൊഴുക്കിടാനിനിയിതാ യെത്തീ വിഷുക്കാലവും
വന്നൂ പൊന്‍ വിഷു, നാട്ടിലാകെ സുദിനം, നാട്ടാര്‍ക്കു സന്തോഷമായ്
കൊന്നപ്പൂക്കുല കാറ്റിലാടി, മഴനീര്‍ മേഘംനിരന്നീടവേ
ഇന്നെന്‍ കാവ്യസുധാരസം നുകരുവാന്‍ വന്നെത്തിയോരെന്‍ സഖേ
വന്നീ മഞ്ചലിലൊന്നിരിക്കു സസുഖം കാവ്യങ്ങളും ചൊല്ലുവാന്‍
സ്വര്‍ണ്ണം, ഗ്രന്ഥവുമോട്ടുകിണ്ടിസഹിതം നെല്ലും, കണിക്കൊന്നയും
വെള്ളം, കണ്മഷി, ചക്ക, മാങ്ങ, പഴവും, പൊന്‍ നാണയം, വെറ്റിലാ,
കൃഷ്ണന്‍ തന്നുടെ വിഗ്രഹം, നിലവിള, ക്കെള്ളെണ്ണയും , കേരവും
വാല്‍ക്കണ്ണാടിയൊരുക്കി വെച്ചു കണികാ ണാനായ് വരുന്നേനിതാ
ഓർമ്മയിലെ വിഷുക്കണി
ദേവി പ്രകാശ്
പൊന്നിൻ കങ്കണമിട്ട തൻ കരതലം കൊണ്ടെന്റെ കൺ പൊത്തിനി-
ന്നെന്നെത്തന്നെയിരുത്തിവാൽ പ്പലകമേൽ കണ്ണന്റെ മുമ്പാകവേ
ചൊന്നാളമ്മ,കരങ്ങൾ മാറ്റി "മകളേ,കണ്ണൊന്നു മെല്ലെത്തുറ-
ന്നിന്നീ,പൊൻകണി കാണണം ശുഭദമാം നല്ലാണ്ടു കൈവന്നിടാൻ"
വിഷുവത്രെയിന്ന്
നാഥ് മാന്നനൂർ
വരണ്ടു വിയർത്തിരിക്കും മണ്ണ്
വിണ്ടു വിളറിയുണങ്ങിയ ചുണ്ടുകൾ
വിരിഞ്ഞ് നിൽക്കുന്നുണ്ട് എന്നിട്ടും
വിരിച്ചുകാന്തി ഈ കൊന്നകൾ
വെയിലുകൊണ്ടൊഴുക്കുന്ന വിയർപ്പിൽ
വരും കാലത്തിനുള്ള കരുതലുണ്ട്
വളരും പ്രതീക്ഷയ്ക്ക് പുഞ്ചിരിയ്ക്കാൻ
വിഷുക്കൈനീട്ടം തരുന്നുണ്ട്
വിരിപ്പനുള്ള വിത്തിന്റെ അകത്ത്
വിളയുന്നുണ്ട് പുതുകാല കതിരുകൾ
വേനലിന്റെ വല്ലായ്മ തീർക്കുവാൻ
വിഷുക്കഞ്ഞിയും വിളമ്പുന്നുണ്ട്
വേനൽക്കാഴ്ചയുടെ വിരസതയിൽ
വിതറാൻ വിതുമ്പും മഴ മുത്തുകളുണ്ട്
വിരുന്നെത്തും മേടത്തിന്റെ മടിത്തട്ടിൽ
വിഷുക്കണിയുടെ നിറമുള്ള കാഴ്ചയുണ്ട്
വരൾച്ചയുടെ വിഷമസന്ധിയിൽ
വിണ്ണിലൊരുങ്ങുന്ന വില്ലുകാന്തിയുണ്ട്
വിളിച്ചുണർത്തുന്നയീ പകലിന്
വിഷുപ്പൂത്തിരിയുടെ ആഹ്ലാദമുണ്ട്
വിഷുക്കൈനീട്ടം
ഹരിദാസ് മംഗലപ്പിള്ളി
മങ്ങിപ്പോയൊരുപൂവിതൾപ്രഭയുമായ് നിൽക്കുന്ന കൊന്നയ്ക്കു നിൻ- 
ചങ്ങാത്തം തുണയായ് വരേണമിനിയും വൈകാതെ ഹേ കൊണ്ടലേ! 
അങ്ങിങ്ങോടിനടന്നു വേരു തളരും നേരത്തു തേൻനീർക്കണം 
താങ്ങായ്തീരുമനൽപ്പമാമൊരുവിഷുക്കൈനീട്ടമാവട്ടെയോ!!
കൊന്ന
അനിയൻ മാങ്ങോട്ട് രി 
പൊള്ളും ചൂടേറ്റു വാടും മനുജനുമതുപോൽ ജീവജാലങ്ങളെല്ലാ-
മുള്ളം വിങ്ങിപ്പഴിക്കും വെയിലിനെ വെറിയോടേറെ വേനൽ പ്പെരുത്താൽ 
എള്ളോളം പാരവശ്യം പരിഭവമതുമേ തെല്ലു മില്ലാതെ പൂക്കാ-
നുള്ളൊരാ ശക്തിയാലേ നിറവൊടു വിരിയും 'കൊന്ന'യേകട്ടെയൂർജ്ജം
കൊന്നപ്പൂ'നിറവാർന്നു പുഞ്ചിരി പൊഴിച്ചീടുന്നു വർണ്ണാഭമാ-
യെന്നാലോ തനു വേനലിൻ കഠിനമാം ചൂടേറ്റു നില്ക്കുന്നിതേ
നന്നായ് പാഠമതേകിടുന്നു വിപരീതം ചുറ്റുപാടെങ്കിലും
പൊന്നായ്ത്തീരണമെന്നുമേ ഫലമതോ ലോകത്തിനാമോദമായ്!
ഓർമ്മയിൽ ഒരു കൊന്നക്കാലം 
സുബ്രഹ്മണ്യന്‍ കുറ്റിക്കോല്‍
കൊന്ന നില്ക്കുന്നൂ ദൂരെ പൊന്നുപൂങ്കുലയോടെ 
ഇന്നലെ നോക്കുന്നേരം കണ്ടതില്ലവളെഞാൻ 
എന്നുമീ ജനാലതന്നഴികൾക്കിടയിലൂ- 
ടൊന്നുമേ കാണാറില്ലാ പച്ചിലച്ചാർത്തല്ലാതെ 
വന്നുവോ വിഷു? പുലർക്കാക്കകളോടോതി ഞാൻ 
കേട്ടഭാവമില്ലാതെ കൂട്ടമായ് പറന്നുപോയ് 
നാളെയാണല്ലോ വിഷു ചായയുമായെത്തിയ 
ചിഞ്ചുമോൾ ചിരിച്ചോതി പൂത്തിരി കത്തുന്നപോൽ. 
കൊണ്ടുവന്നൊരു പത്രം കണ്ടുഞാൻ നടുങ്ങിപ്പോയ് 
ഹൃദയം തുടിക്കവേ തളർന്നൂ കൈകാലുകൾ
വീണുപോകാതേവേഗം കട്ടിലിലിരുന്നു ഞാൻ 
കൊന്നപ്പൊന്നൊളിയെന്തേ നിണമായ്പ്പടരുവാൻ?
കണ്ണടച്ചിട്ടും പിഞ്ചു-  കുങ്കുമമുഖമെന്റെ 
നെഞ്ചിലെക്കനൻപോലെ ചുട്ടു നീറുകയല്ലോ. 
കണ്ണടച്ചിരുട്ടാക്കി ഞാൻ കിടക്കവേ കേൾക്കാം 
തകർന്ന ക്ഷേത്രത്തിലെ വിഗ്രഹത്തിൻ രോദനം 
ചത്തകാക്കയ്ക്കായ് കാക്കക്കൂട്ടവും കരയുന്നൂ 
കൊന്ന കേഴുന്നൂ ദൂരെ കൊന്നതില്ലാരേയും ഞാൻ 
ഇന്നേഞാനെത്തീ നിന്നെക്കണികാണിക്കാനായി 
പൊന്നണിഞ്ഞുനില്ക്കുന്നൂ കണ്ണുകൾ തുറക്കുക 
എത്തുമിന്നവർ കാതും കഴുത്തും കവർന്നീടാൻ 
കൊന്നുനേടുന്നൂ കണിക്കൊന്നയെക്കച്ചോടക്കാർ  
പൊന്നൊളിയല്ലാ തെളിയുന്നതെൻ നെഞ്ചിന്നുള്ളിൽ  
കനലായെരിയുന്നൂ കുങ്കുമപ്പൂവിൻ മുഖം.
എന്റെ വിഷുക്കണി
യദു മേയ്ക്കാട്
എന്നുള്ളിലെന്നുമതിസുന്ദരലാസ്യമാർന്നു -
ള്ളെന്നോമലേകുമൊരുപുഞ്ചിരികണ്ടുനിൽക്കേ
വേണ്ടൊട്ടുമേയിവനു മോഹനകർണ്ണികാരം,
കാണേണ്ടതില്ല കണിയൊന്നിഹയത്രപോലും!
അറിയാത്ത വിഷു
അനില്‍ക്കൃഷ്ണന്‍ അരിയന്നൂര്‍
പാടാത്തതെന്തേ വിഷുപക്ഷി? നീയിന്നു
മേടമാസപ്പുലര്‍ക്കാലമല്ലേ....
ഉള്ളിലായൂറുന്ന ഗദ്ഗദഗീതികള്‍
തെല്ലു നിന്‍ നാദം കവര്‍ന്നുവെന്നോ?
പൂക്കാത്തതെന്തേ കണിക്കൊന്ന പൂവുകള്‍?
ഇക്കാലമത്രയും പൂത്തതല്ലേ...
കണ്ണില്‍ത്തുളുമ്പുന്ന നീര്‍മണിത്തുള്ളികള്‍
മണ്ണിൽ വസന്തം മറച്ചുവെച്ചോ?
♥♥♥

