ARIYANNUR AKSHARASLOKAKALAKSHETHRAM

അരിയന്നൂര്‍  

 

സെപ്തംബർ 2019 ലക്കം 93

പത്രാധിപര്‍ : അരിയന്നൂര്‍ ഉണ്ണിക്കൃഷ്ണന്‍ 

 

[മാസികയുടെ പഴയ ലക്കങ്ങള്‍ കാണുവാന്‍ ഹോംപേജില്‍ Archives ക്ലിക്കു ചെയ്യുക] 

 

അരിയന്നൂര്‍ അക്ഷരശ്ലോകകലാക്ഷേത്രം:

സ്ഥാപിതം 1989

 

ലോകത്തെവിടെയുള്ള അക്ഷരശ്ലോകകലാകാരനും അക്ഷരശ്ലോകസംഘടനയും ഞങ്ങള്‍ക്കു വിലപ്പെട്ട സൌഹൃദങ്ങളാണ്. എല്ലാവരുടേയും സൌഹൃദസഹകരണങ്ങള്‍ക്കു ഞങ്ങളുടെ ഓരോ മുന്നേറ്റവും സമര്‍പ്പിയ്ക്കുന്നു.

 

ആദ്യത്തെ അക്ഷരശ്ലോകഡയറക്ടറി (2000)

ആദ്യത്തെ അക്ഷരശ്ലോക വെബ് സൈറ്റ് (2001)

സ്വന്തം ഡൊമെയിന്‍ നെയിമുള്ള ആദ്യത്തെ വെബ് സൈറ്റ് (2011)

ആദ്യത്തെ ഓണ്‍ ലൈന്‍ അക്ഷരശ്ലോകമാസിക(2012)

ആദ്യത്തെ അക്ഷരശ്ലോക ഫേസ് ഗ്രൂപ്പ് കൂട്ടായ്മ (2011)

ആദ്യത്തെ അക്ഷരശ്ലോക വാട്ട്സ് ആപ്പ് കൂട്ടായ്മ (2014)

അക്ഷരശ്ലോകം ന്യൂസ് , ശ്ലോകപത്രം എന്നീ വാട്ട്സ് ആപ്പ് കൂട്ടായ്മ

മാസം തോറും ഏകാക്ഷരശ്ലോകസദസ്സ്.

 

സാമുദായികമോ പ്രാദേശികമോ ശൈലീപരമോ ആയ യാതൊരു ഭേദചിന്തയുമില്ലാതെ എല്ലാ ശ്ലോകസംഘടനകളുടേയും ശ്ലോകകലാകാരന്മാരുടേയും പ്രവര്‍ത്തനങ്ങളെ സമഭാവനയോടെ കാണുകയും പ്രോത്സാഹിപ്പിയ്ക്കുകയും ചെയ്യാനുള്ള നിരന്തരമായ ശ്രമം.

 
എല്ലാം എല്ലാം ഈ സൌഹൃദങ്ങളുടെ ചോദ്യം ചെയ്യപ്പെടാത്ത വിജയസ്തംഭങ്ങള്‍!
 
ലഘുചരിത്രം
 
അരിയന്നൂര്‍ മാസിക 
 
ലോകത്തെമ്പാടുമുള്ള ശ്ലോകപ്രേമികള്‍ക്കു സമയമോ സന്ദര്‍ഭമോ നോക്കാതെ യഥേഷ്ടം വിഹരിക്കാനുള്ള ഒരു പൊതു ഇടം ഉണ്ടാകുക എന്ന ചിരകാലസ്വപ്നത്തിന്റെ സാക്ഷാത് കാരമാണ്, 2011 ജൂണ്‍ മാസത്തില്‍ www.aksharaslokam.com എന്ന സൈറ്റിന്റെ രൂപീകരണത്തോടെ സാദ്ധ്യമായത്. അക്ഷരശ്ലോകവുമായി അഭിരമിക്കുന്നവരുടെ പൊതുവേദിയായി രൂപം കൊണ്ട സൈറ്റ് പതുക്കെപ്പതുക്കെ വികസിച്ചു ഭാഷാവൃത്തത്തെ കൂടി ഉള്‍ക്കൊണ്ടു കൊണ്ടു പദ്യമലയാളം ഇഷ്ടപ്പെടുന്നവരുടെ മുഴുവന്‍ വിഹാരരംഗമായി പരിണമിച്ചു. സൈറ്റില്‍ ഇപ്പോള്‍ നാനൂറില്‍ പരം അംഗങ്ങള്‍ ഉണ്ട്. 
 
എട്ട് വര്‍ഷം മുമ്പു രൂപീകരിച്ച ഈ സൈറ്റ് ഇപ്പോള്‍ നില്ക്കുന്നിടത്തു നിന്നു നോക്കുമ്പോള്‍ കാണുന്ന കാഴ്ച വിസ്മയാവഹമാണെന്നു പറഞ്ഞാല്‍ ഒട്ടും തന്നെ അതിശയോക്തിയാവില്ല. വിവിധ വേദികളില്‍ നിരവധി കവികള്‍ ചേര്‍ന്നു ആയിരക്കണക്കിനു പുതിയ ശ്ലോകങ്ങള്‍ പോസ്റ്റു ചെയ്തു കഴിഞ്ഞു. ഭാഷാവൃത്തത്തിലുള്ള കവിതകള്‍ വേറെയും . 

എല്ലാ കാഴ്ചപ്പാടുകള്‍ക്കും ഇടം കൊടുക്കുക എന്ന രീതിയാണു സ്വീകരിച്ചിട്ടുള്ളത്.

വായനക്കാരുടെ അഭിരുചികള്‍ക്കനുസരിച്ചു പങ്കെടുക്കാവുന്ന നിരവധി ഫോറങ്ങള്‍ ഈ സൈറ്റില്‍ രൂപപ്പെട്ടു വന്നു. കവിസദസ്സ് (സ്വന്തം ശ്ലോകങ്ങളെക്കൊണ്ടുള്ള വൃത്തനിബന്ധനയോടു കൂടിയ അക്ഷരശ്ലോകസദസ്സ്), സമസ്യാപൂരണം (ആഴ്ചയില്‍ ഒരു സമസ്യ),  ഭാഷാവൃത്തത്തിലുള്ള സ്വന്തം കവിതകളെക്കൊണ്ടുള്ള കാവ്യകേളി സദസ്സ്........ തുടങ്ങിയവ ധാരാളം പങ്കാളിത്തമുള്ള ഫോറങ്ങളായി തുടരുന്നു. പുതിയ പുസ്തകങ്ങള്‍ 'ഇ-പതിപ്പ്' ആയി പ്രസിദ്ധീകരി യ്ക്കാനും സൌകര്യമൊരുക്കിയിട്ടുണ്ട്. 

ഇങ്ങനെ പ്രസിദ്ധീകരിച്ചവയുള്‍പ്പെടെ കുറച്ചു പുസ്തകങ്ങളടങ്ങുന്ന ഒരു ഗ്രന്ഥ‌ശാലയും സൈറ്റില്‍ കാണാവുന്നതാണ്.

'അരിയന്നൂര്‍ 'മാസിക, സൈറ്റില്‍ പ്രസിദ്ധീകരിക്കുന്ന സാഹിത്യരചനകളുടെ ഒരു ക്രോഡീകരണമാണ്. 2012 ജനുവരിയില്‍ പ്രസിദ്ധീകരണം തുടങ്ങിയ മാസിക എല്ലാ 15 ആം തിയ്യതിയും മുടങ്ങാതെ പ്രസിദ്ധീകരിച്ചു വരുന്നു. ഈ 93 ആം ലക്കം ഓണം  വിശേഷാൽപ്പതിപ്പായി പ്രസിദ്ധീകരിക്കാന്‍ കഴിഞ്ഞതില്‍ വളരെ സന്തോഷമുണ്ട്. യൂസഫലി കേച്ചേരിയെപ്പോലെ അതിപ്രശസ്തര്‍ മുതല്‍ പുതുതായി എഴുതിത്തുടങ്ങിയവര്‍ വരെയുള്ളവര്‍ ഈ മാസികയെ സാഹിത്യസൃഷ്ടികളെക്കൊണ്ടു സമ്പന്നമാക്കിയിട്ടുണ്ടെന്നു നന്ദിപൂര്‍വ്വം അനുസ്മരിയ്ക്കുന്നു.  ഈ യാത്രയില്‍ സഹകരിച്ച എല്ലാ കവികള്‍ക്കും അകൈതവമായ നന്ദി രേഖപ്പെടുത്തുന്നു.തുടര്‍ന്നുള്ള കാല്‍വെയ്പുകളിലും എല്ലാവരുടേയും സഹകരണം ഉണ്ടാകണമെന്നു വിനയപുരസ്സരം പ്രാര്‍ത്ഥിയ്ക്കുന്നു.

അക്ഷരശ്ലോകം ഫേസ് ഗ്രൂപ്പ് കൂട്ടായ്മ, അക്ഷരശ്ലോകം വാട്ട്സ് ആപ്പ് കൂട്ടായ്മ , അക്ഷരശ്ലോകം ന്യൂസ് കൂട്ടായ്മ, അന്നന്നത്തെ വാര്‍ത്തകള്‍ ശ്ലോകരൂപത്തില്‍ പ്രസിദ്ധീകരിയ്ക്കുന്ന ശ്ലോകപത്രം വാട്ട്സ് ആപ്പ് കൂട്ടായ്മ എന്നിവയും ഞങ്ങളുടെ സംരംഭങ്ങളാണെന്നു അഭിമാനപൂര്‍വ്വം അറിയിയ്ക്കട്ടെ!

എടുത്തു പറയേണ്ട ഒരു കാര്യം ഈ സൈറ്റിലെ അംഗത്വം തികച്ചും സൌജന്യമാണെന്നുള്ളതാണ്. www.aksharaslokam.com എന്ന സൈറ്റില്‍ കയറി റെജിസ്റ്റര്‍ ചെയ്യുകയേ വേണ്ടു.
 
 
അരിയന്നൂര്‍ ഉണ്ണിക്കൃഷ്ണന്‍
തൃശ്ശൂര്‍ -680102
 
ariyannur@gmail.com 
 


തത്വമുക്തകം  89

 

അല്പാനാമപി വസ്തൂനാം

സം ഹതിഃ കാര്യസാധികാ

തൃണൈരാരഭ്യതേ രജ്ജു-

സ്തയാ നാഗോ/പി ബദ്ധ്യതേ

 

ചെറിയ വസ്തുക്കള്‍ പോലും ഒരുമിച്ചാല്‍ കാര്യത്തിനുതകും .പുല്ലുകള്‍ കൊണ്ടാണു കയറുണ്ടാക്കുന്നത്. എന്നാല്‍ ആ കയറു കൊണ്ടു ആനയേയും തളയ്ക്കുന്നു.

ശ്ലോക‍വും ലോകവും

 

അക്ഷരശ്ലോകസദസ്സ്  

25/8/2019 നു കാവീട്ടിൽ ശ്രീ.ടി കെ പ്രസന്നന്റെ വസതിയിൽ നടന്ന അക്ഷരശ്ലോക അഹസ്സ്‌: ടി കെ പ്രസന്നൻ, വിവേക്‌ പെരുവനം, ജയൻ വാര്യർ,മുതുപറമ്പു നാരായണൻ,അരിയന്നൂർ ഉണ്ണിക്കൃഷ്ണൻ,അയിരിൽ നാരായണൻ


എല്ലാ മാസവും ഒന്നാം തീയതി അക്ഷര ശ്ലോകം വാട്ട്സ്ആപ്പ് ഗ്രൂപ്പിൽ നടന്നുവരുന്ന ഏകാക്ഷര നിശാ സദസ്സ് സെപ്തംബർ ഒന്നിനും നടന്നു. അക്ഷരം ഇ .

അ, ക, ച, ത, ന, പ,മ,വ, സ എന്നീ ഏകാക്ഷര നിശാസദസ്സുകൾ ഒരോ മാസവും ഒന്നാം തീയതികളിൽ നടന്നിട്ടുണ്ട്. 


പങ്കെടുത്തവര്‍ : അരിയന്നൂർ ഉണ്ണിക്കൃഷ്ണൻ, കൊങ്ങൂർപ്പള്ളി, മുതുപറമ്പ് നാരായണൻ, തൃക്കഴിപ്പുറം രാമൻ, വിവേക്, സ്വസ്തി ചന്ദ്രൻ, ജയ ശോഭ, വികെവി മേനോൻ, രുഗ്മണി വാര്യർ, ഉഷ ഭാസ്ക്കരൻ, ഗോപി, ഗോകുൽ, ജ്യോതിർമയി, അനിൽക്കൃഷ്ണൻ അരിയന്നൂർ

 

സംസ്ക്കൃതത്തില്‍ നിന്നൊരു മുത്ത് 91

 

വ്യാഘ്രഃ സേവതി  കാനനം  സുഗഹനം ,

സിംഹോ ഗുഹാം സേവതേ

ഹംസഃ സേവതി പദ്മിനീം കുസുമിതാം ,

ഗൃദ്ധ്രഃ ശ്മശാനസ്ഥലീം

സാധുഃ സേവതി സാധുമേവ സതതം

നീചോപി നീചം ജനം

യാ യസ്യ പ്രകൃതിഃ സ്വഭാവജനിതാ

കേനാപി ന ത്യജ്യതേ 

കടുവ കൊടും കാട്ടില്‍ വസിയ്ക്കുന്നു , സിംഹം ഗുഹയില്‍ വസിയ്ക്കുന്നു അരയന്നം പുഷ്പിതമായ താമരപ്പൊയ്കയില്‍ വസിയ്ക്കുന്നു, കഴുകന്‍ ശവപ്പറമ്പില്‍ വസിയ്ക്കുന്നു, സജനങ്ങള്‍ എപ്പോഴും സാധുക്കളോടു തന്നെ ചേരുന്നു, നീചന്മാര്‍ നീചന്മാരോടും . ജന്മസിദ്ധമായി ശീലങ്ങള്‍ ഉപേക്ഷിയ്ക്കാന്‍ ആര്‍ക്കും ആവില്ല. 