കവിസദസ്സ്

 

കവികളുടെ അക്ഷരശ്ലോകസദസ്സാണ്, ഇത്. അപ്രകാശിതങ്ങളായ സ്വരചിതശ്ലോകങ്ങള്‍ മാത്രം അനുവദനീയമായ ഇങ്ങനെ ഒരു സദസ്സു സൈറ്റില്‍ നടക്കുന്നു. കഴിഞ്ഞ ലക്കങ്ങളില്‍ സ്രഗ്ദ്ധര, ശാര്‍ദ്ദൂലവിക്രീഡിതം ,മന്ദാക്രാന്ത, മാലിനി, വസന്തതിലകം , രഥോദ്ധത, ദ്രുതവിളംബിതം, പുഷ്പിതാഗ്ര, മഞ്ജുഭാഷിണി, വസന്തമാലിക, വിയോഗിനി, ഭുജംഗപ്രയാതം, ശാലിനി, വംശസ്ഥം, ഇന്ദ്രവജ്ര/ഉപേന്ദ്രവജ്ര/ഉപജാതി, സമ്മത, അപരവക്ത്രം, പ്രഹര്‍ഷിണി, സ്രഗ്വിണി, സ്വാഗത, തോടകം, പഞ്ചചാമരം, ശിഖരിണി, പൃത്ഥ്വി,ശങ്കരചരിതം, ഹരിണി, മല്ലിക, കുസുമമഞ്ജരി, മത്തേഭം,ശംഭുനടനം എന്നീ വൃത്തങ്ങള്‍ അഞ്ചു റൌണ്ടു വീതം പൂര്‍ത്തിയായി.

അടുത്ത അഞ്ചു റൌണ്ടു ' ശ‍ംഭുനടനം ' വൃത്തം സ്വീകരിക്കാമെന്നു നിര്‍ദ്ദേശിക്കുന്നു.

സ്രഗ്ദ്ധര‌ വൃത്തം രണ്ടാമതും ആരംഭിക്കുന്നു.. സൈറ്റില്‍ സദസ്സു ഇപ്പോഴും തുടര്‍ന്നു കൊണ്ടിരിക്കുന്നു. 


പങ്കെടുക്കുന്ന കവികള്‍  1.അരിയന്നൂര്‍ ഉണ്ണിക്കൃഷ്ണന്‍ ,2.കൈതയ്ക്കല്‍ ജാതവേദന്‍, 3.രാമന്‍ നമ്പീശന്‍ കേശവത്ത്, 4.ശ്രീലകം വേണുഗോപാല്‍,5.വാരിയത്ത് കുട്ടി,6.അനിരുദ്ധ വര്‍മ്മ,  7.ജോയ് വാഴയില്‍, 8.ശ്രീജ പ്രശാന്ത്, 9.മധുരാജ് പി സി, 10.നാമംഗലം മാധവന്‍, 11.ആത്രശ്ശേരിശ്രീദാസന്‍, 12.ജയകൃഷ്ണന്‍, 13.ഹരിദാസ് മംഗലപ്പള്ളി, 14.ദാമോദരപ്പണിക്കര്‍ , 15.സുബ്രഹ്മണ്യന്‍ കുറ്റിക്കോള്‍, 16.രാജേഷ് വര്‍മ്മ, 17.പി എന്‍ വിജയന്‍, 18.ഗീത വാസുദേവന്‍, 19.തൃക്കഴിപ്പുറം രാമന്‍, 20.സന്തോഷ് വര്‍മ്മ, 21അനില്‍ക്കൃഷ്ണന്‍ അരിയന്നൂര്‍ 

 