 

 

പുതിയ കവിതകള്‍

രാസക്രീഡ
(നാരായണീയം ദശകം 69 വൃത്താനുവൃത്തം - കുസുമമഞ്ജരി  )
അരിയന്നൂർ ഉണ്ണിക്കൃഷ്ണൻ
1
ചാരു പീലികളണിഞ്ഞൊരാ ചികുര, മാടിടും 
മകരകുണ്ഡലം,
ഹാരജാല, മഴകേറിടുന്ന വനമാല, 
സൽസുരഭി കുങ്കുമം
വാരിണങ്ങുമരഞാണണിഞ്ഞ മൃദുപീതചേല, 
മണിനൂപുര -
സ്ഫാരശോഭ, തവ രാസകേളി പരിഭൂഷിതാംഗ-
മിവനോർക്കുവേൻ
2
മോടിയോടണി വിഭൂഷ ചാർത്തി നിജ കച്ചയിൽ 
കുചമൊതുക്കി പൊൻ-
തോട പൂങ്കവിൾ തലോടി പെണ്മണികൾ വന്നു 
ചുറ്റുമണിചേരവേ
പാടലാധരികൾ തന്നിണക്കിടയിലിന്ദിരാ-
രമണ! ഭംഗിയാ-
യാടി നീ മടി വെടിഞ്ഞു താമരസനാഭ ! 
രാസനടനം തദാ
3
ശ്രീമണാള! തവ ഭാസ്സിയന്ന നവരാസകേളി 
രസസൗരഭം
മാമുനിപ്രവരനായ നാരദനുരച്ചറിഞ്ഞു 
കുതുകത്തൊടെ
തൂമ ചേർന്ന പല വേഷഭൂഷകളണിഞ്ഞ 
നാരികളുമൊത്തുടൻ
വ്യോമഭൂവിലഥ വന്നു ചേർന്നു സുരഭൂവിൽ 
നിന്നമരവൃന്ദവും
4
പാടിയാ മുരളി തന്‍ ശ്രുതിയ്ക്കനുസരിച്ചു 
രാഗലയമൊത്തു നീ
ചോടു വച്ചു കളിയാടി താളമൊടു ചേര്‍ന്നു 
കൊണ്ടതിമനോഹരം
ആടി കൈവള കിലുക്കി തോളിലഥ 
ഹസ്തപങ്കജമണച്ചു പ‌
ട്ടാടതന്നരയിലൂര്‍ന്നു നിന്‍ മഹിതരാസനൃത്ത-
മ‌തിനായ് തൊഴാം ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍
5
ഒത്തു ചേര്‍ന്നു ബഹുമത്സരത്തൊടുടനേറ്റു-
പാടുവ‌തിനൊത്തൊരാ
നര്‍ത്തനത്തില്‍ മണിഹാര‌ഭൂഷണമുലഞ്ഞു 
മെയ്യിളകിയാടവേ
മുത്തിയന്നു ഹൃദി പൂ പൊഴിച്ചു സുരരംഗനാ-
ജനസമേതരായ്
ചിത്തമോഹമൊടു നിന്നിലങ്ങനെ ലയിച്ചു 
നിന്നു പരചിന്മയ!
6
സന്നഗാത്രലതമേൽ വിയർപ്പു പൊടിയുന്നൊരാ 
വ്രജനതാംഗിയാൾ
വന്നു വാടി മിഴി ചിമ്മി നിൻ ചുമലിലേക്കു ചാഞ്ഞു 
നില കൊണ്ടുതേ
ചിന്നിടും ചികുരമാര്‍ന്നൊരുത്തി കളഭം 
മണക്കുമൊരു നിന്‍ ഭുജം
തന്നിലാരുമറിയാതെ മുത്തമരുളി സ്വയം 
പുളകമാർന്നുതേ
7
കർണ്ണഭൂഷ തടവുന്ന തൻ കവിളുരുമ്മി നിന്റെ 
കവിളോടു വൻ-
പുണ്യമാർന്നൊരുവൾ ഹാ! മുകർന്നു തവ 
പൂഗചർവ്വിതരസാമ്യതം
അർണ്ണവാത്മജ കളിക്കുവോരു മണിമേട, 
സുന്ദര! ഭവാനൊടീ-
വണ്ണമാടുമളവേതു സൗഖ്യപദ
മാർന്നിടാത്തതബലാജനം
8
പാട്ടടങ്ങിയഥ വാദ്യമേളവുമൊടുങ്ങി മെല്ലെ 
നതഗാത്രിമാർ
വാട്ടമെന്നി നടനം തുടർന്നു പര
ചിത്സുഖത്തിലവമഗ്നരായ്
ഒട്ടഴിഞ്ഞു പുട മാർപടം മുടിയതോർത്തതില്ലവർ, 
വിയത്തിലോ
നട്ട പോലെ നിലകൊണ്ടു താരകൾ 
കഥിപ്പതെന്തിനധികം വിഭോ!
9
മുത്തിലാഴ്ത്തിയുലകാക‌വേ നടനവും നിറുത്തി -
യിളകി സ്വയം
നൃത്തമാടിയതു കൊണ്ടു മെയ്യിലണിവേര്‍പ്പു-
മുത്തുകള‌ണിഞ്ഞിടും
ചിത്തജാധി പെരുകും വ്രജാംഗനകള്‍ പേറിടും
 സുകൃതവായ്പിനാല്‍
തത്തി നീ വിവിധമൂര്‍ത്തിയായവരിലേകി 
മാരപരമോത്സവം
10
കുന്ദബാണനടനത്തിലാ തനു തളർന്നു 
ലാളനകളേറ്റിടും
സുന്ദരീജനവുമായ് സുഖിച്ചു കളിയാടി 
യാമുന ജലത്തിൽ നീ
നന്ദനന്ദന!വനത്തിലാ കുസുമ സൗരഭം 
വിതറിയെത്തിടും
മന്ദമാരുതനുമേറ്റനേക വിമലാംഗി-
മാരൊടു രമിച്ചുതേ
11
രാവു തോറുമയി കോമളാംഗ കമനീജനത്തിനു 
കൊടുത്തു നീ
കേവലം മുനിജനാര്‍ജ്ജിതം പ്രമദസിന്ധു-
മജ്ജനമഹാരസം
ആ വിധീശ്വരമുഖര്‍ക്കുമാദരവു ഗോപിമാരി-
ലുളവായി പോല്‍
ഹേ വിഭോ പ്രണതലോകരമ്യ! മതിരമ്യ‌! 
കൃഷ്ണ! തുണയാക നീ
അമ്മയും മകളും
രാമൻ നമ്പീശൻ കേശവത്ത്
മൂത്ത പുത്രിയരികത്തു തന്‍ കരം
കോര്‍ത്തിരുന്നു പുണരുന്ന മാത്രയില്‍
ഉള്‍ത്തടം മധുരധന്യമായതിന്‍ -
തൃപ്തി വന്നു ജനനിക്കു തത്ക്ഷണം !
ഹന്ത തന്‍തനു മഥിച്ച രോഗമോ -
ടന്തരംഗമലയും വിഷാദവും
അന്തികേ മരുവിടും സ്വപുത്രിയാ -
ലന്തരായമിയലാതൊഴിഞ്ഞിടും !
ചന്തമാര്‍ന്ന തെളിവെള്ളിനൂലിഴ-
ക്കൂന്തലൊക്കെ വിരലാലൊതുക്കിടും
തന്‍ തനൂജയുടെ നല്ലവാക്കു പോ -
ലെന്തു വൃദ്ധജനനിക്കൊരൗഷധം !
പുത്തിലഞ്ഞിമലര്‍പോല്‍ ചിരിച്ചിടും
പുത്രിമാരിലിവള്‍ മൂത്ത പെണ്മണി
എത്തി മാതൃപരിചര്യയൊന്നു തന്‍ -
കൃത്യമെന്നു മനസാ ധരിപ്പവള്‍ !
അമ്മ നെറ്റിയില്‍ മുകര്‍ന്നു തന്ന പൊ -
ന്നുമ്മ തന്‍ വില ശരിക്കറിഞ്ഞിടും
നിര്‍മ്മലാശയയിവള്‍ക്കു തുല്യയാ -
യിമ്മഹിക്കകമൊരുത്തി വേറെയാര്‍ !
രണ്ടു പൂക്കൾ
തൃക്കഴിപ്പുറം രാമന്‍
പൊന്നോണം:-
ഓണപ്പൂവിളി, യോണവില്ലടി മുതൽക്കൊട്ടുണ്ടു കേട്ടീടുവാൻ,
ഓണക്കോടി തൊടാൻ, മണക്കുവതിനും; കണ്ടീടുവാൻ പൂക്കളം;
ഓണസ്സദ്യ രുചിയ്ക്കുവാൻ ധനികർതൻ പഞ്ചേന്ദ്രിയങ്ങൾക്കു പൊ-
ന്നോണം തൃപ്തി കൊടുപ്പു;കോരനതുനാൾ പാഴ്ക്കഞ്ഞിതാൻ കുമ്പിളിൽ!.
താരപ്പൂക്കളം
താരാപുഷ്പങ്ങളെടു
ത്താരാലോരോ നവീനരൂപത്തിൽ
ചാരുതചേരും പൂക്കള
മാരുണ്ടാക്കുന്നു തെറ്റിടാതെന്നും?
മുക്തമുകുളങ്ങൾ 
മോഹനൻ മൂലയിൽ 
ഈടേറുംമഴയിൽക്കുളിച്ചു പുളകംചൂടുന്ന കാറ്റോടിവ-
ന്നീവാതിൽപ്പടിയും കടന്നു കുശലം തേടും നിശാവേളയിൽ
നീരാളും മുടിയാർന്ന രാസലതികേ നാണംകുരുക്കുന്ന നിൻ
നാഭീനാളികയിൽക്കനൽക്കനവു ഹാ!മുക്കട്ടെ മുക്തിക്കു ഞാൻ!
ചന്ദനനിലാക്കുറിയണിഞ്ഞ പുതുമങ്ക-
യ്ക്കമ്പലനടയ്ക്കലൊരുപന്തലുയരുന്നു
ബന്ധുരരവങ്ങളുണരുന്നു മുദമോടി-
ന്നന്തരമെഴാതെപുഴ ചേലഞൊറിയുന്നു!
കല്ലുംമുള്ളുകളും കനത്തമഴയും മഞ്ഞും മരുപ്പച്ചയും
കല്ലോലങ്ങളുമെന്റെ നിത്യകവിതാവൃത്തിക്കു വിത്താകവേ
'ചില്ലിൽ'ത്തട്ടിമുറിഞ്ഞനോവിലുലയുംശീലിൻ ശിരസ്സെപ്പൊഴും
കല്ല്യാണാലയ വാണി!നിൻകരവിരൽത്താരാൽത്തലോടീടണം!
സ്നിഗ്ദ്ധശ്യാമളസർഗ്ഗവാഹിനിയൊഴുക്കറ്റിങ്ങു വറ്റീടവേ
പ്രജ്ഞാനദ്യുതിമങ്ങിജീവിതവഴിച്ചാലും മറന്നീടവേ
പൊൽത്തിങ്കൾക്കുറി തെല്ലു മാഞ്ഞുവരുമിക്കാർവർണ്ണജന്മർക്ഷമെ -
ന്നുൾക്കാ,മ്പുല്പലനേത്രകീർത്തനനദീ തീർത്ഥത്തിൽ മുക്കുന്നുവോ!
മേടുകളിടി,ച്ചിടവിടാതെയിടി തോൽക്കും -
ഘോരരവമോടു ദുരിതപ്പുഴയൊഴുക്കി
ആടിമുകിലാംമുടിയഴിച്ചു, മുലതുള്ളി -
ച്ചോടിയണയുന്നു കലിയാർന്ന മലയത്തി..!
തമ്പുരാനും കോരനും.
മോഹനന്‍ കാരണത്ത്
ഉണ്ണി പിറന്നല്ലൊ കോരാ...കോരി
തന്നേക്കാം ഞാൻ, ഇതാ കഞ്ഞി
കുമ്പിളും കുത്തിയിരിപ്പൂ...മണ്ണി~
ലമ്പതു വാരയകലെ
കോരനും കേളനുമയ്ത്തം...പണ്ടേ
ദൂരേ കളഞ്ഞവരാകാം
എങ്കിലും തമ്പുരാൻ വീണ്ടും...വാരി~
ക്കൊണ്ടോന്നണിഞ്ഞു നിൽക്കുന്നു!
ഓണമിങ്ങെത്തിക്കഴിഞ്ഞൂ...കോരാ
ഞാനിതാ കഞ്ഞി വിളമ്പാം
അമ്പലം തീണ്ടാതെ, ഇല്ലാക്കാടിൽ
തമ്പടിച്ചോൻ കോരനെങ്ങോ!
കമ്പനി വന്നു കുഴിച്ചൂ...ഖനി
അമ്പോറ്റി! കോരനോ റോട്ടിൽ!!
പാലങ്ങൾക്കുണ്ടടിഭാഗം...നല്ല
ശേലാണ് കൂര വച്ചീടാൻ
സർക്കാരും കമ്പനീം തമ്പ്രാൻ...പുതു~
പുത്തൻ പൊതുജനം കോരൻ.
നൃത്തം
സി വി പി 
കവിതകള്‍ നൃത്തം വെയ്ക്കുന്നൂ,പല
താളത്തില്‍ ,പല മേളത്തില്‍ 
ടാങ്കോ,സാല്‍സ, കഥക്,റീല്‍,സാംബ,
ടാറന്റല്ല,മണിപ്പൂരി.
മുദ്രകളില്‍ പുഴ,വെയില്‍,,മരുഭൂമി,
കാട്ടരയന്നച്ചിറകൊച്ച
ചോരച്ചാലുകള്‍,നിലവിളികള്‍ .അഭ-
യാര്‍ഥികളൊഴുകും പെരുവഴികള്‍.
.മിഴികളിലാദിനിലാവല; കനവിന്‍ 
കതിരോളി ചിന്നും താഴ്‌വാരം,
പ്രണയത്തിന്‍ ഋതു ചലനങ്ങള്‍,രോ-
ഗാതുര ജീവിത കഥനങ്ങള്‍.
തിരകളിലുലയും പായ്ക്കപ്പല്‍,ത - 
പ്താത്മാവിന്‍ ജലസഞ്ചാരം.
കവിതകള്‍ നൃത്തം വെയ്ക്കുന്നൂ,പല
രൂപത്തില്‍,പല വേഷത്തില്‍ 
മഞ്ഞ, ചുവ,പ്പു കറുപ്പു ,വെളുപ്പുട
യാടകള്‍ കാറ്റത്തുലയുന്നു.
പാതിമയങ്ങി,പ്പാതിയുണര്‍ന്നി-
ങ്ങകലെയിരിപ്പുണ്ടീ ഞാനും 
ബോധാബോധതലങ്ങളിലോ,ചുവ-
ടാകെത്തെറ്റിയ നിഴലുകളാം.
ദ്രുതമെന്‍ കാതി,ലൊരില്ലിമുളങ്കാ
ടുലയും പോലൊരു പദചലനം!! 
കാകളി,കേക ,തരംഗിണി,മഞ്ജരി
മണിനൂപുരമിട്ടാടുന്നു!
കവിതകള്‍ നൃത്തം വെയ്ക്കുന്നൂ,അതി-
ലെന്‍ വെയിലും മയിലാടുന്നൂ!
കാണുകയാം ഞാന്‍ കുളിരാര്‍ന്നിപ്പോള്‍
ഒന്നാം നെല്ലിന്‍ തിരു നടനം
കര്‍ക്കിടകത്തിന്‍ മുടിയാട്ടം,പൊ-
ന്നാവണി തന്‍ പൂപ്പൊലിയാട്ടം
പൂക്കുലയേന്തി ത്തുള്ളും കമുകിനു
ചുറ്റും തുമ്പികള്‍ തുള്ളുന്നു.
കവിതകള്‍ നൃത്തം വെയ്ക്കുന്നൂ,അതി
ലെന്‍ പ്രിയ നിളയുടെ കുളിരാട്ടം!,
മതിമോഹനശുഭനടനത്തിന്‍റെ
ചിലമ്പൊലി താരകളാകുന്നു!
പുഞ്ചിരി പൂമരമാകുന്നൂ,കട
മിഴിയില്‍ നലാവിന്‍ നറുവീഞ്ഞ്!
അറിയാതൊരു തുടിതാളത്തില്‍ഞാ
നേതോ ചുവടുകള്‍ വച്ചെന്നോ?
എന്‍ മനമീനിമിഷം കയ്പ്പില്ലാ
കാഞ്ഞിരമുള്ളൊരു തിരുമുറ്റം!
കവിതകള്‍ നൃത്തം വെയ്ക്കുന്നൂ,പല
 വേഷത്തില്‍,പല താളത്തില്‍.
എങ്കിലുമറിയുന്നൂ ഞാ,നവരുടെ
ഗോത്രച്ചിഹ്നമൊരേപോലെ !
അവരുടെ കൊടികള്‍ക്കൊരുനിറ,മവരുടെ
മഴകള്‍ക്കെല്ലാ മൊരു ഭാഷ .
അവരുടെ മുദ്രകളെഴുതും ഭാവ
രസങ്ങള്‍ക്കൊരു ലിപി,യൊരു ശാസ്ത്രം.
അവരുടെയസ്ത്രങ്ങള്‍ പായുന്ന-
തൊരേവേഗത്തി,ലൊരെ ദിശയില്‍ .
അവരുടെ നദികള്‍ സര്‍വ്വവ്യാപികള്‍,
പക്ഷികള്‍ കൂടില്ലാത്തവയാം .
കവിതകള്‍ നൃത്തം വെയ്ക്കുന്നൂ,അതി-
ലെന്‍ വെയിലും മയിലാടുന്നു........
ലെന്‍ വെയിലും മയിലാടുന്നു........
രണ്ടു മുക്തകങ്ങൾ
എ. ആർ. ശ്രീകൃഷ്ണൻ
1. മേഘാവൃതം
ഒന്നോതുവൻ:  ദുര, വിരോധ,മശാന്തി, ഗർവി-
ച്ചൊന്നോരു വൻ കരിമുകിൽപ്പട നീങ്ങുവോളം       
തന്നോമലാമഴകൊടൊത്തിഹ ഹൃദ്വിയത്തിൽ
പൊന്നോണമെന്ന പുതുചന്ദ്രിക പുഞ്ചിരിയ്ക്കാ !
2.സംശയം !
പൊന്നോണപ്പുലരിയ്ക്കു സംശയ, "മുണർത്തീടേണ്ടതിങ്ങാരെ ഞാ-
നിന്നോതി പ്രഥിതാഭമാം ബലിമഹത്ത്വത്തിൻ്റെ തത്ത്വങ്ങളെ ?!
ഒന്നോർത്താൽ, മിഴി പൂട്ടി നിദ്ര പഴുതേ ഭാവിപ്പൊരിക്കൂട്ടരെ-
ച്ചെന്നോജസ്സൊടുണർത്തുവാൻ ചതുരനായെത്താ ചതുർവക്ത്രനും !"
കൈകേയീമാനസം.
ശ്രീലകം വേണുഗോപാല്‍
സാകേതസിംഹാസനം ശപ്തമാണതിലേറി
ഈരേഴുവര്‍ഷം വാഴ്‌വോര്‍ മൃത്യുവെപ്പുല്‍കും നൂനം
കേട്ടു ഞാന്‍ വിഹംഗങ്ങളനോന്യമുരച്ചൊരീ
സ്പഷ്ടമാം പ്രവചനം, സത്യമാമതു ദൃഢം
ഓര്‍ക്കണം, ദശരഥന്‍ ചെയ്തൊരാ വാഗ്ദാനത്താല്‍
ലബ്ധമാക്കീടാം രാജ്യഭാരമെന്‍ ഭരതനായ്
ആരു കാണുന്നൂ,ഭാഗ്യനിര്‍ഭാഗ്യമൊന്നായ്‌വന്നു
ചേര്‍ന്നുനിന്നെന്‍ഹൃത്തില്‍ വന്‍ ദുഃഖങ്ങള്‍ നിറയ്ക്കുന്നു.
ആരോടും ചൊല്ലാനായിട്ടാവില്ലീ രഹസ്യങ്ങള്‍
നേരോടേ ഗുരുപാദേ സത്യം ഞാന്‍ ചെയ്തൂ മുന്നം
എങ്കിലും ദൗഹിത്രന്നു ദൗര്‍ഭാഗ്യം ദയാഹീനം
സംഗമമാവുന്നേരം മൂകനാകില്ലാ ഞാനും
ചൊല്ലരുതാരോടും നീയീ ഗൂഢരഹസ്യങ്ങള്‍
എല്ലാം നിന്‍വിവേകത്താല്‍ വെല്ലുകവേണം സ്വയം
വല്ലായ്മയതിനാലേ വന്നാലും വലയാതെ
നല്ലപോല്‍ വിചാരിച്ചു കര്‍മ്മങ്ങള്‍ ചെയ്തീടണം
ഗുരുവിന്നേകീ സത്യപ്രസ്താവം രഹസ്യത്തെ
വെളിവാക്കീടില്‍ ജീവത്യാഗം ഞാന്‍ നടത്തിടും
അതിനാല്‍ ഞാനുരച്ചുള്ള കാര്യങ്ങള്‍ യഥാവിധി
മതിയാം‌വണ്ണം ചിന്തിച്ചീടുക യഥാകാലം ."
രാജാശ്വപതി തന്റെ പുത്രിയോടിത്ഥം ചൊല്ലി
ജീവനം വെടിഞ്ഞിട്ടു വീരസ്വര്‍ഗ്ഗത്തെപ്പുല്‍കി
പാവം കേകയപുത്രി! നിര്‍ന്നിമേഷയായ് ജീവ-
ച്ഛവമായ്,നിശ്ചേതനം നിന്നുപോയ് ശിലപോലെ
ഏതേതോ വിചാരങ്ങള്‍ ധാരയായോരോന്നായി
ഘോരമായ് ഹൃദയത്തിന്‍ ശാന്തത തകര്‍ക്കവേ
കൈകേയി വിക്ഷുബ്ധയായക്ഷണംതന്നെ ക്ഷിപ്രം
ധീരമായ് പരിഹാരം കണ്ടതു ചരിത്രമായ്.
രാമനും ഭരതനും ലക്ഷ്മണന്‍,ശത്രുഘ്നനും
മമകാത്മജര്‍ ഭേദഭാവമില്ലെനിക്കേതും
നാല്‍‌വരിലാരുംതന്നെ ശപ്തമാം സിംഹാസനേ
വാഴുവാന്‍ ഗതിയാകാനേകാ ഞാനവസരം

ദൂരെയാ പുരവീഥിതന്നിലായഭിഷേക-
ഘോഷങ്ങളുയരുന്നതൊക്കെ നിഷ്‌പ്രഭമാവാന്‍
ഞാനൊരു കരണമായ്ത്തീര്‍ന്നേക്കാമെനിക്കെന്റെ
മക്കളെ രക്ഷിക്കാനായ് മറ്റെന്തു കരണീയം?

ഗൂഢമീ രഹസ്യം നീയാരോടും ചൊല്ലീടൊല്ല"
താതന്റെയനുജ്ഞയും പാലിക്കവേണംതാനും
ഈ വിധം ചിന്തിച്ചേതോ തീരുമാനങ്ങള്‍ ഹൃത്തില്‍
ആകുലമുറപ്പിച്ചു കൈകേയി യഥാപൂര്‍‌വ്വം
രാമനെയൊഴിവാക്കി മറ്റുള്ള സഹോദര-
രാരുമാഗ്രഹിക്കില്ലാ രാജ്യകാര്യത്തിന്‍ ഭാരം
നാല്‍‌വരെയൊഴിവാക്കാനൊന്നുതാന്‍ കരണീയം
പൂര്‍‌വ്വമാം വരം ബുദ്ധിപൂര്‍‌വ്വമായ് വരമാക്കാം.
മക്കളില്‍ ചിലര്‍ ശത്രുവായെന്നെ ഗണിച്ചിടാം
ദുഷ്കീര്‍ത്തിയെനിക്കുണ്ടാമെല്ലാമേ വിധിഗതം
വന്നിടും യുഗങ്ങളില്‍ ദുഷ്ടമാതാവായ് നാമം
വന്നിടാം,പോട്ടേ,മാതൃധര്‍മ്മം ഞാന്‍ പുലര്‍ത്തിടും."
കാണുവിന്‍ മാലോകരേ ! നിങ്ങളീ മാതാവിനെ
ക്രൂരയാ,യധര്‍മ്മിയായ് കണ്ടില്ലേയിതുവരെ
ഏതൊരു കര്‍മ്മത്തിനും കാരണമുണ്ടാമെന്ന
സാധുത മറന്നീടില്‍ നിഷ്‌പ്രജ്ഞരാവും നമ്മള്‍
ഒന്നു നാമറിയേണം സര്‍‌വ്വജ്ഞരല്ലാ നമ്മള്‍
മുന്നിലെത്തും കാര്യത്തിന്‍ സാധുത്വം വിധിക്കുവാന്‍
അല്ലായ്കില്‍ അല്പജ്ഞാനം നല്‍കിടും ജളസ്ഥാനം
മെല്ലെ ഭൂഷണമാക്കി വാണിടാം,ദുര്യോഗംതാന്‍ !.
ഒരു യാത്രയുടെ ഓർമയ്ക്ക്
ദീപ കരുവാട്ട്
ഒരു യാത്രയിലൂടറിഞ്ഞു ഞാ-
നൊരുഗംഭീരരവത്തെയത്രമേൽ
പലനാളിലുറഞ്ഞ കാവ്യമാ-
യലയും മാനസസാഗരം സമം
വഴിയോരമരങ്ങളൊക്കെയും
തലതാഴ്ത്തുന്നുലയുന്നു കാറ്റിലായ്
പതിയേ യുരഗം കണക്കു നീ-
ണ്ടിഴയും വാഹനമെങ്കിലും സുഖം
വയലാറുണരും മുഴക്കമോ-
ടെരിയും ബാലനുമഗ്നിഗോളമായ്
പടരും സിരകൾക്കതൂർജ്ജമാ-
യുടനീളം വരിയുന്നു തീക്ഷ്ണമായ്
നിമിഷങ്ങളതൂർന്നു പോയതൊ-
ന്നറിയാതെത്ര ലയിച്ചിതോ സ്വയം
ഇടയിൽ പ്പലകോളുകൾ വരും
മുറിയുന്നു ക്ഷണികം സ്വരം ലയം
മഴയും, മൃഗശിക്ഷകൻ, മനോ-
മുകുരത്തിൽ രസബിന്ദുവായതും
അതിതീവ്രതയാർന്ന ഭാവമാ-
യൊഴുകീ സാഗരതീരമെത്തുവാൻ
കവനംദ്രുതബന്ധിതം കരൾ
കവരുംമോഹിതപാനപാത്രമോ.?
തുടരുന്നതിശക്തമായ്  ദൃഢം
ഗ്രസനം മാനസബോധമണ്ഡലം
പുതുവാക്യതിളക്കമേറ്റയെ-
ന്നുയിരാകേ പടരുന്ന ദീപ്തിയിൽ
എരിയും കനലേറ്റു നീറവേ
പറയാം നന്ദി മഹാമനസ്കതേ!
വെയിലിറ്റു വരുന്നു നേർമ്മയാ-
യൊടുവിൽ വേർപിരിയേണ്ട നേരമായ്
ചടുലം മറയുന്ന കാഴ്ചയാ-
യിതു മാറാം പുതുതാമൊരോര്‍മ്മയായ്
മുക്തകങ്ങൾ
ഉണ്ണിക്കൃഷ്ണന്‍ ശ്രീലകം
1.മോഹനചിത്രം
പീലിത്തുമ്പഞ്ചിതാഭം തിരുകിയ ചികുരം,ചേലെഴും ഫാലദേശം,
മാലേയത്താല്‍ വരയ്ക്കുംകുറി,മധുവഴിയും ലോചനം,കൗസ്തുഭശ്രീ,
കാലിക്കോല്‍,വേണു,പീതാംബര,മരമണിയത്തൂമലര്‍ക്കൊത്തുമേവും
നീലക്കാര്‍വര്‍ണ്ണപാദങ്ങളുമകമലരില്‍ പൂര്‍ണ്ണചിത്രം രചിപ്പൂ!
2.മുത്തംനേടുന്ന പൂക്കളം
വിടര്‍ന്നമലരെന്നപോല്‍ ചിരിപൊഴിപ്പതാം പൈതലിന്‍
തുടുത്തവദനത്തൊടൊത്തിവിടെയേതഹോ പൂക്കളം!
പടുക്കളുടെ പൂവിടല്‍ പ്രിയമിണക്കുമെന്നാകിലും 
കൊടുക്കുമൊരുമുത്തമാശിശുമുഖത്തുതാന്‍ മാബലി.
3.ഒരുക്കം
പതിരു ചികയുവോളം വീണ്ടുമുണ്ടത്രയെന്നാല്‍
കതിരുതിരയുവാനായോങ്ങിടാം, ജീവിതത്തില്‍;
അതിരുവരുമതിന്‍മുന്‍പൊന്നുതീര്‍പ്പാക്കിയെന്നാ-
ലതിനു ചിതമെഴുംപോല്‍ശേഷഭാഗത്തൊരുക്കാം!
4.നിസ്സാരനോ?
വന്ദിക്കുന്നിതെറുമ്പിനെ, ക്ഷമതവി,ട്ടാലസ്യമാളുന്നൊരീ-
മന്ദന്നുള്ളുണരുന്നതിന്നുതകുവാന്‍, പയ്യെന്നു നുള്ളില്ലയോ!
ഇന്ദുശ്രീകലയാര്‍ന്ന നാഥനു സമം,ചിന്തിക്കുകില്‍ക്ഷുദ്രനും
വന്ദ്യന്‍,വന്നുവിപത്തൊഴിയ്ക്കുമവനും,നിസ്സാരനാരിങ്ങഹോ!
5.പേടി
സൗവര്‍ണ്ണാഞ്ചിതകാല്യസൗഭഗമെനിയ്ക്കാസ്വാദ്യമാണത്രമേല്‍
സര്‍വ്വോത്തേജകമായുണര്‍ച്ചപെരുകും മദ്ധ്യാഹ്നവും കൂട്ടിടാം;
ഭാവോത്കൃഷ്ടതയേറെയെങ്കിലുമഹോ രാവിന്‍ പുറപ്പാടിനായ് 
നോവേല്ക്കുന്നൊരു സന്ധ്യയെക്കൊതിയൊടെക്കാക്കാന്‍ മടിക്കുന്നുഞാന്‍
ഒരു കവിയുടെ സന്ദേഹം
രമേശൻ തമ്പുരാൻ
നീലാരമ്യവനാന്തരങ്ങളിൽ വസന്തശ്രീ പടർന്നീടവേ
മാലാറ്റും മലയാചലക്കുളിരുമായെത്തുന്നു മന്ദാനിലൻ
ചേലാളും കവികോകിലങ്ങളിവിടെപ്പാടിത്തിമിർക്കുമ്പൊളെൻ
ലോലാലാപമൃദുസ്വനങ്ങൾ പുറമേ വേറിട്ടു കേട്ടീടുമോ?
തോണിക്കാരനും സുന്ദരിയും
ഡോ. ആർ. രാജൻ 
(ഒരു ഇംഗ്ലീഷ് കവിതയോടു കടപ്പാട്)
തോണിക്കാരാ കടത്തേണം
അക്കരയ്ക്കെന്നെ നീ ജവാൽ
പെണ്ണേ പൈസ തരാൻ നിന്റെ
കയ്യിലുണ്ടെങ്കിലേറുക
ഉണ്ടെന്നു മാത്രമോ നല്ല
നീലലോചനയാണു ഞാൻ
ആകയാലക്കരയ്ക്കിപ്പോൾ
വേഗമെന്നെക്കടത്തുക
ലോചനം നീലയായാലും
അല്ലെന്നാകിലുമൊപ്പമാം
പൈസയുള്ളതിനാൽ മാത്രം
കടത്താം നിന്നെയക്കരെ 

 

ലജ്ജാലു
ശ്രീജ കാവനാട്
ഓണപ്പാട്ടുകൾ മൂളി വന്നു കളിവാക്കൻപോടു തൻ കാതിലാ -
യീണത്തോടെ മൊഴിഞ്ഞിടുന്ന വിരുതൻ മന്ദാനിലന്നേകുവാൻ
നാണത്തിൻ കുളിരാണ്ട സുസ്മിതരസം  ചേർത്തങ്ങു നീ തീർത്തതാം
ചേണഞ്ചുന്നൊരു കാവ്യ മെത്ര മധുരം ലജ്ജാലുവാം ശാലിനി !