2201
മുങ്ങട്ടേ താപവാരാന്നിധിയതിലവശേ‍
ഷിയ്ക്കുമീ ജന്മകാലം
വിങ്ങട്ടേ ചിത്തതാരുല്‍ക്കടവിരഹവിഷാ
ദാഗ്നിയില്‍ ചാകുവോളം
എങ്ങാനും ദേവി! ഹൃത്തില്‍ കരുണയുടെ കണം
പേരിനുണ്ടെങ്കിലിഞ്ഞാ
നിങ്ങര്‍ത്ഥിപ്പൂ വരും മേല്‍ ജനികളിലിനിയും
ഞങ്ങളൊന്നിച്ചു ചേരാന്‍
അരിയന്നൂര്‍ ഉണ്ണിക്കൃഷ്ണന്‍ 
2202
ഏറ്റം മുത്താർന്നു ചൊല്ലാ, മെ'ഴുപതിനരിക
ത്തെത്തി മേ പ്രായ,മില്ലാ
മാറ്റം മെയ്യൂക്കി,നിന്നുംസുദൃഢമതിരുപ
ത്തഞ്ചിലെപ്പോലെ നില്പൂ
മാറ്റമ്പുംമാ,റിവണ്ണം പറയുവതിനെടോ!
കാരണം കേട്ടുകൊൾകി -
ക്കൂറ്റൻ ക,ല്ലന്നുമിന്നും കടുകളവിളകാ
ഹന്ത! ഞാനുന്തിടുമ്പോൾ!
കൈതയ്ക്കല്‍ ജാതവേദന്‍
2203
മാറുന്നൂ ശീതകാലം ജനുവരിയവസാനിക്കെ, വീണ്ടും പകല്‍ചൂ-
ടേറുന്നൂ, വോട്ടുതെണ്ടും പ്രചരണമുഖരം നാടുതന്നന്തരീക്ഷം
വീറോടന്യോന്യമത്യുല്‍ക്കടരണനിരതം കക്ഷിരാഷ്ട്രീയമുള്ളില്‍-
ക്കേറുമ്പോള്‍ സത്യധര്‍മ്മം വിനയനിയമവും ദൂരെ മാറുന്നുവേഗം .
രാമന്‍ നമ്പീശന്‍ കേശവത്ത്
2204
വാണീ! നിന്നേ നമിപ്പൂ , രസനയിലമരൂ, ശ്ളോകമെല്ലാം രചിക്കാന്‍
വേണുംപോലേ പദങ്ങള്‍ പ്രതിഭയൊടുണരാന്‍ നല്‍ക നീ നല്‍‍വരങ്ങള്‍
നീണാളെല്ലാം സദസ്സില്‍ പുതുമ നിറയുമാ ശ്ളോകപുഷ്പങ്ങളെല്ലാം
വാണീടേണം ശരിക്കും മനമതിലധികം ഹര്‍ഷമേകട്ടെ നിത്യം. 
ശ്രീലകം വേണുഗോപാല്‍
2205
നേട്ടം മോഹിച്ചുകൊണ്ടി/ന്നിവിടെബഹുവിധം പാപകർമ്മങ്ങൾ ചെയ്തും
വെട്ടും കുത്തും നടത്തിബ്ഭയരഹിതതരം ഗർവ്വമോടേ നടന്നും
നാട്ടിൽ ദുഃഖം നിറയ്ക്കും കഠിനഹൃദയരാം ദുഷ്ടരെദ്ദൈവമേ നീ
കൂട്ടത്തോടേയൊടുക്കാ/നിവിടെയവതരി/ച്ചീടുവാൻ വൈകിടൊല്ലേ
ഋഷി കപ്ലിങ്ങാട്
2206
നോവുന്നെഞ്ചിത്തമെന്നും ചടുലത നിറയും ലോകമൊന്നിൻ ഗ്ഗതിത്താ-
രീമട്ടെങ്ങോട്ടു നമ്മേ ത്വരിഗതമിതുപോൽ തള്ളിടുന്നെന്നതോർത്താൽ.
കാലം മുന്നോട്ടുപോകും പടുതിയിലുളവാം മാറ്റമെന്നും മനുഷ്യർ-
ക്കീമട്ടേകുന്നതെന്തേ കുടിലത, കനിവിന്നില്ല സ്ഥാനം നിനച്ചാൽ.
ജ്യോതിര്‍മയി ശങ്കരന്‍
2207
കാടില്ലാതായ് ശരിക്കും,മനുജമനമതില്‍
കാടുകേറിക്കറുത്തൂ,
ചോടുംതെറ്റിക്കളിക്കുന്നിതുകുമതികളായ്
ഭൂമിതന്‍മാറിലിപ്പോള്‍ ;
പാടേമാറുന്നു കാലം, കലിമലഭരിതം,
ഖിന്നചിന്താകുലം ഞാന്‍
വാടുംഹൃത്തോടെമേവുംസമയവുമകലെ
കാണ്മതുണ്ടാവെളിച്ചം
ഉണ്ണിക്കൃഷ്ണന്‍ ശ്രീലകം
2208
പാർക്കിൽ ശ്രീ പത്മനാഭൻ നിജ കലവറതന്നുള്ളിലെസ്വർണ്ണമെല്ലാം
കാക്കാൻ മോഷ്ടാക്കളെത്താൻ വിരുതൊടുനിയമിച്ചിട്ടുറങ്ങുന്നു നന്നായ്;
ഓർക്കിൽത്തങ്ങൾക്കുചേരേണ്ടവസരമപരൻ കൊണ്ടുപോകാതിരിക്കാൻ
നോക്കിക്കൊണ്ടേയിരിപ്പാം സകലരു,മതിനാൽ ലാക്കുകിട്ടില്ല കക്കാൻ.
തൃക്കഴിപ്പുറം രാമന്‍
2209
ഒട്ടും വേവാത്ത ചോറും, കുരുമുളകുരസം പോലെയോടുന്ന സാമ്പാര്‍,
കഷ്ടം തോന്നുന്നൊരച്ചാര്‍, പലവിധനിറമായ് സ്വാദുമില്ലാത്തൊരോലന്‍
കൂട്ടാനുപ്പേരിയെല്ലാം ലവണവുമെരിവും തീരെയില്ലാത്തതെല്ലാം
കിട്ടും സദ്യയ്ക്കു ചെന്നാല്‍, ശിവശിവ ഭഗവന്‍, കാക്കണേയെന്നെയെന്നും
അനിരുദ്ധ വര്‍മ്മ‌
2210
കണ്ടീലല്ലോ വിലോലായതമിഴികളിലെ-
സ്സുസ്മിതപ്പൊൻതിളക്കം,
പൂണ്ടീലല്ലോ മനോജ്ഞം പുളക,മൊരുമൃദു-
സ്പർശനോത്തേജിതാംഗം.
മിണ്ടീലല്ലോ മനസ്സിൻ നിഭൃതവനിയിലുൾ-
ച്ചേർന്ന മൗനാർദ്രവാ,ക്കുൾ-
ക്കൊണ്ടീലല്ലോ വിശുദ്ധാന്തരലസിതമഹൽ-
സൗഹൃദാരമ്യഭാവം.
ജോയ് വാഴയില്‍
2211
മണ്ണിന്നുള്ളിൽപ്പതുങ്ങീട്ടലസത മറയാനിറ്റു വെട്ടം തെളിയ്ക്കാ-
തെണ്ണീ നീളുന്ന രാവിന്നലകളതിലുലഞ്ഞുള്ളൂ പൊള്ളുന്ന നേരം
വിണ്ണിൻ കെട്ടൊന്നുലഞ്ഞേനടരുമഴകിതാ തൊട്ടുണർത്തുന്നു വീണ്ടും
പെണ്ണേ പൂക്കാലമെത്തീയുയരുകിലുടനേ മുത്തമേകും പ്രഭാതം
ശ്രീജ പ്രശാന്ത്
2212
വൃത്തം ചിന്തിച്ചു പുണ്ണാക്കരുതു തല, നമുക്കക്ഷരം താന്‍ പ്രധാനം
സംഗീതം വേണ്ട, സാഹിത്യവുമൊരു വലുതാം പ്രശ്നമായ്‌ക്കണ്ടിടേണ്ട
താന്‍ താന്‍ നിര്‍മ്മിച്ചുമോതാം നിമിഷകവിതയെന്നോര്‍ക്കണം, പണ്ഡിതന്മാര്‍
ക്കട്ടിപ്പേറില്ല, ചൊല്ലാന്‍ ദൃഢമിവിടെ നമുക്കുണ്ടു ജന്മാവകാശം.
ഡോ രാജന്‍
2213
താരഞ്ചും കഞ്ജനാഭപ്രിയ കളിലുണരും
വാഗ്വിലാസങ്ങൾ കേട്ട -
ങ്ങാരോമൽപ്പക്ഷി പാടും ശ്രുതിലയനിനദം
സാഗരം നീന്തിടുമ്പോൾ!
ചാരേ ശീർഷങ്ങളോരോ നിമിഷവുമൊരുപോ
ലായിരം ശോഭ ചാർത്തി -
പ്പാരാകെപ്പന്നഗേശപ്രഭ ചൊരിയുമഹോ
നർത്തനം തോടയം താൻ!
ആത്രശ്ശേരിശ്രീദാസന്‍ 
2214
ചക്രം കാരാഗൃഹത്തിൽ,പ്പെരുമഴയിലൊളി-
ച്ചോടുവാൻചക്രഛത്ത്രം
ചക്രം താനിഷ്ടതല്പം,മറയിലൊളിവിൽ നീ
കാലചക്രം തിരിപ്പൂ;
ചക്രം പത്നിക്കധീനം,കരഗതമൊരുച-
ക്രം നിനക്കും;മുരാരേ
ചക്രം ചുറ്റിക്കൊലാ മാം ഗുരുപവനപുരേ
വാഴുമെൻ ചക്ര പാണേ!
ദാമോദരപ്പണിക്കര്‍ 
2215
ചാരംമൂടിപ്പരന്നാ ചരലുനിരകളും
കുന്നുകൾ മൺതടങ്ങൾ
ചോരച്ചാലായ്ക്കറുത്തൂ പുഴക,ളുരുകിയാ
ജീവികൾതൻ ശരീരം
ഘോരം കാന്താരമാകെപ്പവനവി ഭവമായ്
ക്കണ്ട‌ കൃഷ്ണാർജ്ജുനന്മാർ
പാരം ഗാണ്ഡീവ,ചക്രാൽ കരുതൽ തുടരുമോ
കാട്ടുതീയെപ്പൊലിപ്പാൻ?!
സുബ്രഹ്മണ്യന്‍ കുറ്റിക്കോല്‍
2216
ഘണ്ടാനാദം മുഴങ്ങീ, കതിരവനിരുളിൻ
കോട്ടപൊട്ടിച്ചു പൊങ്ങി,
വണ്ടിൻകൂട്ടം മലർത്തേൻവനികളിലമൃതം
മോന്തുവാൻ വന്നു തിങ്ങി,
കണ്ടം തോറും വിയർപ്പാൽ വിളവിനുയിരുനൽ
കും കൃഷിക്കാരിറങ്ങി,
മണ്ടന്മാർ പല്ലു തേക്കാതവിടവിടെയിരു
ന്നിട്ടു വാട്ട്സാപ്പിൽ മുങ്ങി
രാജേഷ് ആർ. വർമ്മ
2217
കൊല്ലംനല്ലോർമ്മയില്ലാ,കവിതയുടെപുര
സ്ക്കാരമേൽക്കുന്നതിന്നാ-
യെത്തീഞാൻചെന്നെയിങ്കൽ,പ്പരിചൊടതുനട
ക്കുന്നൊരാവേദിതന്നിൽ
മുഖ്യസ്ഥാനത്തിരുന്നാകരുണയുടെനിധി
ക്കുള്ളുഞാൻനേർക്കുകണ്ടോ -
രാശാൻമെമ്മോറിയൽസ്കൂൾപ്പരിസരമുണരു
ന്നെന്റെയുൾക്കാമ്പിലിന്നും
പി എന്‍ വിജയന്‍
2218
മാരന്‍പൂവമ്പുപണ്ടാപ്പുരരിപുവിനു നേര്‍ക്കൊന്നയച്ചോരുനേരം
കാരുണ്യം കാട്ടിടാതേ,തിരുമിഴിയിലെരിച്ചൂ രതീദേവികാണ്‍കേ
തീരാരോഷാല്‍ക്കയര്‍ത്തൂ ശിവനുടെ,വടുരൂപത്തൊടങ്ങദ്രികന്യാ,
സ്മേരം പൂണ്ടങ്ങുനിന്നൂ നിജവടിവിലഹോ!, പ്രേമമല്ലോ ജയിച്ചൂ
ഗീത വാസുദേവന്‍
2219
കാളീ! നിൻ കേളിയാലേ ത്രിഭുവനമഖിലം
കാത്തുരക്ഷിച്ചിടുമ്പോൾ
താളം ചേരുന്നവണ്ണം ചെറുചുവടിവനും
നിൻസമക്ഷം കളിക്കാം
വാളാൽ വെട്ടിപ്പിളർക്കാം തല, തവചരിതം
പാടിയാടാം നടയ്ക്കൽ
തൂളിക്കാം രക്തവർഷം, ഭവതിയുടെ പെരു-
ങ്കാവുതീണ്ടാം, നമിക്കാം
സന്തോഷ് വര്‍മ്മ‌
2220
വന്നില്ലല്ലോ വസന്തം, നറുമണമുതിരും
പൂക്കളോ പുഞ്ചിരിപ്പൂ
തന്നില്ലല്ലോ, മരന്ദം നുണയുവതിനളി
ക്കൂട്ടമെത്തീലയല്ലോ
ഇന്നും ചൂടേറ്റു വാടും തരു,വിനിലകൊഴി
ഞ്ഞുള്ളൊരാ ചില്ലമേലായ്
ഒന്നും മിണ്ടാതിരിക്കും പറവയുടെ മനം
വിങ്ങിവിങ്ങിക്കരഞ്ഞോ
അനില്‍ക്കൃഷ്ണന്‍ അരിയന്നൂര്‍

 

♥♥♥ 

സമസ്യ 

(സൈറ്റില്‍ കൊടുക്കുന്ന സമസ്യകളും പൂരണങ്ങളും )

 

സമസ്യ നമ്പർ 304
മരിക്കുകില്ലൊരിക്കലും മനസ്സിലുള്ളൊരോർമ്മകൾ
സമസ്യാകാരൻ : ഋഷി കപ്ലിങ്ങാട്
വൃത്തം : പഞ്ചചാമരം
1
ചിരിച്ചിടുന്ന നിന്‍ മുഖം, സ്പുരിച്ചിടുന്ന നര്‍മ്മവും 
സ്മരിച്ചിടുന്നു, ശങ്കരന്‍ ശിരസ്സിലൊന്നണിഞ്ഞിടാന്‍ 
തിരിച്ചെടുത്തു ബാലചന്ദ്ര! നിന്നെയെന്നിരിക്കിലും 
മരിക്കുകില്ലൊരിക്കലും മനസ്സിലുള്ളൊരോർമ്മകൾ
വിനോദ് വര്‍മ്മ
2
നിരന്ന കൌതുകങ്ങൾ നീർത്ത ബാല്യ യൌവ്വനങ്ങളും
പരന്നജീവിതം കൊടുത്ത ഖേദ സൌഖ്യ മെന്നിവ
നരച്ചു, കാലുകൾ ക്കുഴിക്കു തൊട്ടുമുന്നിലെങ്കിലും
മരിക്കുകില്ലൊരിക്കലും മനസ്സിലുള്ളൊരോർമ്മകൾ
കുട്ടന്‍ ഗോപുരത്തിങ്കല്‍
3
ഒരിക്കല്‍ നിന്നൊടൊത്തു ഞാന്‍ കളിച്ച മണ്ണില്‍ നില്‍ക്കവേ 
തരിച്ചിടുന്നു നൊമ്പരത്തുടിപ്പിനാലെയുള്‍ത്തടം
തിരിച്ചുപോയിഭൂമിവിട്ടുനിന്റെ ദേഹിയെങ്കിലും
മരിക്കുകില്ലൊരിക്കലും മനസ്സിലുള്ളൊരോര്‍മ്മകള്‍
ഗീത വാസുദേവന്‍
4
നിറച്ചുതോഷമേകിയെന്റെ ജീവിതത്തിലെപ്പൊഴും
കരുത്തുനൽകിയമ്മയങ്ങുപോയ്മറഞ്ഞു ദൂരെയായ്
തിരിച്ചുവന്നിടില്ലയെന്നതാണു സത്യമെങ്കിലും
മരിക്കുകില്ലൊരിക്കലും മനസ്സിനുള്ളിലോർമ്മകൾ
ഋഷി കപ്ലിങ്ങാട്
5
മരിക്കുമീയുഷസ്സുമീ സമീരനും, ക്രമേണ വി-
സ്മരിക്കുമീ പതംഗഗീതിയും വിരിഞ്ഞ പൂക്കളും.
ചിരിക്കുമീ മുഖം പ്രിയം, തവാനുരാഗവും സഖീ-
മരിക്കുകില്ലൊരിക്കലും മനസ്സിലുള്ളൊരോർമ്മകൾ
ജോയ് വാഴയില്‍
6
വിരിഞ്ഞ പദ്മമെന്നപോൽ വിടർന്ന മോഹമോടു ഞാൻ
തിരഞ്ഞിടുന്നതാം സ്വദേശമെത്തിടുന്ന വേളയിൽ !
തിരിഞ്ഞ വാൾക്കുരുത്ത തുമ്പിൽ നിന്ന ബന്ധുവർഗ്ഗമേ !
മരിക്കുകില്ലൊരിക്കിലും മനസ്സിലുള്ളൊരോർമ്മകൾ!
ശ്രീദാസ്
7
മരച്ചിടുന്ന മഞ്ഞിലും തണുത്തുറഞ്ഞ നെഞ്ചിലും
തെളിച്ചുനിർത്തി ദേശഭക്തിനീറിടും നെരിപ്പുകൾ
അരിക്കുമൃത്യുശിക്ഷനൽകി നീ മരിച്ചുവീഴ്കിലും
മരിക്കുകില്ലൊരിക്കലും മനസ്സിലുള്ളൊരോർമ്മകൾ
സുബ്രഹ്മണ്യന്‍ കുറ്റിക്കോല്‍
8
മറഞ്ഞു പോയിടാം ചിരിച്ചു നിന്നിടുന്ന‌ മാരിവില്‍
കരഞ്ഞവര്‍ഷ മേഘമൊന്നലിഞ്ഞുപെയ്തൊഴിഞ്ഞിടാം
തിരിച്ചുവന്നിടാതകന്നിടാം ദിനങ്ങളെങ്കിലോ
മരിക്കുകില്ലൊരിക്കലും മനസ്സിലുള്ളൊരോർമ്മകൾ
അനില്‍ക്കൃഷ്ണന്‍ അരിയന്നൂര്‍
സമസ്യ നമ്പർ 305
വിളിപ്പുറത്തോടിയണഞ്ഞിടുന്നൂ
സമസ്യാകാരൻ : ദേവദാസ് മായന്നൂര്‍
വൃത്തം : ഉപേന്ദ്രവജ്ര‌
1
ഒളിച്ചുവേണം ചതുരംഗമാടാൻ   
കളപ്പുരയ്ക്കൽ മമ തോഴനുണ്ടേ
കളിക്ക് വേണ്ടി ക്കരുനീക്കുവാനായ്
വിളിപ്പുറത്തോടിയണഞ്ഞിടുന്നു.
കുട്ടന്‍ ഗോപുരത്തിങ്കല്‍
2
തുണയ്ക്കൊരാളും ഭുവി നാസ്തിയെന്നാ
മവസ്ഥയില്‍ക്കേണു ഹതാശനായി 
വിളിച്ചിടും ഭക്തനടുത്തു കൃഷ്ണന്‍ 
വിളിപ്പുറത്തോടിയണഞ്ഞിടുന്നു
ഡോ രാജന്‍
3
ഒളിച്ചിരിക്കും വനഭൂവിലോടി -
ക്കളിക്കുമാബാലനെയെന്മനസ്സേ
വിളിച്ചു നോക്കൂ കളിയല്ല കണ്ണൻ
വിളിപ്പുറത്തോടിയണഞ്ഞിടുന്നു
വിനോദ് വര്‍മ്മ
വെളിച്ചമാവുന്ന തിനേറെ മുമ്പെ
ക്കുളിച്ചു നൽ പ്രാർത്ഥനയോടു കൂടി
വിളിച്ചുവെന്നാൽ കുലദൈവമപ്പോൾ
വിളിപ്പുറത്തോടിയണഞ്ഞിടുന്നു.
തൃക്കഴിപ്പുറം രാമന്‍ 