 

വന്നല്ലോണം
സുബ്രഹ്മണ്യൻ കുറ്റിക്കോൽ 
ചിന്നിച്ചിന്നിപ്പെയ്യുന്നൂ 
ചന്നം പിന്നം ചിങ്ങമഴ 
തെന്നിത്തെന്നിപ്പായുന്നൂ 
പുന്നെൽപ്പാടത്തൊരു തെന്നൽ  
വന്നല്ലോണം പൊന്നോണം 
എന്നല്ലോതീ നെല്ലിപ്പൂ 
ഒന്നാണേവരുമെന്നല്ലോ 
ചൊല്ലുന്നെന്നും ചെത്തിപ്പൂ.
ചെന്നീയോണപ്പൂക്കളവും 
ചേലായൊന്നു ചമച്ചീടാൻ 
എന്നേ കാവലിരിപ്പാണേ 
ചെണ്ടുമല്ലികൾ ചെമ്പകവും 
പൊന്നോണത്തിനു സദ്യയ്ക്കായ് 
പൊന്നുംവെള്ളരി വെണ്ടയ്ക്കാ 
നന്നായ്മൂത്തൊരു നേന്ത്രയ്ക്കാ 
ഇളവൻ, കുമ്പള, മത്തങ്ങാ 
നാടൻപാവൽ, പടവലവും 
പുന്നെല്ലരിയുമടുപ്പത്തായ് 
ഉരുളിയിലായ് പാൽപ്പായസവും 
പൊള്ളനിറഞ്ഞൊരു പപ്പടവും
വന്നൂ ഗന്ധമടുക്കളയിൽ 
ഒന്നായ് നാവിൽ കൊതിയൂറി
ചെന്നൂ കുട്ടികൾ കൊതിയോടേ 
എന്നാൽ മുത്തശ്ശി ചൊന്നല്ലോ 
നന്നായൊന്നു കുളിച്ചുവരൂ
നൽകാം പുത്തരി പൊന്നോണം.
ഓണം
പി.എൻ.വിജയൻ
ഒരു പഴയസങ്കല്പം പാളസാറുടുത്തെത്തിയ 
കപ്പടാമീശയും കുടവയർമേൽമുണ്ടും കുടയും കിരീടവുമല്ല ഓണം.
ഉണ്ടായതെല്ലാമടക്കിഭരിച്ചതിന്നാട്ടപ്പിറന്നാളിനൂട്ടല്ല ഓണം
ഉണ്ടായതിൻ മോളിലുണ്ടാക്കി വെച്ചപ്പൊളുണ്ടായൊരൂറ്റത്തി
നാററിക്കുറുക്കിയോരോമനപ്പേരല്ല ഓണം .
ഒക്കെയടക്കിമടക്കിവെച്ചപ്പോഴുമെല്ലാമെടുത്തുകൊടുത്തു 
ജയിച്ചൊരു നാക്കിന്റെ വാക്കിന്റെ യൂക്കല്ല ഓണം.
ഒന്നാണുഭൂമിയുംസ്വർഗ്ഗപാതാളവുമെന്നതിരിച്ചറിവാറി
ത്തണുത്തതിൽ പേരല്ല ഓണം.
മൂന്നായ്ക്കിടന്നവയൊന്നാക്കിവെച്ചതിലൊറ്റക്കരത്തിന്റെയൊന്നായ
ശക്തിയിലൊക്കെയുംതാനെന്നതോന്നലിലൂന്നിയ
ഒന്നിന്റെ പേരല്ല ഓണം.
ഒന്നളന്നൊക്കെയെടുത്തു നില്ക്കുമ്പൊഴും ഇല്ലെന്നു 
ചൊല്ലാത്തസത്യമാണ് ഓണം.
ഒക്കെക്കൊടുത്തിട്ടുമൊക്കെയെടുത്തിട്ടുംബാക്കിയുണ്ടായതിൽ 
നേരാണ് ഓണം.
ഒക്കെഭരിച്ചതുംഒക്കെനയിച്ചതും ഒക്കെയുപേക്ഷിച്ചു താണുകൊടുത്തതും 
ഓർമ്മിച്ചുപാടുന്ന പാണന്റെ പാട്ടിന്റെയീണമാണ് ഓണം.
ഓരോതിരുവോണനാളിലുമെത്തുന്നഭൂമിതൻദാനപ്പെരുമതൻ 
കൂപ്പുകയ്യാണ് ഓണം.
സ്വർഗ്ഗത്തെക്കാളുമുയർന്ന മഹീതലംമകുടമഴിച്ചമഹനീയനയുടെ
മാനവശീലത്തിൽ വിളംബരക്കൊട്ടാണ് ഓണം.
മൊത്തമവതാരതാരാപഥങ്ങളുംവേദശാസ്ത്രങ്ങളുംനിഷ്പ്രഭമാവുന്ന 
മാബലിമന്നന്റെ മൗലിപ്പെരുമതൻ മാറാപ്പൊരുളിന്റെ അത്തം മുതലുള്ള 
പത്താം തിളക്കത്തിൻ പൂത്തിരുനാളാണ് ഓണം
ഈശ്വര വന്ദനം
വിനോദ് വർമ്മ
നിന്നെ ഞാൻ കാത്തിടാം നിത്യവും, കൂടെയായ്
നിന്നിടാം, നിൻ ജനത്തേയുമ, ക്കാപ്പതും
എന്നുമേ കണ്ടിടാമെന്നു തൻ ഭക്തനാം
മന്നനോടോതുമെന്നീശ്വരാ! വന്ദനം (1)
തൻ കരുത്താലെ താൻ നേടിയീക്കാലമീ
മുന്നിലിക്കാണ്മതെന്നോർത്തു വാണീടവേ
വന്നണഞ്ഞൊക്കെയും മാറ്റിടും കാലമായ്
വന്നിടും വാമനാകാരമേ വന്ദനം! (2)
  
കണ്ടുനിൽക്കുമ്പൊഴേ വിസ്മയാകാരമുൾ -
ക്കൊണ്ടുപൊങ്ങുന്നതാം വിക്രമാകാരവും
കണ്ടതാരാ, മഹാഭാഗ്യമീവാഴ്വിലാർ -
ക്കുണ്ടു നിൻ ഭക്തരായുള്ളവർക്കെന്നിയേ (3)
  
നിൻ മഹത്വത്തെയാരുണ്ടു കാണുന്നതാ
മന്നവൻ കണ്ടപോൽ, നാകലോകത്തെയും
വെന്നിടും മട്ടിലായുള്ളലോകത്തെയാ
മന്നനായേകിയല്ലേ ഹരേയന്നു നീ (4)
  
തന്റെയെന്നോർത്തതും മുന്നിലായെന്നുമീ
മന്നിലായ് കണ്ടതും തന്നെയും തന്നെയും
സന്തതം വിഷ്ണുപാദങ്ങളിൽ ചേർത്തുവാ-
ഴുന്നതാം മന്നനായെന്നുമെൻ വന്ദനം (5)
  
അന്യനായില്ല പോലാരു, മിങ്ങേവരും
സ്വന്തമാണെന്നുകണ്ടീടുമാതമ്പുരാൻ
എന്നുമെല്ലാർക്കുമേ സർവ്വസന്തോഷവും
വന്നിടാൻ വേണ്ടപോൽ കാക്കണം സന്തതം (6)
  
ഭക്തി തൻ ശക്തിയും, ഭക്തവാത്സല്യവും
മുക്തിയും, വ്യക്തമായോതിടും ലീലകൾ
നിത്യവും കാട്ടിടും വാമനാകാരമായ്
ഹൃത്തടേ വാഴുമെന്നീശ്വരാ! വന്ദനം (7)
  