 

 

 

കാവ്യകേളി


(ഭാഷാവൃത്തകവിസദസ്സ് )

ഭാഷാവൃത്തത്തിലുള്ള സ്വരചിതങ്ങളായ കവിതാഖണ്ഡങ്ങള്‍ കവികള്‍ കാവ്യകേളിയുടെ നിയമമനുസരിച്ചു പോസ്റ്റു ചെയ്യുന്ന സദസ്സാണ് ഇത്. ഇതില്‍ പങ്കെടുക്കുന്ന ഏഴു കവികള്‍ ഈ ക്രമത്തിലാണ്, ഇരിക്കുന്നത്:

1.അരിയന്നൂര്‍ ഉണ്ണിക്കൃഷ്ണന്‍ , 2..രാമന്‍ നമ്പീശന്‍ കേശവത്ത്, 3. ശ്രീലകം വേണുഗോപാല്‍, 4.അനില്‍ക്കൃഷ്ണന്‍ അരിയന്നൂര്‍ ,  5.  ഉണ്ണിക്കൃഷ്ണന്‍ ശ്രീലകം 6. തൃക്കഴിപ്പുറം രാമ‍ന്‍ 7. സന്തോഷ് വര്‍മ്മ

ഈ സദസ്സ് 01-01-2013 നു ആരംഭിച്ചു

 

863
മാനമേറി നീ പോയതെങ്ങേതേതു
മൌനലോകങ്ങള്‍ തേടിയാണോമനേ
കാണുവാനെനിയ്ക്കാവാത്ത ദൂരത്തു
കണ്ടു കൈക്കൊട്ടി നിന്നു ചിരിയ്ക്കയോ
കണ്ണു പൊത്തിക്കളിയ്ക്കയോ നാളുക‌
ളെണ്ണിടുന്നു ഞാ,നെണ്ണിക്കഴികിലോ
ഏതു പാതാളലോകത്തൊളിച്ചാലും
ഹാ! തിരഞ്ഞു ഞാനെത്തിടുമന്തികേ
അരിയന്നൂര്‍ ഉണ്ണിക്കൃഷ്ണന്‍
864
കാല്‍വിരലുകളൂന്നിക്കുതിക്കുന്നൂ
വാനിലേക്കൊരു ഹംസം തടാകത്തില്‍
വന്യഭൂമിയില്‍ നൃത്തമാടീടുന്ന
സുന്ദരിയൊരു ബാലേനടി പോലെ
കീര്‍ത്തി കേട്ടതാം ‘ഹംസസരസ്സി’ ലെ
നര്‍ത്തനങ്ങള്‍ തന്‍ ചാതുര്യഭാവങ്ങള്‍
പേര്‍ത്തുമോര്‍ത്തു മനോഹരമാം ദ്രുത-
കാകളിയില്‍ പകര്‍ത്തുന്നതെന്നു ഞാന്
രാമന്‍ നമ്പീശന്‍ കേശവത്ത്
865
കൊട്ടാരത്തിലെ വൈദ്യന്‍ വന്നു
പ്രതിവിധി പലതും നിര്‍ദ്ദേശിച്ചു
ഈറ്റപ്പുലിയുടെ പാലുകറന്നി-
ട്ടതിനാലൌഷധമുണ്ടാക്കേണം
അതു സേവിച്ചാല്‍ ശാന്തി ലഭിക്കും
അതിനാല്‍ റാണിയെ രക്ഷിച്ചീടാം.
മറ്റൊരു പ്രതിവിധിയീരോഗത്തി-
ന്നില്ലായെന്നതുമോര്‍ക്കണമെവരും.
ശ്രീലകം വേണുഗോപാല്‍
866
അകലെയാ വിണ്ണിലെ താരങ്ങളില്‍, വര്‍ഷ‌-
മുകിലുകള്‍ക്കുള്ളിലെ നീര്‍ത്തുള്ളിയില്‍
മഴവില്ലിലുതിരുന്ന വര്‍ണ്ണങ്ങളില്‍, ന‌-
ല്ലഴകാര്‍ന്ന ശാരദാകാശമേട്ടില്‍
പനിമതിപ്പകരുന്ന പൂനിലാവില്‍, പൊന്‍-
കനവേകും മിന്നലിന്‍ ജ്വാലകളില്‍
തിരയുന്നു കൊതിയോടെ, കവിതാംഗനേ!
ചിരിതൂകി നീ വരും കാഴ്ചകാണാന്‍
അനില്‍ക്കൃഷ്ണന്‍ അരിയന്നൂര്‍
867
പട്ടുപോലെത്തിളങ്ങിയതാം മനം
പട്ടുപോകുവാനെന്തഹോ കാരണം
കെട്ടിയ നൂല്‍ തകര്‍ന്നതു മൂലമോ
പട്ടമെന്നപോല്‍ ലക്ഷ്യം പിഴയ്ക്കുവാന്‍,
ബന്ധശൈഥില്യമേതുമനസ്സിന്നു -
മാന്ധ്യമേറ്റുമെന്നുള്ളതു സത്യമാം
മാന്ദ്യമറ്റൊരു സ്നേഹത്തഴപ്പിലേ
കാന്തിയേന്തൂമനുഷ്യഹൃദ്വാടിക!
ഉണ്ണിക്കൃഷ്ണന്‍ ശ്രീലകം
868
ബാലികേറാമലയായൊരുദിക്കുമ
പ്പോലീസ്സിന്നുണ്ടാകാൻ വയ്യ നാട്ടിൽ,;
നേരും നെറിയും വിടാതെ ഭരിക്കുവോ
രാരാലറിയേണ്ടതാണിക്കാര്യം.
നട്ടെല്ലു തെല്ലും വളക്കാതെയേതൊരു
പാർട്ടിയോഫീസ്സിലും റെയ്ഡുചെയ്യാൻ
ഒട്ടും പരുങ്ങാത്തപ്പോലീസ്സിൽത്തന്നെയാം
നാട്ടുകാർക്കൊക്കെയും സുപ്രതീക്ഷ.
തൃക്കഴിപ്പുറം രാമന്‍
869
നാട്ടുകാരറിയാതെ പാതിരാത്രിയില്‍ത്തനി-
ക്കാട്ടാളരേപ്പോല്‍ മലകേറിയൊരാനാരിമാര്‍
കൂട്ടവും കുരുതിയും തീര്‍ത്തു നാടൊട്ടു, ക്കെന്തു
നേട്ടമുണ്ടായീ?സ്വര്‍ഗ്ഗരാജ്യവും കൈവന്നുവോ?
കോട്ടം കൂടാതേ ജനവിശ്വാസം രക്ഷിപ്പാനാ-
യോട്ടുനല്‍കിയിട്ടുനാമയച്ച നേതാക്കന്മാര്‍
ചാട്ടയും ചട്ടങ്ങളും കൊണ്ടു ഭക്ത്യാചാരത്തിന്‍
തട്ടകം തകര്‍ക്കവേ , ഹൃത്തടം നടുങ്ങുന്നൂ
ഗീത വാസുദേവന്‍
870
കാറ്റിലാടുന്ന പൂമരം കണ്ടുഞാ-
നാറ്റിലന്നു തുടിച്ചുകുളിച്ചതും
വന്നുപോയേറെയോണമെന്നുള്ളിലായ്
കൊന്നപൂത്തുലഞ്ഞേകീ വിഷുക്കണി
ബാല്യമെന്നോ കൊഴിഞ്ഞുവെന്നാകിലും
കാലമേറെക്കഴിഞ്ഞുപോയെങ്കിലും
വാട്ടമില്ലാത്തപൂക്കളാമോർമ്മകൾ
തീർക്കുമെന്നുള്ളിലെന്നുമീപ്പൂമഴ !!
രാധാദേവി
871
ബാഹ്യമായുള്ളൊരു മോടികളൊക്കെയും 
ബാക്കിയായീടുമോ ജീവിതാന്ത്യത്തിലും 
ഭാഗ്യമെന്നാകിലും കാലക്കേടാകിലും 
ഭാരിച്ച കർമ്മഭാണ്ഡങ്ങളും പേറണം 
ദേഹത്തേ വിട്ടു മറ്റൊന്നിനെ തേടുമ്പോൾ 
മോഹവും കൂടല്ലോ കൊണ്ടുപോകുന്നതും 
ആശതൻ പാശത്താൽ ബന്ധിതമാകയാൽ 
വേഷമേതാകിലും കെട്ടിയാടുന്നു നാം
സന്തോഷ് വര്‍മ്മ‌