സത്യമേ! മുന്നിലായ് മിന്നിനിൽക്കുന്നിതാ
വ്യക്തമായ് ലോകമാ, യെന്നഹന്താവിഷം
തീർത്തിടും വിക്രമാകാരമായേവമാ-
യെത്തിടും ഭക്തവാത്സല്യമേ വന്ദനം ( 8 )
മുക്തകങ്ങൾ
അത്തിപ്പറ്റ രവി
ചുടലയോളം
എന്നോ തോഴരൊടൊത്തു പൂവിളിയുയർ-
ത്തെൻ നാട്ടിലെല്ലാടവും
ചെന്നോരോ മലരങ്ങുനുള്ളിയവയാൽ
പൊൽപ്പൂക്കളം തീർക്കവേ,
കുന്നോളം പരിതോഷമുണ്ടതിതുനാ-
ളോർക്കാൻ തുണച്ചെത്തുമി-
പ്പൊന്നോണപ്പുലർകന്യയെപ്പുണരുവേ-
നായുസ്സു മായും വരെ.
മലയാളം
അലയാഴിതന്നിലലമാലയേന്തിടും
നിലയായ് മനസ്സു കവനാർദ്രമാകുവാൻ,
കലയാമി നിൻ പദസരോജമെന്നുമെൻ
മലയാളമേ, മധുര മഞ്ജുഭാഷിണി!
ഓണം
ഗീത വാസുദേവന്‍ 
കാണം വിറ്റോണമുണ്ടീടണ, മിതി പഴമക്കാരു പണ്ടോതിയെന്നാല്‍
ക്കാണില്ലാ തെല്ലുപോലും  , പടുദുരിതമെഴുന്നോരെയിക്കാലമെന്നായ് 
വേണം വൈവിദ്ധ്യമാര്‍ന്നും വിഭവസഹിതമാഹാരമെന്നെന്നുമല്ലോ 
കാണുന്നൂ നമ്മളിപ്പോള്‍,കെടുതികള്‍പലതുണ്ടാകിലും മാന്ദ്യമെന്യേ
പാടുന്നു പൂക്കൾ!
ശ്രീ ദാസ്
മാവേലിക്കും മനസ്സിൻ ഭ്രമണമതറിവാർന്നീലയോ ! കാലമൊന്നിൽ -
പ്പാവോലും മാനുഷപ്പൊൻ നിറമലരൊഴുകും പൊയ്ക പോലുള്ളതല്ലേ!
കാവാകും ചിത്തവൃത്തിക്കൊരു നിയതിയഹോ! നിർമലാനന്ദമാടും
ഗോവിന്ദൻ കാട്ടുമോണപ്പുലരിയിലൊരുമപ്പാട്ടു പാടുന്നു പൂക്കൾ!
ഓർമ്മയിലെ ഓണം
പീതാംബരൻ നായർ
ചിങ്ങം പിറക്കുമളവമ്മ പുരയ്ക്കു ചുറ്റും
തങ്ങുന്ന പുല്ലു മുഴുവൻ ചിതമായ് പറിക്കും;
പൊങ്ങുന്ന പാഴ്ച്ചെടികൾ വെട്ടിയെറിഞ്ഞു മുറ്റ-
മങ്ങിങ്ങു ചെത്തി വടിവോടു നിരപ്പിലാക്കും. 
മുറ്റത്തു, വാതിലിനു നേരെ,യൊരല്പഭാഗം 
പറ്റേയടിച്ചു കഴുകീ, മെഴുകിപ്പരക്കെ;
തെറ്റെന്നു തീർക്കുമവിടെക്കളമൊന്നു, മുറ്റം
നെറ്റിക്കണിഞ്ഞ നലമാമൊരു പൊട്ടു പോലെ. 
അത്തത്തലേന്നു പല കുട്ടികളൊത്തു നാടു
മൊത്തം നടന്നു കുസുമങ്ങളിറുത്തു ഞങ്ങൾ;
അത്തം മുതൽക്കനുദിനം 
നറുപുക്കളങ്ങൾ
തീർത്തുല്ലസിച്ചു വിളയാടി രസിച്ചു പാരം.
ഉത്രാടരാത്രിയിലുറക്കമൊഴിച്ചു നാലും
വച്ചീടുമമ്മ തിരുവോണദിനേ ഭുജിക്കാൻ;
അച്ഛൻ സഹായമരുളും കഷണം നുറുക്കി-
ക്കൊണ്ടും, തഥാ ചെരുകി തേങ്ങ,യരച്ചു,മൊക്കെ.
പൊന്നോണനാളിലിനനെത്തുവതിന്നു മുമ്പേ 
നന്നായണി,ഞ്ഞില നിരത്തി കളത്തിലെങ്ങും;
തൃക്കാക്കരപ്പനെയൊരുക്കിയിരുത്തി മല്ലി-
പ്പൂ കുത്തുമത്തലയിലും തനുവിങ്കലെല്ലാം.
താതൻ കുളിച്ചുവരുമീറനുടുത്തുകൊണ്ടു
മോദാൽ മുറിക്കുമൊരു വെട്ടിനു നാളികേരം;
നേദിച്ചു വയ്ക്കുമട, പൂജ ജപം നടത്തു,-
മാദിത്യനെത്തൊഴുതുകൊണ്ടു വിളിക്കുമാർപ്പ്.
കാലേ കുളിച്ചു വരുമേവരു,മച്ഛനേകു-
മേവർക്കുമേ പുടവ, പുത്തനുടുപ്പു,മപ്പോൾ; 
ചാലേയണിഞ്ഞവ വരുന്നളവമ്മ നൽകും
പ്രാതൽ - പ്പുഴുങ്ങിയ പഴം, വട, കാപ്പി,യാദി.
ഊഞ്ഞാലിലാടി, പല കേളികളാടി,യോടി,-
ച്ചാടിത്തിമിർത്തു, മണി പത്തു കഴിഞ്ഞിടുമ്പോൾ;
മാവേലി മന്നനിലവച്ചു തുടങ്ങുമൂണു
കേമം, പലേ വിഭവമൊത്ത സമൃദ്ധസദ്യ!
കുമ്മാട്ടി, കോൽക്കളി, പുലിക്കളിയെന്നതെല്ലാം
കണ്ടുല്ലസിക്കുമഥ ബാലിക ബാലവൃന്ദം;
അച്ഛൻ കളിപ്പതിനു ശീട്ടു പുറപ്പെടും, കൈ-
കൊട്ടിക്കളിപ്പതിനു തായയുമങ്ങു പോകും.
ഇന്നച്ഛനില്ല, മമ തായയുമില്ല, കൂടെ,-
ച്ചെന്നെത്തി വാണിടുകയാണു സുരപ്പുരത്തിൽ;
വന്നന്യനാട്ടിലലയുന്നിവനെത്ര കഷ്ട-
മിന്നന്യമായി തിരുവോണമഹോത്സവം മേ.
ഓണവും ഓർമ്മകളും
ജീന സോണി
വയലുകളിൽ കൊയ്ത്തു കഴിഞ്ഞേ
മിഴിയിണയിൽ കനവു നിറഞ്ഞേ
തിരുവോണപുലരിയ്ക്കായി
തുമ്പപ്പൂ കാത്തിരുന്നേ.....
മുറ്റത്തെ മാവിൻ കൊമ്പിൽ
ഊഞ്ഞാലേൽ ആടി കൊണ്ടേ
പൂത്തുമ്പി പെണ്ണാളെന്തോ
കിന്നാരം ചൊല്ലുന്നുണ്ടേ....
പൊന്നോണപൂക്കളത്തിൽ
മുക്കുറ്റി പൂവിടാനായ്
പൂക്കുടയേന്തിയെത്തും
അഴകാർന്നൊരോണക്കാലം.....
മഴമുകിലും മായുംനേരം
ഉത്രാട സന്ധ്യയിലായ്
ചിങ്ങനിലാവു പോലെൻ
ഓർമ്മകൾ തെളിയുന്നുണ്ടേ.....
ദുഷ്കരം!
ദേവദാസ് മായന്നൂർ 
ജില്ലാദ്ധ്യക്ഷനുറപ്പു ത,ന്നിനിമുതൽ
പ്പൊട്ടിപ്പൊളിഞ്ഞുള്ളതാ-
മെല്ലാവീഥികളും നമുക്കു ബലമാം
ടാറിട്ടു നിർമ്മിച്ചിടാം
തല്ലായ് കോഴയിലായൊടുങ്ങി, ‘നിയമം’
നോക്കാതെ തൻനാവിനാൽ
ച്ചൊല്ലാനെത്രയെളുപ്പ,മീവിധമഹോ!
ചെയ്തീടുവാൻ ദുഷ്കരം!
ഭക്തി മുക്തകങ്ങൾ 
അനിരുദ്ധ വർമ്മ 
ശ്രീമാന്ധാംകുന്നിലമ്മേ, സകലഭുവനവും കാക്കുമെന്നമ്മയല്ലേ !
ക്ഷേമൈശ്വര്യങ്ങളെല്ലാം തരുവതിനിനിയും താമസം വേണ്ട തായേ !
കാമക്രോധാദിപീഡാ വ്യഥകളഖിലവും തീര്‍ക്കണേ ലോകമാതേ
കര്‍മ്മത്തില്‍ ബാധയേല്‍ക്കാ തനിശമിനിയെനി ക്കേകണേ ഭാഗ്യയോഗം
ചൈതന്യം കുറയാതെ ഭക്തരിലിദം കാരുണ്യവര്‍ഷങ്ങളായ്
സന്താനം, ധനവും, കുടുംബപരമാ മൈശ്വര്യവും നല്‍കുമെന്‍
മാന്ധാതാചലദേവിയിന്‍ തിരുപദം കാണാന്‍ വരാനാഗ്രഹം 
ചാന്താട്ടം നിറവേറുമീ സുദിനമി ന്നമ്മയ്ക്കിതെന്‍ വന്ദനം 
ശ്രീകോവില്‍ നടയും തുറന്നു പുറമേ നിൽക്കുന്ന ഭക്തര്‍ക്കുമായ്
നല്‍കാനായി വരപ്രസാദമഖിലം, ദേവീകടാക്ഷങ്ങളും
മാതാവാകിയ ദേവിയിന്നു സദയം പ്രത്യക്ഷമായീ സ്വയം
ശ്രീമാന്ധാചല വാസിനീ, ഭഗവതീ, കാത്തീടണേ സര്‍വ്വദാ
ശ്രീമാന്ധാചലവാസിനീ, കരുണ തന്‍ കേദാരമാമീശ്വരീ
ഹേമാംഭോജസുമങ്ങളാല്‍ ശതശതം മാല്യങ്ങളും കോര്‍ത്തു ഞാന്‍
നാമം ചൊല്ലി നിരാമയേ തവപദം തന്നില്‍ച്ചൊരിഞ്ഞീടുവേന്‍
പ്രേമാഭീഷ്ട വരപ്രസാദമരുളൂ തായേ, ഭവാനീ, ശിവേ 
പ്രത്യക്ഷത്തില്‍ ഭവാനീ, തവതിരുവുടലെന്‍ മാനസത്തില്‍ തെളിഞ്ഞി-
ട്ടത്യന്തം മോദമോടെന്‍ ഹൃദയതലമിതില്‍ ഭക്തി വന്നൂ, നിറഞ്ഞൂ,
സത്യം, ഞാനെന്നുമെന്നും തവനുതികളിലെന്‍ ജീവിതം പൂര്‍ണ്ണമാക്കാ-
നത്യാഹ്ലാദത്തിലായീ കവനമിതെഴുതീ ത്വല്‍പ്പദാബ്ജത്തിലേയ്ക്കായ്
ഓണാശംസകൾ
അനിൽക്കൃഷ്ണൻ അരിയന്നൂർ
വർണ്ണ പ്രസൂനമൊരുപാടു വിരിഞ്ഞു, മേലേ
വിണ്ണിൽ തെളിഞ്ഞു മഴവില്ലൊളിയോണ നാളിൽ!
എങ്ങും സമൃദ്ധി നിറയട്ടിനിയും വസന്തം
തങ്ങട്ടെ മണ്ണിലിതുപോലഭിവൃദ്ധിയേകീ

♥♥♥

 

കവിസദസ്സ്


 

കവികളുടെ അക്ഷരശ്ലോകസദസ്സാണ്, ഇത്. അപ്രകാശിതങ്ങളായ സ്വരചിതശ്ലോകങ്ങള്‍ മാത്രം അനുവദനീയമായ ഇങ്ങനെ ഒരു സദസ്സു സൈറ്റില്‍ നടക്കുന്നു. കഴിഞ്ഞ ലക്കങ്ങളില്‍ സ്രഗ്ദ്ധര, ശാര്‍ദ്ദൂലവിക്രീഡിതം ,മന്ദാക്രാന്ത, മാലിനി, വസന്തതിലകം , രഥോദ്ധത, ദ്രുതവിളംബിതം, പുഷ്പിതാഗ്ര, മഞ്ജുഭാഷിണി, വസന്തമാലിക, വിയോഗിനി, ഭുജംഗപ്രയാതം, ശാലിനി, വംശസ്ഥം, ഇന്ദ്രവജ്ര/ഉപേന്ദ്രവജ്ര/ഉപജാതി, സമ്മത, അപരവക്ത്രം, പ്രഹര്‍ഷിണി, സ്രഗ്വിണി, സ്വാഗത, തോടകം, പഞ്ചചാമരം, ശിഖരിണി, പൃത്ഥ്വി,ശങ്കരചരിതം, ഹരിണി, മല്ലിക, കുസുമമഞ്ജരി, മത്തേഭം,ശംഭുനടനം എന്നീ വൃത്തങ്ങള്‍ അഞ്ചു റൌണ്ടു വീതം പൂര്‍ത്തിയായി.

അടുത്ത അഞ്ചു റൌണ്ടു ' ശ‍ംഭുനടനം ' വൃത്തം സ്വീകരിക്കാമെന്നു നിര്‍ദ്ദേശിക്കുന്നു.

സ്രഗ്ദ്ധര‌ വൃത്തം രണ്ടാമതും ആരംഭിക്കുന്നു.. സൈറ്റില്‍ സദസ്സു ഇപ്പോഴും തുടര്‍ന്നു കൊണ്ടിരിക്കുന്നു. 


പങ്കെടുക്കുന്ന കവികള്‍  1.അരിയന്നൂര്‍ ഉണ്ണിക്കൃഷ്ണന്‍ ,2.കൈതയ്ക്കല്‍ ജാതവേദന്‍, 3.രാമന്‍ നമ്പീശന്‍ കേശവത്ത്, 4.ശ്രീലകം വേണുഗോപാല്‍,5.വാരിയത്ത് കുട്ടി,6.അനിരുദ്ധ വര്‍മ്മ,  7.ജോയ് വാഴയില്‍, 8.ശ്രീജ പ്രശാന്ത്, 9.മധുരാജ് പി സി, 10.നാമംഗലം മാധവന്‍, 11.ആത്രശ്ശേരിശ്രീദാസന്‍, 12.ജയകൃഷ്ണന്‍, 13.ഹരിദാസ് മംഗലപ്പള്ളി, 14.ദാമോദരപ്പണിക്കര്‍ , 15.സുബ്രഹ്മണ്യന്‍ കുറ്റിക്കോള്‍, 16.രാജേഷ് വര്‍മ്മ, 17.പി എന്‍ വിജയന്‍, 18.ഗീത വാസുദേവന്‍, 19.തൃക്കഴിപ്പുറം രാമന്‍, 20.സന്തോഷ് വര്‍മ്മ, 21അനില്‍ക്കൃഷ്ണന്‍ അരിയന്നൂര്‍ 

 

2221
ഈറന്‍ കണ്ണോടു നില്പൂ ധരണി, വികൃതമാ
യൊച്ചയിട്ടാര്‍ത്തു വാനം
ചീറുന്നൂ,തപ്തദീര്‍ഘശ്വസനഗതിയുമാ
യാടി ലാത്തുന്നു തെന്നല്‍
നീറും ഹൃത്തോടു തീരാവ്യഥകളുടെ മഹാ
ഭാണ്ഡവും തോളിലേവം
പേറിക്കാലാബ്ധി താണ്ടാന്‍ മുതിരുമൊരുവനെ
ദ്ദൈവവും കയ്യൊഴിഞ്ഞോ
അരിയന്നൂര്‍ ഉണ്ണിക്കൃഷ്ണന്‍
2222
നേതാക്കന്മാര്‍ നിരത്തും പ്രചരണപരുഷ-
പ്രൌഢിയും വോട്ടെടുപ്പിന്‍
ഭൂതാവേശം തിമിര്‍ക്കും സഹചരനിരതന്‍
ധാടിയും പാര്‍ത്തിടുമ്പോള്‍
നാള്‍തോറും കൂടുമുഷ്ണം ചുടുകനല്‍ വിതറും
പാര്‍ത്തലം ചൂടുകാറ്റോ-
ടാതങ്കം കൈവളര്‍ത്തും  കഠിനതരമിദം
ഗ്രീഷ്മകാലം സഹിക്കാം.
രാമൻ നമ്പീശൻ കേശവത്ത്
2223
നാടൊട്ടുക്കും സഖാക്കള്‍ പലവിധമധമം ഗോഷ്ടികള്‍കാട്ടി വോട്ടും -
തേടിത്തേടിത്തളര്‍ന്നീ നടുവിരവിതിലും വീടുതെണ്ടാന്‍ നടപ്പൂ
പേടിക്കേണ്ടാ സുഹൃത്തേ, ചിരിയൊടെയവരോടോതിടൂ "വോട്ടു ചെയ്യാന്‍ -
പാടില്ലല്ലോ, നമുക്കാ ശബരിഗിരിയതില്‍ സ്ത്രീകളേ കേറ്റിടേണ്ടേ? "
ശ്രീലകം വേണുഗോപാല്‍
2224
പാരം ഡംഭം കലർന്നു/ള്ളരികളെയഖിലം കാലനായ്ക്കാഴ്ചവച്ചും
പാവം ദേഹം വളഞ്ഞു/ള്ളൊരുവളെയഴകിൻ റാണിയായ് മാറ്റിയിട്ടും
പാപം ചെയ്തുള്ള ഭൂമീ/സുരനു കരുണയാൽ മോക്ഷവും നൽകി, ലോകം
പാലിച്ചീടുന്ന വിശ്വേശ്വ/ര! തവ കരുണ/യ്ക്കിന്നുഞാൻ കേണിടുന്നൂ
ഋഷി കപ്ലിങ്ങാട്
2225
പൂവേ,കൊന്നേ! വരുന്നൂ വിഷു,വൊരു ദിനമേ ബാക്കിയുള്ളൂ, തിരക്കായ്
ത്തേടുന്നൂ നിന്നെ, വെയ്ക്കാൻ കണിയതിലഴകായ് വെള്ളരിയ്ക്കക്കു മേലായ്.
പോയല്ലോ പാടമെല്ലാം, വിളവുകൾ വിഷമായ് മാറിടും കാല,മെന്നാൽ
ഞാനിന്നും കാത്തിരിപ്പൂ വിഷുവിനു കിളിയേ നിന്റെയൊച്ചയ്ക്കുവേണ്ടി.
ജ്യോതിർമയി ശങ്കരൻ
2226
പീലിത്തുമ്പഞ്ചിതാഭം തിരുകിയ ചികുരം,
ചേലെഴും ഫാലദേശം,
മാലേയത്താല്‍ വരയ്ക്കുംകുറി,മധുവഴിയും
ലോചനം,കൗസ്തുഭശ്രീ,
കാലിക്കോല്‍,വേണു,പീതാംബര,മരമണിയ-
ത്തൂമലര്‍ക്കൊത്തുമേവും
നീലക്കാര്‍വര്‍ണ്ണപാദങ്ങളുമകമലരില്‍
പൂര്‍ണ്ണചിത്രം രചിപ്പൂ!
ഉണ്ണിക്കൃഷ്ണന്‍ ശ്രീലകം
2227
കൊട്ടിഗ്ഘോഷിക്കുമല്ലോ യുവതലമുറതൻ പ്രതിനിദ്ധ്യം വളർത്താൻ,
കിട്ടീടാൻ നാരികൾക്കും സഭകളിലിനിമേൽ മുന്നിലൊന്നെന്ന വീതം
ഒട്ടെല്ലാപ്പാർട്ടിയും താൻ;പടുകിഴവരുമേ സ്വന്തമായ് വിട്ടു പോകാൻ
കൂട്ടാക്കി, ല്ലായവക്കായ് നിയമമുടലെടുക്കാതെ കാക്കും മിടുക്കർ.
തൃക്കഴിപ്പുറം രാമന്‍
2228
ഓരോരോവോട്ടിനായി ട്ടിനിയൊരുവരവെന്‍ നാട്ടിലേക്കും വരുന്നു-
ണ്ടോരോസ്ഥാനാര്‍ത്ഥിയിന്നും തൊഴുകരസഹിതം കുമ്പിടും കാഴ്ച്ച കണ്ടാല്‍
ആരോ ചെയ്തോരു പാപം മുഴുവനുമിവനെ ത്തേടിയെത്തുന്നതാണോ !!
നേരോതാനല്‍പ്പമാത്രം ക്ഷമ, വിനയ, ഗുണം നേടുവാനായതില്ലേ ?
അനിരുദ്ധ വർമ്മ
2229
ആരണ്യത്തിൽ ജയിപ്പൂ ചെറിയവർ വലിയോർ-
ക്കന്നമാം കാട്ടുനീതി,
പാരാവാരം ഭരിപ്പൂ നിശിതമുനയെഴും
സ്രാവു തൻ മത്സ്യനീതി.
നേരായ് മർത്ത്യൻ ശ്രമിപ്പൂ ഭരണഘടനയാൽ
സർവ്വനീതിയ്ക്കുമാ,യ-
ന്നേരം നല്കേണ്ടതല്ലേ ധരയിലഖിലജീ-
വിയ്ക്കുമാ സൗഖ്യമല്പം?
ജോയ് വാഴയിൽ
2230
നാടൊട്ടാഘോഷമായീ,  ബഹുജനമണിയായ് വോട്ടുചെയ്തിട്ടിറങ്ങീ
ചൂടായ്ചൂണ്ടാണിതന്മേൽ പടരുമൊരുമഷിച്ചിത്രവുംകാട്ടി നിൽപ്പൂ
വാടും കൊന്നയ്ക്കുനൽകാനൊരുകുടമമൃതും കൊണ്ടു വന്നെത്തി മേഘം
പാടും പയ്യാരവും താൻ പതിവുപടിയിനി പെയ്തിറങ്ങും നിനച്ചാൽ.
ശ്രീജ പ്രശാന്ത്
2231
വാണാല്‍ വാഴട്ടെ, വാഴാന്‍ കൊതിയെവനു വരില്ലാഢ്യനായ് ജഡ്ജിപീഠേ
വാണാപ്പെണ്‍കുട്ടികള്‍ക്കായ് മെഡലുകളഖിലം വാരിയങ്ങോട്ടു നല്‍കും
നാണക്കേടാണൊഴിക്കേണ്ടതു, ബുധവരരേ, യക്ഷരശ്ലോകമെന്നാ-
ലേണാക്ഷീമൗലിമാര്‍ തന്‍ ശ്രവണമധുരമാം പാട്ടുകച്ചേരിയല്ല.
ഡോ :രാജൻ
2232
നൂറ്റാണ്ടിൻ പാപഭാരം തലമുറകളിലൂ-
ടെന്നിൽവനെത്തിനില്പു-
ണ്ടേറ്റാൻ പറ്റാത്തവണ്ണംവലിയൊരുചുമടായ്,
ത്താങ്ങി നീങ്ങാൻ പ്രയാസം;
അറ്റം കാണാത്തകായൽച്ചുഴികളിലിടറി-
ക്കാലുറക്കാത്ത പാന്ഥ-
ന്നൊറ്റക്കൈത്താങ്ങുപോരും കരയിലണയു വാൻ ,
നല്കമോ നീ സഹായം
ദാമോദരപ്പണിക്കര്‍
2233
ആഗോളംതന്നിലേഴുണ്ടവനു വസതികൾ ഭൌമസ്വർഗ്ഗങ്ങൾതോറും 
ഭൂഗോളം ചുറ്റിടാനായ് ഗഗനശകടവും കാറുകൾ, നൌകവീടും
ഭോഗത്തിന്നിഷ്ടധാമം, ഭുവനകമനികൾ, ഭോജ്യപേയങ്ങൾ, പക്ഷേ 
രോഗാവാസം ശരീരം, ദുരകൾ പെരുകിലും ജീവിതം തീര്ന്നുപോയി!
സുബ്രഹ്മണ്യന്‍ കുറ്റിക്കോല്‍ 
2234
ഭക്ത്യാവേശത്തൊടെന്നും തൊഴുതിടു, മതിനെപ്പൂജചെയ്യും, സ്തുതിക്കും,
മൂർദ്ധാവിൽച്ചേർത്തുനിൽക്കും, പരിമൃദുലപടംകൊണ്ടു പൊന്നാടചാർത്തും,
പേർത്താരാനും ദുഷിച്ചാലവരുടെ രുധിരം വീഴ്ത്തുമെന്നാൽ തുറക്കി,-
ല്ലൊട്ടും വായിക്കയില്ലപ്പല മഹിമ പെറും പുസ്തകം ഭക്തവര്യൻ.
രാജേഷ്  ആർ വർമ്മ
2235
പാരാവാരം കലിപ്പോടലറിയിളകി ,വന്‍ കോളിളക്കത്തൊടെത്തി- ,
ത്തീരാനഷ്ടം പിണഞ്ഞോരഗതികളിവിടുണ്ടിപ്പൊഴുംനിസ്വരായോര്‍
ഓരാതീപ്പേരി ലേറെദ്ധനമതു പലമാര്‍ഗ്ഗേ പിരിച്ചങ്ങെടുത്തോ- 
രാരെന്നാരാഞ്ഞു കണ്ടെത്തുക ബഹു വിഷമം , ദുര്‍വ്യയം തന്നെ സര്‍വ്വം!
ഗീത വാസുദേവന്‍ 
2236
ഓർമ്മച്ചെപ്പിൽ പുരാ ഞാൻ പലതരമിയലും
വർണ്ണജാലങ്ങളാലേ
നിർമ്മായം തീർത്തുവെച്ചൂ പ്രണയിനി! ഭവതിക്കുള്ള
ലാവണ്യരൂപം
കർമ്മത്തിൻ ദോഷഭാവാൽ പിരിയുവതിനു താൻ
യോഗമെന്നാകിലും ഹാ!
ധർമ്മം തെറ്റാതെ ചെയ്‌വൂ മമ മനമതിൽ നീ
മാഞ്ഞതില്ലോമലാളേ!
സന്തോഷ് വര്‍മ്മ‌
2237
കൂടേപ്പാറിപ്പറക്കാൻ ചിറകുകളിനിയും
നീർത്തി നീ വന്നതില്ലാ
പാടും നേരത്തു ചാരേ നടനവിരുതുകൾ
കാട്ടിയൊന്നാടിയില്ല
തേടുന്നൂ പിന്നെയും ഹാ! മധുര മൃദുലമാം
നിൻസ്വനം കാതിലിന്നൊ-
ന്നോടപ്പുൽത്തണ്ടിനീണം പകരുമരിയൊരാ
ഗീതിയായ് കേൾക്കുവാൻ ഞാൻ
അനില്‍ക്കൃഷ്ണന്‍ അരിയന്നൂര്‍

 

♥♥♥ 

സമസ്യ 

(സൈറ്റില്‍ കൊടുക്കുന്ന സമസ്യകളും പൂരണങ്ങളും )

 

സമസ്യ നമ്പർ 306
ഭരണമൊരു വിപത്താണോര്‍ക്കണം ശ്രദ്ധ വേണം
സമസ്യാകാരൻ : ശ്രീലകം വേണുഗോപാല്‍
വൃത്തം : മാലിനി
1
ഗിരിതനയ വിവാഹത്തിന്‍റെ ശേഷം സതോഷം
ഹരഗൃഹമതിലേക്കായ്‌ പോകവേ മേനയോതി
വരനതിഗുണവാനാണെങ്കിലും മെയ്യില്‍ നാഗാ-
ഭരണമൊരു വിപത്താണോര്‍ക്കണം ശ്രദ്ധ വേണം. 
ഡോ രാജന്‍
2
ഹരിഹരസുതനേ നിൻ ബ്രഹ്മചര്യാവൃതങ്ങൾ
 തെരുവിലലയുവോരാൽ തച്ചുടച്ചീടുവാനും, 
ഇരവിലു മറതീർത്തും, കാവലായ്‌ നിന്നിടുമ്പോൾ
 ഭരണമൊരു വിപത്താണോർക്കണം ശ്രദ്ധ വേണം 
വിജയകുമാർ മിത്രാക്കമഠം
3
കരുണയൊരു തരിമ്പും കാണൊലാ, കാട്ടിലയ്യോ
കളയുമളവിലാരും പത്നിയെന്നോർത്തിടേണ്ടാ
സരയുവിലവസാനം, സങ്കടം, വൻ കടം താൻ
ഭരണ; മൊരു വിപത്താണോർക്കണം ശ്രദ്ധവേണം.
മോഹനന്‍ കാരണത്ത്
4
കരുതുക ഖലര്‍ മുന്നില്‍ ധാര്‍ഷ്ട്യമോടെത്തി രാവില്‍
വിരുതൊടെ കവരുന്നീ സ്വര്‍ണ്ണസമ്പാദ്യമെല്ലാം
ധരയിതിലിവ സര്‍വ്വം ജീവനാപത്തു, തങ്കാ -
ഭരണമൊരു വിപത്താണോര്‍ക്കണം, ശ്രദ്ധ വേണം
ശ്രീലകം വേണുഗോപാല്‍
സമസ്യ നമ്പർ 307
പൊതുജനം പടുവിഡ്ഢികളല്ലയോ
സമസ്യാകാരൻ : ഗീതവാസുദേവന്‍
വൃത്തം : ദ്രുതവിളംബിതം
1
അതിനയത്തൊടു മന്ത്രിപദത്തിനാ-
യതിരെഴാക്കൊതിയുള്ളിലുയര്‍ത്തുവോര്‍
പുതിയസഖ്യമിണക്കി ഭരിക്കുകില്‍
പൊതുജനം പടുവിഡ്ഢികളല്ലയോ !
രാമൻ നമ്പീശൻ കേശവത്ത്
2
ചിതറിടും പലചിന്തകളൊക്കവേ
ദ്രുതവിളംബിതമായിഭവിപ്പതു?
ഇതിനെയും മുറപോലെ മറന്നിടും
പൊതുജനം പടുവിഡ്ഡികളല്ലയോ!
കുട്ടൻ ഗോപുരത്തിങ്കൽ
3
പൊതുജനത്തിനു നല്‍കണമാശയി
ങ്ങധിക വോട്ടുകള്‍ പെട്ടിയില്‍ വീഴുവാന്‍
അതിനു ശേഷമതൊക്കെ മറന്നിടാം
പൊതുജനം പടുവിഡ്ഢികളല്ലയോ?
ഡോ രാജന്‍
4
പലതരത്തിലതിക്രമമെത്രയും
ഭരണവാഞ്ഛയില്‍മന്ത്രികള്‍ചെയ്കിലും
വളരെവേഗമതൊക്കെ മറന്നിടും
പൊതുജനം പടുവിഡ്ഢികളല്ലയോ
ശ്രീകല നായർ
5
പതിവുപോലെ മനോഹരവാക്കുകള്‍
പതിയെവന്നു ചൊരിഞ്ഞിത മുന്നിലായ്
പതിരുതന്നെയതെന്നറിയാത്തൊരീ
പൊതുജനം പടുവിഡ്ഢികളല്ലയോ.
ശ്രീലകം വേണുഗോപാല്‍
6
അനുദിനം പുതു വാര്‍ത്തപരത്തിടും
കനമെഴുന്നൊരു മാദ്ധ്യമസൃഷ്ടികള്‍
അണുവിടാതെ ചവച്ചു വിഴുങ്ങുമീ-
പൊതുജനം പടുവിഡ്ഢികളല്ലയോ
ഗീത വാസുദേവന്‍
7
പലവിധത്തിലുമായടികൊള്ളിലും
തരിയുമേകഥകൈവരുകില്ലയോ?
കഴുതയെന്നു കഥിച്ചിടുമെപ്പൊഴും
പൊതുജനം പടുവിഡ്ഢികളല്ലയോ?
ജ്യോതിർമയി ശങ്കരൻ

 

 

 

കാവ്യകേളി


(ഭാഷാവൃത്തകവിസദസ്സ് )

ഭാഷാവൃത്തത്തിലുള്ള സ്വരചിതങ്ങളായ കവിതാഖണ്ഡങ്ങള്‍ കവികള്‍ കാവ്യകേളിയുടെ നിയമമനുസരിച്ചു പോസ്റ്റു ചെയ്യുന്ന സദസ്സാണ് ഇത്. ഇതില്‍ പങ്കെടുക്കുന്ന ഏഴു കവികള്‍ ഈ ക്രമത്തിലാണ്, ഇരിക്കുന്നത്:

1.അരിയന്നൂര്‍ ഉണ്ണിക്കൃഷ്ണന്‍ , 2..രാമന്‍ നമ്പീശന്‍ കേശവത്ത്, 3. ശ്രീലകം വേണുഗോപാല്‍, 4.അനില്‍ക്കൃഷ്ണന്‍ അരിയന്നൂര്‍ ,  5.  ഉണ്ണിക്കൃഷ്ണന്‍ ശ്രീലകം 6. തൃക്കഴിപ്പുറം രാമ‍ന്‍ 7. സന്തോഷ് വര്‍മ്മ

ഈ സദസ്സ് 01-01-2013 നു ആരംഭിച്ചു

 