 

 

 

www.aksharaslokam.com

 

സൈറ്റില്‍ അംഗമാകാന്‍  ഇപ്പോള്‍ തന്നെ റജിസ്റ്റര്‍   ചെയ്യുക.(ഹോം പേജില്‍

റജിസ്റ്റെര്‍ ഇന്‍ ക്ലിക്കു ചെയ്തു കോളങ്ങള്‍ പൂരിപ്പിക്കുക)

 

സൈറ്റില്‍ ലഭ്യമായ പുസ്തകങ്ങള്‍ 

 

 
1.സഹസ്രദളം :


ഗ്രന്‍ഥകര്‍ത്താവ് : അരിയന്നൂര്‍ ഉണ്ണിക്കൃഷ്ണന്‍

അഷ്ടപ്രാസം ,യമകവിദ്യ, ഗോഹത്യയും ബ്രഹ്മഹത്യയും എന്ന മണി
പ്രവാള ഖണ്ഡകാവ്യം ,കറുത്ത ചേകവന്‍ എന്ന പച്ചമലയാളം കാവ്യം,
രസരാജന്‍, കുറിമാനം (എഴുത്തുകുത്തുകള്‍ , ആശംസകള്‍ , ചരമശ്ലോക
ങ്ങള്‍), അക്ഷരശ്ലോകമാഹാത്മ്യം (നൂറു പൂക്കള്‍, അംബോപദേശം) , തിരു
ശേഷിപ്പ് എന്നിങ്ങനെ എട്ടു അദ്ധ്യായങ്ങളിലായി ആയിരത്തിലധികം 
ശ്ലോകങ്ങള്‍ അടങ്ങുന്ന കൃതി. 2000ത്തില്‍ കൂനംമൂച്ചി അക്ഷരശ്ലോകവേദി 
പ്രസിദ്ധീകരിച്ചു.


2.അരിയന്നൂര്‍ :


അരിയന്നൂര്‍ ഗ്രാമത്തിന്റെ സാംസ്ക്കാരിക ചരിത്രം . ക്ഷേത്രത്തെക്കുറി
ച്ചുള്ള വിശദവിവരങ്ങള്‍ . ആധുനിക കാലഘട്ടത്തിലെ സം ഭവങ്ങളുടെ 
വിവരണം . കൂടാതെ നൂറോളം സരസശ്ലോകങ്ങള്‍ editor അരിയന്നൂര്‍ 
ഉണ്ണിക്കൃഷ്ണന്‍


3.അക്ഷരശ്ലോക ഡയറക്ടറി 2000:


ഗ്രന്‍ഥകര്‍ത്താവ് : അരിയന്നൂര്‍ ഉണ്ണിക്കൃഷ്ണന്‍

അക്ഷരശ്ലോകകലാരംഗത്തുള്ള സംഘടനകളുടെയും വ്യക്തികളുടെയും 
വിവരങ്ങള്‍ അടങ്ങുന്ന ഇത:പര്യന്തമുണ്ടായിട്ടുള്ള ഏക കൃതി.


4.ഉപനയനം :

ഗ്രന്‍ഥകര്‍ത്താവ്: ആദരേടത്ത് നീലകണ്ഠന്‍ ഭട്ടതിരിപ്പാട്
ആദരേടത്തിന്റെ ശ്ലോകങ്ങളുടെ സമാഹാരം .'മയൂരദൂത്' എന്ന സന്ദേശ
കാവ്യത്തിന്റെ പരിഭാഷ പൂര്‍ണ്ണ രൂപത്തില്‍ ഈ പുസ്തകത്തില്‍ഉണ്ട്.

5.കണ്ണോക്ക് :

ടി.എം . പോള്‍ മാസ്റ്റര്‍ സ്മരണിക. കേരളത്തിലെ പ്രഗത്ഭരായ അക്ഷര
ശ്ലോകപ്രവര്‍ത്തകരുടെ പ്രൌഢലേഖനങ്ങള്‍,പഴയ നൂറു കവികളുടേതാ
യി നൂറു ശ്ലോകങ്ങള്‍ ,കൊച്ചുണ്ണിത്തമ്പുരാന്റെ 'കാന്തവൃത്തം ' എന്ന 
പുസ്തകത്തിന്റെ പൂര്‍ ണ്ണരൂപം എന്നിവ ഉള്ളടക്കത്തില്‍ പെടുന്നു.

6.തിലാഞ്ജലി:

പണ്ഡിതവര്യനും ബഹുമുഖപ്രതിഭയുമായിരുന്ന കാര്യാട്ടുശങ്കുണ്ണിനായര്‍
കൂനമ്മൂച്ചി അക്ഷരശ്ലോകവേദി അദ്ധ്യക്ഷനായിരിക്കെ 1989ല്‍ അന്തരിച്ചു. 
അക്കാലത്തു പ്രസിദ്ധീകരിച്ച ഒരു സ്മരണികയാണു 'തിലാഞ്ജലി'. മാട
മ്പു കുഞ്ഞുകുട്ടന്റെ അനുസ്മരണലേഖനം, മണ്മറഞ്ഞു പോയ എന്‍.ഡി. 
കൃഷ്ണനുണ്ണി,കെ.എന്‍ഡി., ആദരേടം ,നെല്ലുവായ് കെ.എന്‍ നമ്പീശന്‍ തു
ടങ്ങി പലരുടെയും ശ്ലോകരചനകള്‍ എന്നിവ ഉള്ളടക്കത്തില്‍ പെടുന്നു.

7.ശിവൊള്ളിക്കൃതികള്‍ :

ശിവൊള്ളിയുടെ ലഘു ജീവചരിത്രക്കുറിപ്പു, ദാത്യൂഹസന്ദേശം കാവ്യം, 
തെരഞ്ഞെടുത്ത 60 ശ്ലോകങ്ങള്‍ എന്നിവയാണ് ഉള്‍ക്കൊള്ളിച്ചിട്ടുള്ളത്.