872
ദൂരെഗ്ഗഗനത്തില്‍ മിന്നിത്തിളങ്ങുന്ന‌
താരകക്കൂട്ടത്തില്‍ നിന്നൊരെണ്ണം
എന്‍റെ നേര്‍ക്കെന്തിനോ നോക്കിച്ചിരിയ്ക്കയാ
ണെന്തോ പറയുവാന്‍ വെമ്പിടും പോല്‍
പാതി വഴിയ്ക്കു നീ വിട്ടൊരീ ജീവിത‌
പ്പാതയില്‍ സ്തബ്ധനായ് നില്‍ക്കുമെന്നെ
കണ്ടു ചിരിയ്ക്ക്കുന്നതാണെന്നു തന്നെ ഞാന്‍
കണ്മണി! ആശ്വാസമേറ്റിടട്ടെ
അരിയന്നൂര്‍ ഉണ്ണിക്കൃഷ്ണന്‍
873
പൊന്നില്‍കുളിക്കും വിഷുവിന്നു ദേവിതന്‍
മുന്നില്‍ തുലാഭാരത്തട്ടിലേറി
തന്നെത്താന്‍ തൂക്കീടും പോരാളി തന്‍ ശിര -
സ്സമ്പോ തകര്‍ന്നതും കഷ്ടമല്ലോ
തുന്നലുംകെട്ടലുമൗഷധസേവയും
വന്നീടും പോരിങ്കല്‍ സങ്കടം താന്‍
മൂന്നാംതവണയുമങ്കം കുറിച്ചതാ -
മന്യായമമ്മ സഹിക്കുന്നീല
രാമന്‍ നമ്പീശന്‍ കേശവത്ത്
874
തൊടിയിലായ് നില്‍ക്കുന്നൊരരിമുല്ലപ്പൂവിന്‍റെ
ചൊടിയില്‍ നിന്നുയരുന്നതാമോ ?
"പരിമളമാവോളമേകിടും ഞാന്‍ നിന്‍റെ
രചനയില്‍ വിരിയാന്‍ കൊതിപ്പൂ"
വിടരുന്ന സൂര്യകാന്തിപ്പൂക്കള്‍ ഭ്രാന്തമായ്
ഉരുവിട്ടിടും സ്വരമാണോ ?
"അരുണന്‍റെ കരപരിലാളനം കാത്തിടും
വിരഹി ഞാന്‍ എന്‍ വ്യഥയോര്‍ക്കൂ
ശ്രീലകം വേണുഗോപാല്‍
875
വഴികളൊക്കെയും ശൂന്യമായ്, കൂരിരുള്‍
പൊഴിയുമീരാവിലെങ്ങു,മെന്നാകിലും
ഒരു തരിപൊന്‍ നിലാവെട്ടമായി നീ
അരികിലെത്തുവാനാശിച്ചിവന്‍ വൃഥാ!
വിധിപകര്‍ന്നൊരാ നഷ്ടങ്ങളോര്‍ത്തു ഞാന്‍
വിധുരനായെന്റെ ജീവിതപ്പാതയില്‍
തനിയെനിന്നു ഹാ! തേങ്ങുന്നു, നീ വരൂ
കനവിലെങ്കിലും ആശ്വാസമേകുവാൻ!
അനില്‍ക്കൃഷ്ണന്‍ അരിയന്നൂര്‍
876
വാക്കായി വന്നു നീ വിസ്മയം തീര്‍ക്കുക, 
നോക്കായ് മനസ്സിങ്കലാര്‍ദ്രതയാവുക,
ചീര്‍ക്കുന്ന നൊമ്പരം പോക്കുവാനെപ്പൊഴും
കiക്കും സുഖസ്പര്‍ശമായിയെന്നാകിലോ!
ആകാശവും ഭൂമിയും തൊട്ടു മപ്പുറം
പ്രാകാരമ,റ്റവേദ്യങ്ങളാം ലോകവും
സര്‍വ്വപ്രപഞ്ചവും നിന്‍മഹസ്സെന്നുതാന്‍
നിര്‍ണ്ണയം കാണ്മതുണ്ടെപ്പൊഴും മത്പ്രഭോ
ഉണ്ണിക്കൃഷ്ണന്‍ ശ്രീലകം
877
ആഭ്യന്തരയുദ്ധമൊട്ടേറെയായ് സ്വൈരം
ലഭ്യമല്ലാതുള്ളശ്രീലങ്കയിൽ
ആരാധനാലയം യശതന്നിലീയീസ്റ്റർനാൾ
ക്രൂരമാം കാടത്തം കാട്ടിയൊരേ!
ചോരയും കണ്ണീരും വീഴ്ത്തിയശാന്തിയെ
പ്പാരംവളർത്തുവാൻനോക്കുന്നോരേ!
തീരേ മുഖമില്ലാത്തോരെ! നിങ്ങൾ ചെയ്തീ
ഘോരാപരാധം പൊറുക്കാ ലോകം.
തൃക്കഴിപ്പുറം രാമന്‍
878
ചിറകുവീശിപ്പറന്നെത്തിയോർമ്മയിൽ
കുറുകിടുന്നൊരു വെൺപിറാവീമഴ
നെറുകയിൽപ്പെയ്തിറങ്ങിയ തുള്ളികൾ-
ചെറുതണുപ്പാലകംകുളിർപ്പിക്കവേ
പ്രണയമാം മഴ പെയ്തുതോർന്നെങ്കിലു-
മണിയുമാമുത്തുമാലകൾപ്പൂമരം
കണികയായ്പ്പെയ്യു, മോർമ്മതൻകോവിലിൽ
കണിയൊരുങ്ങുന്നു പിന്നെയുംപിന്നെയും !
രാധാദേവി
879
പൂദാനംനൽകിയിട്ടില്ലപ്പേർ നേടിയ
പൂന്താനംനമ്പൂരിതന്നെയാവാം
ജ്ഞാനത്തെപാനയായ്പാടിയപിന്നത്തെ
ഭക്തോത്തമംസമാംപൂന്താനവും
പണ്ടത്തെക്കഥയാണ്പണ്ടത്തെക്കഥയാണ്
പാണനാർപാടിനടന്നതാണ്
പാട്ടിനു വന്നപ്പോൾ പാടാൻപറഞ്ഞപ്പോൾ
പാടിയുണ്ടാക്കിയതല്ലകെട്ടോ.
പി എൻ വിജയൻ

 

 

കഥ

 

ഒണക്കകൃഷ്ണൻ

 

നാരായണൻ രാമൻ

 

ഈയിടെയായി അതിരാവിലെ തന്നെ നിദ്രയുടെ പുതപ്പ് നീങ്ങി സ്മൃതി മണ്ഡലത്തിലേക്കുണരും. അബോധ മനസ്സിലെ കിനാവുകൾ തുന്നിച്ചേർക്കാനൊരു വിഫലശ്രമമാണ് ഇനിയുള്ള കുറച്ചു നിമിഷങ്ങൾ. ഇന്നും എഴുന്നേറ്റയുടൻ പതിവൊന്നും മുടക്കിയില്ല. ഇരു കൈകളും നിവർത്തി ലക്ഷ്മി സരസ്വതി പാർവ്വതിമാരെയും ഗണപതിയെ സ്മരിച്ചു. ജാലകവിരികൾ വകഞ്ഞു മാറ്റിയപ്പോൾ പുറത്തെ ശീതക്കാറ്റിനൊപ്പം മഴയുടെ ആരവങ്ങളും അകത്തേക്കിരച്ചു കയറി. 

" ഇന്ന് കർക്കിടകം ഒന്ന്. നീരാട്ട് അമ്പലക്കുളത്തിലാണ്. ഹീറ്റർ ഓണാക്കേണ്ട"

ഭാര്യ അവിശ്വസനീയമായ തെന്തോ കേട്ട പോലെ എന്നെ പകച്ചു നോക്കുന്നു.

" പുറത്തേക്ക് നോക്കീട്ടാണോ പറേണത് ?

"മഴ പെയ്യുന്നതല്ലേ? കർക്കടത്തിൽ പിന്നെ മഴ പെയ്യൂല്ലേ? എന്റെ എതിർ ചോദ്യം.
" പ്രായം പതിനാറല്ല! സ്വരത്തിൽ ഒരു താക്കീതിന്റെ കനമുണ്ടതിന്.

" അറിയാം. അമ്പത്തി ഒമ്പത് കർക്കിടത്തിലെ അശ്വതി നാളിൽ തികയും. നിസ്സംഗനായി ഞാൻ.

"ഇവിടെ ചെലർക്ക് ഒരു വിജാരംണ്ട്. ഭാര്യമാര് പറഞ്ഞാ കേക്കരുത്. കേക്കരുതന്നെല്ലാ പറ്റ്വങ്കി പറഞ്ഞേനെതിരു ചിയ്യേം വേണം."

അങ്ങനെയങ്ങനെ പുറത്തേ മഴ അകത്തും ചാറാൻ തുടങ്ങിയത് അവഗണിച്ച് "ചിലർ " സോപ്പു പെട്ടിയും തോർത്തുമായി മഴയിലേക്കിറങ്ങി.

"കുളീം തേവാരോം കഴിഞ്ഞ് വൈന്നേരാവുമ്പഴത്തേക്കും അവിടേമിവിടേം വേദന്യാ, അയ്യോ, പാവോ ന്നും പറഞ്ഞു വന്നാൽ തിരിഞ്ഞു ഞാൻ നോക്കൂല്ലാ. പറഞ്ഞേക്കാം "

ശീതക്കാറ്റിന്റെ കൈ പിടിച്ചെത്തിയ അന്ത്യശാസനത്തിന്റെ ഭീഷണിയണിഞ്ഞ ശകാരശീലുകളെ ബധിര കർണ്ണങ്ങളാൽ നേരിട്ട് കുളം ലക്ഷ്യമാക്കി നടന്നു

വിശാലമായ അമ്പലക്കുളം വിജനമാണ്. അസംഖ്യം നീർച്ചാലുകളായി ഒഴുകിയെത്തിയ ജലം കുളം നിറഞ്ഞു കവിഞ്ഞ് താഴെ പാടത്തേക്ക് ഒഴുകുകയാണ്. ആദ്യ കൽപ്പടവിൽ കാൽ വച്ചതേ പെരുവിരൽ മുതൽ ഒരു കുളിര് ശിരസ്സു വരെ പാഞ്ഞെത്തി. പരൽ മീനുകൾ കണങ്കാലുകളിൽ മുട്ടിയുരുമ്മി കുശലം ചോദിക്കുന്നു. 5 വയസ്സു മുതൽ നീന്തിത്തുടിച്ചു മദിച്ചു കുളിച്ച ജലാശയമാണിത്. മാസങ്ങളും വർഷങ്ങളും സമയരഥമേറി പിന്നോക്കം പാഞ്ഞപ്പോൾ പണ്ടത്തെ പതിനെട്ടുകാരനെ കണ്ണീർ സമാനമായ ജലസമൃദ്ധി ഏറ്റുവാങ്ങി. അക്കരെ വരെ ആയാസപ്പെട്ട് നീന്തി കല്ലിൽ പിടിച്ചു നിൽക്കുമ്പോ നല്ല കിതപ്പുണ്ട്. പ്രായം പതിനാറല്ലെന്ന് ബോധ്യമാകുന്നു. മത്സരിച്ചു നീന്താൻ ഒരു പുളവനെങ്കിലുമുണ്ടായിരുന്നെങ്കിലെന്ന് വെറുതെ മോഹിച്ചു പോയി.

വലിയ സാഹസത്തിനൊന്നും നിൽക്കാതെ നീന്തി

ഇക്കരെയെത്തി വീണ്ടും മുങ്ങി നിവർന്ന് തോർത്തുമ്പോൾ ഏതു ഹൈസ്പീഡ് ഷവറിനും നൽകാനാവാത്ത കുളിര്, സുഖം. സംതൃപ്തി.

അമ്പത്തൊമ്പതു വർഷങ്ങളായി നിത്യേനയെന്നോണം ദർശനമേകുന്ന ഭഗവാനാണ്. സാക്ഷാൽ നീലകണ്ഠൻ. ശാന്തവും സൗമ്യവും ദീപ്തവുമായ ഭാവം. സേവിപ്പോർക്കാനന്ദമൂർത്തി. കൂട്ടിന് മക്കളായ വിഘ്നേശ്വരനും ഭഗവതിയും അയ്യപ്പനും. നടക്കൽ തൊഴുതു ധ്യാനിച്ചു നിൽക്കെ ചുറ്റുമുള്ള ലോകവും ശബ്ദഘോഷങ്ങളുമെല്ലാം അകന്നകന്നു പോയി ഭക്തനും ഭഗവാനും മാത്രമായി.

" ആഹാ, ഇന്ന് ലേശം വിസ്തരിച്ചാണല്ലോ? ഭഗവാൻ കുശലം പറഞ്ഞു.

" കർക്കടം ഒന്നാന്തിയല്ലേന്ന് കരുതി "

"ത്തിരി സാഹസമായോ? ശരീരം അത്രക്കങ്ങു പോരാന്നറിയാലോ "

ഭഗവാൻ സന്ദേഹിച്ചു.

" അത് പക്ഷെ അവിടേയ്ക്ക് ഓർമ്മയില്ലല്ലോ " ലേശം പരിഭവിച്ചു ഞാൻ തുടർന്നു. വല്ലപ്പോഴും ഓർമ്മയൊന്നു പുതുക്കണ്ടേ?

തിരുമുഖത്ത് നാനാർത്ഥങ്ങളുള്ള മന്ദഹാസമാണ്. ഞാൻ സാവധാനം തിരിച്ചെത്തി. മന:ശുദ്ധിയുണ്ടാകണേ എന്നല്ലാതെ പ്രത്യേക ആവശ്യങ്ങളുന്നയിക്കാറില്ല. അന്തര്യാമിയായ അവിടന്ന് എല്ലാം ആവശ്യത്തിന് കണ്ടറിഞ്ഞ് തന്നിട്ടുണ്ട്. ആവശ്യത്തിനു മാത്രം

എങ്കിലും ഈയിടെയായി ഒരാവശ്യം ഞാൻ ഉന്നയിച്ചു തുടങ്ങിയിട്ടുണ്ട്. മറ്റൊന്നുമല്ല.

അനായാസ മരണം.

ഒളിച്ചും പാത്തും മാർജ്ജാര പാദങ്ങളോടെയെത്തുന്ന രംഗബോധമില്ലാത്ത കോമാളിയെ " ങ്ഹാ വന്നോ " എന്നു നിസ്സംഗതയോടെ സ്വാഗതം ചെയ്യണം. ലേശമിരുന്ന് വിയർപ്പാറ്റിയാൽ "എന്നാലിനി പോകാം" എന്നു പറഞ്ഞെഴുന്നേൽക്കണം. ലഗ്ഗേജുകളുടെ ഭാരവുമില്ല. അനവസരത്തിൽ വ ന്ന് ഇടിത്തീ വർഷിക്കുമ്പോൾ ഒരവധിക്കു വേണ്ടി ഏവനും കെഞ്ചാതെ കെഞ്ചുമെന്ന യമധർമ്മന്റെ ഗർവ്വൊന്നു കുറയ്ക്കണം.

അതത്രയങ്ങ് സത്യസന്ധമാണോ? അകതാരിനുള്ളിലൂളിയിട്ട് ചികഞ്ഞപ്പോൾ അതാ ഒളിച്ചിരിക്കുന്ന മൂവർ സംഘം. അച്ചാച്ചന്റെ മേൽ നിഷ്കണ്ടകമായ അവകാശമുള്ള മട്ടിൽ മനസ്സും ശരീരവും കീഴടക്കിയ മൂന്നു വയസ്സുകാരനും ആഹിറ്റ്ലർ മാധവൻകുട്ടിയുടെ അഭാവത്തിൽ മാത്രം നെഞ്ചിൽ പൊൻ തളയിട്ട ചരണയുഗളങ്ങൾ വയ്ക്കാവകാശമുള്ള എട്ടും ആറും മാസം സർവ്വീസുള്ള എന്റെ നിഴൽ കണ്ടാൽ തൊണ്ണു കാട്ടിച്ചിരിയുമായി കൈകാൽ വീശുന്ന രണ്ടനിയത്തിമാരും. മകന്റേയും മകളുടേയും സന്താനങ്ങൾ. അനായാസ മൃത്യു ആഗ്രഹിക്കുമ്പോഴും പെറ്റ് കൈകാലുകളുറക്കാത്ത പൈക്കിടാവ് കൺമുന്നിൽ നിന്നു മായുമ്പോൾ തള്ളപ്പശുവെന്ന പോലെ മനസ്സ് വേപഥു പൂണ്ടു പോകുന്നതെന്തേ?