8.ശ്ലോകമേവ ജയതേ :

മണ്മറഞ്ഞ ശ്ലോകപ്രതിഭകളെ പരിചയപ്പെടുത്തുക എന്ന ഉദ്ദേശത്തോടെ 
ആരംഭിച്ചിട്ടുള്ള ഒരു പംക്തിയാണു ഇത്.

9.രാമകൃഷ്ണവിലോമകാവ്യം :

ഗ്രന്‍ഥകര്‍ത്താവ് : സൂര്യകവി
ജലജ എന്ന വാക്കു അനുലോമമായും പ്രോമമായും ഒരേ പോലെ വാ
യിക്കാവുന്ന പദമാണ്. മോരു തരുമോ എന്ന വാക്യം ഇപ്രകാരം തന്നെ. 
വിലോമപദം ,വിലോമവാക്യം എന്നിങ്ങനെ ഇവയെ വിളിക്കാം. വാക്യം
വലുതാകും തോറും ഇത്തരം ​ഘടന ക്ലിഷ്ടമാകുന്നു. ഇംഗ്ലീഷില്‍ ഒരു ആ
ശയം പ്രകടിപ്പിക്കുന്ന ഏറ്റവും വലിയ വിലോമവാക്യം a man, a plan, a 
canal, panama എന്നാണെന്നു ഗിന്നസ് ബുക്കില്‍ കൊടുത്തിട്ടുണ്ട്.
ഇവിടെ ഇതാ ഒരു സംസ്ക്കൃത കാവ്യം. എല്ലാ ശ്ലോകങ്ങളും വിലോമ
ങ്ങള്‍! മാത്രമല്ല, രണ്ടു ഇതിവൃത്തങ്ങള്‍ ഒരേസമയം പറഞ്ഞു പോകുക
യും ചെയ്യുന്നു. ശ്ലോകങ്ങളുടെ പൂര്‍വ്വാര്‍ദ്ധങ്ങള്‍ ശ്രീരാമകഥ പറഞ്ഞു 
പോകുമ്പോള്‍ ഉത്തരാര്‍ദ്ധങ്ങള്‍ ശ്രീകൃഷ്ണകഥ പറഞ്ഞു പോകുന്നു. കാ
വ്യകാരന്റെയും സംസ്ക്കൃത ഭാഷയുടെയും മഹത്വം! നമ്മുടെയെല്ലാം 
സുകൃതവും .
രാമകൃഷ്ണവിലോമകാവ്യത്തിനു മലയാളവ്യാഖ്യാനം തയ്യാറായിട്ടുള്ള
തു ഖണ്ഡശ: പ്രസിദ്ധീകരിക്കുന്നു. ആദ്യശ്ലോകത്തിന്റെ വ്യാഖ്യാനംകൊടു
ത്തിട്ടുണ്ട്.പണ്ഡിതോത്തമനായശ്രീ.മച്ചട്ട് ടി.നീലകണ്ഠന്‍ നമ്പീശനാണു 
വ്യാഖ്യാതാവ്.

10.ഗോശാല:

ഗ്രന്‍ഥകര്‍ത്താവ് : ഉണ്ണി എടക്കളത്തൂര്‍
ഉണ്ണി എടക്കളത്തൂര്‍ എന്ന തൂലികാനാമത്തില്‍ അറിയപ്പെടുന്ന കെ.പി.
നാരയണന്‍ നമ്പീശന്റെ ശ്ലോകരചനകള്‍ സമാഹരിച്ചതാണു കൃതി. 1994 
ലെ കവനകൌതുകം പുരസ്ക്കാരജേതാവാണു കവി. പുരസ്ക്കാരത്തിന
ര്‍ഹമായ കവിതയും ഇതില്‍ ഉള്‍പ്പെട്ടിട്ടുണ്ട്.

11.ഒറവങ്കര ശ്ലോകങ്ങള്‍:

ഒറവങ്കരയുടെ തെരഞ്ഞെടുത്ത കുറെ ശ്ലോകങ്ങള്‍

12.വൃത്തങ്ങളിലെ താളഘടന:

ഗ്രന്‍ഥകര്‍ത്താവ് : അത്തിപ്പറ്റ രവി. 
പരമ്പരാഗതരീതിയില്‍ നിന്നു വ്യത്യസ്തമായി, താളത്തെ അടിസ്ഥാനഘട
കമാക്കി വൃത്തങ്ങളെ വിശകലനം ചെയ്യാനുള്ള ഒരു ശ്രമം. സംസ്ക്കൃത
വൃത്തമായാലും ,ഭാഷാവൃത്തമായാലും , ചലച്ചിത്രഗാനമായാല്‍ പോലും 
അവയിലെല്ലാം പൊതുവായ ഒരു താളഘടനയെ കണ്ടെത്തുന്ന ഒരു .
സൈദ്ധാന്തികഗ്രന്‍ഥം

13. ശ്രീരാഘവയാദവീയം:

രാമകൃഷ്ണവിലോമകാവ്യം പോലെ തന്നെ മറ്റൊരു വിലോമകാവ്യം. 
വെങ്കിടാധ്വരി എന്ന കവിയാണ് ഇതിന്റെ രചയിതാവ്. രാമകഥ പറ
ഞ്ഞു പോകുന്ന ഓരോ ശ്ലോകത്തിനും കൃഷ്ണകഥ പറഞ്ഞു പോകുന്ന 
പ്രതിലോമശ്ലോകം എന്നാണു രചനയുടെ രീതി. ഓരോ ജോടി ശ്ലോകവും
വിലോമമാണെന്നര്‍ത്ഥം . പദച്ഛേദം കൂടെ കൊടുത്തിട്ടുണ്ട്.

14.നാരായണീയം ഭാഷാവൃത്തത്തില്‍ :

അരിയന്നൂര്‍ ഉണ്ണിക്കൃഷ്ണന്റെ പരിഭാഷ.

15.ഭര്‍ത്തൃഹരി എന്ന  ഫോറം:

ഭര്‍ത്തൃഹരിയുടെ ശതകത്രയം ഭാഷാവൃത്തത്തിലേക്കു പരിഭാഷപ്പെടു
ത്തുക എന്നതാണു ലക്ഷ്യം

16.അരിയന്നൂര്‍  E-Magazine :

ശ്ലോക വിവരങ്ങളടങ്ങുന്ന ഒരു മാസികപ്രസിദ്ധീകരണം.  എല്ലാ 10-ആം 
തിയ്യതിയും പ്രസിദ്ധീകരിക്കുന്നു.

17.ശയനപ്രദക്ഷിണം:

ശ്രീ.രാധാകൃഷ്ണന്‍ കാക്കശ്ശേരിയുടെ കവിതാസമാഹാരമാണു. സാഹിത്യ
ത്തിന്റെ വിവിധ ശാഖകളിലായി നിരവധി പുസ്തകങ്ങള്‍ രചിച്ചിട്ടുള്ള
ഗ്രന്‍ഥകര്‍ത്താവിന്റെ ഈ കൃതി ശ്ലോകങ്ങളും ഭാഷാവൃത്തത്തിലുള്ള
കവിതകളും ഉള്‍ക്കൊള്ളുന്നതാണ്.

18.കഥാത്രയീ ശ്ലേഷകാവ്യം: സമ്പൂര്‍ണ്ണമലയാളവ്യാഖ്യാനത്തോടുകൂടി.

രാമായണ-ഭാരത-ഭാഗവത കഥകള്‍ ഒരുമിച്ചു പറഞ്ഞു പോകുന്ന വിശി
ഷ്ടമായ ഒരു സംസ്ക്കൃതകാവ്യമാണ്. ഓരോ ശ്ലോകവും മൂന്നു രീതിയില്‍ 
അര്‍ത്ഥം ഉള്‍ക്കൊള്ളുന്നു. ചിദംബരകവിയുടെ ഈ കാവ്യത്തിനു മലയാ
ളവ്യാഖ്യാനം രചിച്ചിട്ടുള്ളതു മച്ചാട്ടു ടി. നീലകണ്ഠനാണ്.
വന്ദനശ്ലോകത്തിനു 10 അര്‍ത്ഥമാണു വ്യാഖ്യാതാവു കൊടുത്തിരിക്കുന്നത്.

19. അഷ്ടപ്രാസം :

സമ്പാദകന്‍ : അനില്‍ക്കൃഷ്ണന്‍ പി.യു.
ശാര്‍ദ്ദൂലവിക്രീഡിതം  വൃത്തത്തില്‍ ഓരോ ശ്ലോകത്തിലും എട്ടു സ്ഥല
ത്തു കൃത്യമായ താളത്തില്‍ ഒരേ പദം ആവര്‍ത്തിച്ചു വരുന്ന വിധം 
പദകുബേരന്മാര്‍ക്കു വിഹരിക്കാനുള്ള രചനാസങ്കേതമാണു അഷ്ടപ്രാസം. 
നാല്പതോളം കവികള്‍ ;നൂറ്റിഅമ്പതില്പരം ശ്ലോകങ്ങള്‍ ; ശ്ലോകസദസ്സു
കളിലൂടെയും കയ്യെഴുത്തു പുസ്തകങ്ങളിലൂടെയും മാത്രം തലമുറകള്‍ 
താണ്ടിയ നിരവധി രചനകള്‍. കുറെ പുതിയ രചനകളും.

20. പെട്ടരഴിയം കൃതികള്‍

പെട്ടരഴിയം വലിയ രാമനെളയതിന്റെ തെരഞ്ഞെടുത്ത കൃതികള്‍ ശ്ലേ
ഷം,പരല്‍ ഘടന,ശയ്യാഗുണം തുടങ്ങിയവയില്‍ അദ്വിതീയനായിരുന്നു 
ഗ്രന്‍ഥകര്‍ത്താവ്. വള്ളത്തോള്‍ പോലും പേട്ടരഴിയത്തിനെപ്പോലെ ശ്ലോകം
എഴുതാന്‍ കഴിയണമെന്നു കൊതിച്ചിട്ടുണ്ടത്രേ . സപ്തപ്രാസം ദീക്ഷിച്ചു 
രചിച്ചിട്ടുള്ള വഞ്ചിപ്പാട്ടു (നതോന്നത) രീതിയിലുള്ള ഒരു കവിത കൂടി .
ഇതില്‍ ചേര്‍ത്തിട്ടുണ്ട്

21.  കാതുകുത്ത്  

ഗ്രന്‍ഥകര്‍ത്താവ് : കുറുവല്ലൂര്‍ മാധവന്‍ 
കഴിഞ്ഞ രണ്ടു പതിറ്റാണ്ടു കാലമായി കൂനമ്മൂച്ചി അക്ഷരശ്ലോകവേദി
യുടെ അദ്ധ്യക്ഷനായി തുടരുന്ന  ശ്രീ കുറുവല്ലൂര്‍ മാധവന്റെ ശ്ലോകസ
മാഹാരം . കൂനമ്മൂച്ചി അക്ഷരശ്ലോകവേദി 1994 ല്‍ പ്രസിദ്ധീകരിച്ചതാണ് 
ഈ കൃതി.

22. പച്ചമലയാളം

സാധാരണപ്രയോഗത്തിലുള്ള മണിപ്രവാളമലയാളത്തിന്റെ നിഷേധമാണ് 
പച്ചമലയാളം.സംസ്ക്കൃതപദങ്ങള്‍ ഒഴിവാക്കിയുള്ള മലയാളമെന്നാണ് 
ഉദ്ദേശിക്കുന്നത്. മനസ്സ്, ദുഃഖം ,വിഷമം ....തുടങ്ങി സമ്സ്ക്കൃതത്തില്‍ നി
ന്നു സ്വീകരിക്കപ്പെട്ടിട്ടുള്ള പദങ്ങളെല്ലാം നിഷിദ്ധം . ഇങ്ങനെയുള്ള 
കാവ്യങ്ങളുടെ ഒരു ശേഖരം .

23. അക്ഷരശ്ലോക സദസ്സ്  ഫോറം

അംഗങ്ങള്‍ക്കു  ശ്ലോകങ്ങള്‍ പൊസ്റ്റു ചെയ്തു സദസ്സില്‍ പങ്കെടുക്കാം .

24.  സ്തവപുഷ്പമാലിക

ഗ്രന്‍ഥകര്‍ത്താവ് : പണ്ഡിതഭൂഷണം പി.കെ.രാമന്‍ നമ്പ്യാര്‍ 
ശിഖരിണി വൃത്തത്തില്‍ 50 സംസ്ക്കൃതശ്ലോകങ്ങള്‍ വ്യാഖ്യാനത്തോടു 
കൂടി . തട്ടകത്തമ്മയായ പനങ്ങാട്ടുകര ഭഗവതിയെ സ്തുതിച്ചുള്ളതാണ് 
ഇതിവൃത്തം .കൊല്ലവര്‍ഷം 1106 ല്‍ പ്രസിദ്ധീകൃതമായത്.

25. .ശ്രീവിജയോദയം മഹാകാവ്യം

ഗ്രന്‍ഥകര്‍ത്താ : മഹാകവി പന്തളം കേരളവര്‍മ്മ
മഹാകവിയുടെ രണ്ടു മഹാകാവ്യങ്ങളില്‍ കൂടുതല്‍ പ്രശസ്തമായതു 
രുഗ്മാംഗദചരിതം ആണ്. എന്നാല്‍ വിജയോദയം കാവ്യവും കാവ്യമേന്മ 
കൊണ്ടും പന്തളത്തിന്റെ സ്വതസ്സിദ്ധമായ ശബ്ദാലങ്കാരവൈദഗ്ദ്ധ്യം  
കൊണ്ടും അതീവ മനോഹരമാണ്.
 
26. കളിയോഗത്തില്‍ 

ഗ്രന്‍ഥകര്‍ത്താവ് : ഉണ്ണി എടക്കളത്തൂര്‍ 
 
ഗ്രന്‍ഥകര്‍ത്താവിന്റെ ആദ്യത്തെ കാവ്യ സമാഹാരമാണ്‍ 1990 ല്‍ പ്രസി
ദ്ധീകരിക്കപ്പെട്ട ഈ പുസ്തകം ..

27. ഉഷയുടെ ശയനഗൃഹം

ഗ്രന്‍ഥകര്‍ത്താവ് : മഹാകവി കുട്ടമത്ത്
 
മഹാകവിയുടെ മുഖമുദ്രയായ രചനയിലെ  ശബ്ദസൌന്ദര്യവും ശാലീന
തയും നിറഞ്ഞു നില്‍ ക്കുന്ന ഒരു കൃതി.
 
28.  ആന്തര സാമ്രാജ്യങ്ങള്‍

 
കവിതാസമാഹാരം 
ഗ്രന്‍ഥകര്‍ത്താവ് : രാധാകൃഷ്ണന്‍ കാക്കശ്ശേരി 
 
29.  കേരളം


ഗ്രന്‍ഥകര്‍ത്താവ് : മഹാകവി കൊടുങ്ങല്ലൂര്‍ കുഞ്ഞിക്കുട്ടന്‍ തമ്പുരാന്‍ 
കേരളത്തിന്റെ ചരിത്രവും ഐതിഹ്യങ്ങളും ക്രോഡീകരിക്കപ്പെട്ടിട്ടുള്ള
കാവ്യം . ഈ വിഭാഗത്തിലെ ഏറ്റവും പ്രശസ്തവും സമഗ്രവും , അതേ
സമയം മനോഹരവുമായ മലയാളകാവ്യം .  
 
30. പുലരി 
 
കവിതാ സമാഹാരം 
ഗ്രന്‍ഥകര്‍ത്താവ്: : ടി വി ജോസ്മാസ്റ്റര്‍ 
 
കൂനംമുച്ചി അക്ഷരശ്ലോക വേദിയുടെ സെക്രട്ടറി ആയിരിക്കേ 1997ല്‍ അ
ന്തരിച്ച ടി വി ജോസ് മാസ്റ്റരുടെ കാവ്യ രചനകള്‍ സമാഹരിച്ച കൃതി.






♥