 

ഈയിടെ ഇക്കാര്യം ചർച്ച ചെയ്തപ്പോഴാണ് സുഹൃത്തായ സ്വാമി ലക്ഷ്മണോപദേശത്തിൽ തുടങ്ങി എന്നെ ആത്മീയ പാതയിലേക്ക് കൈപിടിച്ചു " കയറ്റാനൊരു " ശ്രമം നടത്തിയത്.

"ആയുസ്സു പോകുന്നതേതുമ റിവീല

മായാസമുദ്രത്തിൽ മുങ്ങിക്കിടക്കയാൽ

വാർദ്ധക്യ മോടു ജരാനര യും പൂണ്ടു.........

" മതി. ഞാൻ കയ്യെടുത്തു വിലക്കി.

" ക്ഷണപ്രഭാ ചഞ്ചലമായ ഭോഗങ്ങൾ ഉപേക്ഷിക്കണമെന്നല്ലേ? പൂർവ്വാശ്രമത്തിലെ ബന്ധനങ്ങളെല്ലാമു പേക്ഷിച്ചോ?

" എപ്പോഴേ ഉപേക്ഷിച്ചു. വൈമനസ്യം തോന്നാൻ തക്ക ബന്ധങ്ങളുണ്ടായിരുന്നുമില്ല.

എനിക്കിപ്പോൾ ത്യാഗത്തിന്റെ ആനന്ദമാണ്. പരംപൊരുളറിഞ്ഞ നിർമമതയാണ്."

"അവിടെയാണ് സ്വാമീ പ്രശ്നം. ഒരാൾ അനുഭവിക്കാത്ത സുഖവും മധുരവും ത്യജിക്കുന്നതു പോലെ എളുപ്പമല്ല അറിഞ്ഞു കൊണ്ടവയെ ത്യജിക്കുന്നത്. അയഥാർത്ഥ നിരവധി മോഹ സങ്കൽപ്പങ്ങളുമായി ജീവിതസമരത്തിനിറങ്ങിപ്പുറപ്പെടുന്ന അച്ഛനേക്കാൾ പരശ്ശതം ഔന്നത്യമുള്ള, ജീവിതത്തിൽ നിന്നനേകം പാഠങ്ങൾ പഠിച്ച മുത്തച്ഛനാണ് ഞാൻ.

ജീവിതായോധനത്തിന്റെ ബദ്ധപ്പാടുകളിൽ കൈവിട്ടു പോയ മക്കളുടെ ബാല്യകുതൂഹലങ്ങൾ നെഞ്ചേറ്റാൻ ഈശ്വരൻ കനിഞ്ഞു നൽകിയ അസുലഭ നിമിഷങ്ങളാണ് ഞാൻ ആസ്വദിച്ചു ജീവിച്ചു തീർക്കുന്നത്. അങ്ങു പറഞ്ഞ മോക്ഷത്തേക്കാളും പരംപൊരുളറിഞ്ഞ അന്തരാത്മാവിന്റെ അമേയമായ ആനന്ദത്തേക്കാളും പൈദാഹങ്ങളില്ലാത്ത പുണ്യലോകത്തേക്കാളും ഇതാണെനിക്ക് സ്വർഗ്ഗം, പരമാനന്ദം. മോക്ഷം.

മനുഷ്യമനസ്സല്ലേ, ഒരു പക്ഷെ, നാളെയൊരിക്കൽ ഞാനാ സനാതനസത്യം തേടിയലഞ്ഞേക്കാം. പക്ഷെ ഇന്നത്തെ മധുരവും നിർവൃതിയുമുപേക്ഷിച്ച് അന്നിന്റെ അനിശ്ചിതത്വത്തിലേക്ക് യാത്ര പുറപ്പെടാൻ ഇന്ന് ഞാനാളല്ല തന്നെ.

അപ്പോൾ മരണഭയമുണ്ട്? സ്വാമി വിടാൻ ഭാവമില്ല

"ഭയമല്ല സ്വാമീ, അത്യുന്നത നീതിപീoത്തിന്റെ വിധി തീർപ്പിലെ ന്യായാന്യായങ്ങൾ മൂഢനായ എന്റെ അല്പബുദ്ധിക്ക് വഴങ്ങുന്നതായേക്കില്ല. പക്ഷെ ജീവിതയാത്രയുടെ അവസാന ലാപ്പിൽ മാത്രം ജീവിക്കാൻ തുടങ്ങിയ ഞാൻ അലംഘനീയ സത്യമെന്നറിഞ്ഞുതന്നെ അവയെ ബോധപൂർവ്വം നിരാകരിക്കുകയാണ്.

ചിന്തയിൽ മുഴുകി മഴ നനഞ്ഞു തന്നെ വീട്ടിലെത്തി തോർത്തി ഭാര്യയോടൊരു വീമ്പും പറഞ്ഞു.

" കണ്ടോടീ, എന്റെ സ്റ്റാമിന, ഒരു തുമ്മൽ പോലുമില്ല." ഞാൻ ഉള്ള ഉണക്ക ശരീരമൊന്ന് എയർ പിടിച്ച് കാണിക്കുകയും ചെയ്തു.

ഉച്ചക്ക് ഊണു കഴിഞ്ഞ് ഒരു മയക്കം കഴിഞ്ഞെഴുന്നേറ്റപ്പോൾ മുതൽ ഒരസ്വസ്ഥത. കാൽമുട്ടുകളിൽ മിന്നൽ പിണരുകൾ. കഴുത്തു തിരിക്കുമ്പോൾ ചിറകടിക്കുന്ന നോവും പക്ഷികൾ. തലക്കടി കൊണ്ട പോലെ ഒരു വിങ്ങൽ. വലിയമ്പലത്തിൽ നിന്ന് കൂട്ടുവന്ന പ്രാവ് നെഞ്ചിലിരുന്ന് കുറുകുന്നു.

ചായയും കൊണ്ടെത്തിയ ഭാര്യയറിയാതിരിക്കാൻ പത്രമെടുത്തു നിവർത്തി. മുഖത്തെ നേരീയ വ്യത്യാസം പോലും പിടിച്ചെടുത്ത് അപഗ്രഥിച്ച് ശരിയായ നിഗമനത്തിലെത്തുന്ന ഇൻബിൽറ്റ് സോഫ്റ്റ് വെയറുള്ളവരാണ് ഭാര്യമാരെന്ന് ഞാനോർത്തില്ല.

"എന്താ ഒരു വയ്യായ?

"ഒളിച്ചിട്ടു കാര്യമില്ലെന്നറിയാവുന്ന ഞാൻ പകുതി പറഞ്ഞു. ബാക്കി പകുതി അവളൂഹിച്ചു.

"ഞാനപ്പോഴേ പറഞ്ഞതല്ലേ എന്നു തുടങ്ങിയ പരിദേവനങ്ങൾക്കൊടുവിൽ " ഞാൻ തിരിഞ്ഞു നോക്കൂലാ" എന്ന ഉഗ്രശപഥമൊക്കെ മറന്ന് അതാ തിളച്ച വെള്ളവും മറ്റു സന്നാഹവുമൊക്കെയായി അയാൾ ആവി പിടുത്തം തുടങ്ങി.

കിട്ടിയ അവസരത്തിൽ ഒന്നു പ്രകോപിപ്പിക്കാനായി ഞാൻ ആരോടെന്നില്ലാതെ പറഞ്ഞു.

"ശ്ശോ! എന്നാലും എന്റെ ആരോഗ്യമൊക്കെയെവിടെ പോയി.?

"എന്നെക്കൊണ്ടൊന്നും പറയിപ്പിക്കണ്ട "

ഒരു ആരോക്യച്ചാമി! കണ്ടേച്ചാലും മതി"

കണവനെ ആപാദചൂഡം കൺകൊണ്ടുഴിഞ്ഞ് ചെറുചിരിയോടെ അവൾ തുടർന്നു.

"ഒണക്കകൃഷ്ണൻ"

ഊറി വന്ന ചെറുമന്ദഹാസം വലിയൊരു അട്ടഹാസച്ചിരിയായി മാറാൻ ആ വാക്കുകൾ ധാരാളമായിരുന്നു

 

www.aksharaslokam.com

 

സൈറ്റില്‍ അംഗമാകാന്‍  ഇപ്പോള്‍ തന്നെ റജിസ്റ്റര്‍   ചെയ്യുക.(ഹോം പേജില്‍

റജിസ്റ്റെര്‍ ഇന്‍ ക്ലിക്കു ചെയ്തു കോളങ്ങള്‍ പൂരിപ്പിക്കുക)

 

സൈറ്റില്‍ ലഭ്യമായ പുസ്തകങ്ങള്‍ 

 

 
1.സഹസ്രദളം :


ഗ്രന്‍ഥകര്‍ത്താവ് : അരിയന്നൂര്‍ ഉണ്ണിക്കൃഷ്ണന്‍

അഷ്ടപ്രാസം ,യമകവിദ്യ, ഗോഹത്യയും ബ്രഹ്മഹത്യയും എന്ന മണി
പ്രവാള ഖണ്ഡകാവ്യം ,കറുത്ത ചേകവന്‍ എന്ന പച്ചമലയാളം കാവ്യം,
രസരാജന്‍, കുറിമാനം (എഴുത്തുകുത്തുകള്‍ , ആശംസകള്‍ , ചരമശ്ലോക
ങ്ങള്‍), അക്ഷരശ്ലോകമാഹാത്മ്യം (നൂറു പൂക്കള്‍, അംബോപദേശം) , തിരു
ശേഷിപ്പ് എന്നിങ്ങനെ എട്ടു അദ്ധ്യായങ്ങളിലായി ആയിരത്തിലധികം 
ശ്ലോകങ്ങള്‍ അടങ്ങുന്ന കൃതി. 2000ത്തില്‍ കൂനംമൂച്ചി അക്ഷരശ്ലോകവേദി 
പ്രസിദ്ധീകരിച്ചു.


2.അരിയന്നൂര്‍ :


അരിയന്നൂര്‍ ഗ്രാമത്തിന്റെ സാംസ്ക്കാരിക ചരിത്രം . ക്ഷേത്രത്തെക്കുറി
ച്ചുള്ള വിശദവിവരങ്ങള്‍ . ആധുനിക കാലഘട്ടത്തിലെ സം ഭവങ്ങളുടെ 
വിവരണം . കൂടാതെ നൂറോളം സരസശ്ലോകങ്ങള്‍ editor അരിയന്നൂര്‍ 
ഉണ്ണിക്കൃഷ്ണന്‍


3.അക്ഷരശ്ലോക ഡയറക്ടറി 2000:


ഗ്രന്‍ഥകര്‍ത്താവ് : അരിയന്നൂര്‍ ഉണ്ണിക്കൃഷ്ണന്‍

അക്ഷരശ്ലോകകലാരംഗത്തുള്ള സംഘടനകളുടെയും വ്യക്തികളുടെയും 
വിവരങ്ങള്‍ അടങ്ങുന്ന ഇത:പര്യന്തമുണ്ടായിട്ടുള്ള ഏക കൃതി.


4.ഉപനയനം :

ഗ്രന്‍ഥകര്‍ത്താവ്: ആദരേടത്ത് നീലകണ്ഠന്‍ ഭട്ടതിരിപ്പാട്
ആദരേടത്തിന്റെ ശ്ലോകങ്ങളുടെ സമാഹാരം .'മയൂരദൂത്' എന്ന സന്ദേശ
കാവ്യത്തിന്റെ പരിഭാഷ പൂര്‍ണ്ണ രൂപത്തില്‍ ഈ പുസ്തകത്തില്‍ഉണ്ട്.

5.കണ്ണോക്ക് :

ടി.എം . പോള്‍ മാസ്റ്റര്‍ സ്മരണിക. കേരളത്തിലെ പ്രഗത്ഭരായ അക്ഷര
ശ്ലോകപ്രവര്‍ത്തകരുടെ പ്രൌഢലേഖനങ്ങള്‍,പഴയ നൂറു കവികളുടേതാ
യി നൂറു ശ്ലോകങ്ങള്‍ ,കൊച്ചുണ്ണിത്തമ്പുരാന്റെ 'കാന്തവൃത്തം ' എന്ന 
പുസ്തകത്തിന്റെ പൂര്‍ ണ്ണരൂപം എന്നിവ ഉള്ളടക്കത്തില്‍ പെടുന്നു.

6.തിലാഞ്ജലി:

പണ്ഡിതവര്യനും ബഹുമുഖപ്രതിഭയുമായിരുന്ന കാര്യാട്ടുശങ്കുണ്ണിനായര്‍
കൂനമ്മൂച്ചി അക്ഷരശ്ലോകവേദി അദ്ധ്യക്ഷനായിരിക്കെ 1989ല്‍ അന്തരിച്ചു. 
അക്കാലത്തു പ്രസിദ്ധീകരിച്ച ഒരു സ്മരണികയാണു 'തിലാഞ്ജലി'. മാട
മ്പു കുഞ്ഞുകുട്ടന്റെ അനുസ്മരണലേഖനം, മണ്മറഞ്ഞു പോയ എന്‍.ഡി. 
കൃഷ്ണനുണ്ണി,കെ.എന്‍ഡി., ആദരേടം ,നെല്ലുവായ് കെ.എന്‍ നമ്പീശന്‍ തു
ടങ്ങി പലരുടെയും ശ്ലോകരചനകള്‍ എന്നിവ ഉള്ളടക്കത്തില്‍ പെടുന്നു.

7.ശിവൊള്ളിക്കൃതികള്‍ :

ശിവൊള്ളിയുടെ ലഘു ജീവചരിത്രക്കുറിപ്പു, ദാത്യൂഹസന്ദേശം കാവ്യം, 
തെരഞ്ഞെടുത്ത 60 ശ്ലോകങ്ങള്‍ എന്നിവയാണ് ഉള്‍ക്കൊള്ളിച്ചിട്ടുള്ളത്.

8.ശ്ലോകമേവ ജയതേ :

മണ്മറഞ്ഞ ശ്ലോകപ്രതിഭകളെ പരിചയപ്പെടുത്തുക എന്ന ഉദ്ദേശത്തോടെ 
ആരംഭിച്ചിട്ടുള്ള ഒരു പംക്തിയാണു ഇത്.

9.രാമകൃഷ്ണവിലോമകാവ്യം :

ഗ്രന്‍ഥകര്‍ത്താവ് : സൂര്യകവി
ജലജ എന്ന വാക്കു അനുലോമമായും പ്രോമമായും ഒരേ പോലെ വാ
യിക്കാവുന്ന പദമാണ്. മോരു തരുമോ എന്ന വാക്യം ഇപ്രകാരം തന്നെ. 
വിലോമപദം ,വിലോമവാക്യം എന്നിങ്ങനെ ഇവയെ വിളിക്കാം. വാക്യം
വലുതാകും തോറും ഇത്തരം ​ഘടന ക്ലിഷ്ടമാകുന്നു. ഇംഗ്ലീഷില്‍ ഒരു ആ
ശയം പ്രകടിപ്പിക്കുന്ന ഏറ്റവും വലിയ വിലോമവാക്യം a man, a plan, a 
canal, panama എന്നാണെന്നു ഗിന്നസ് ബുക്കില്‍ കൊടുത്തിട്ടുണ്ട്.
ഇവിടെ ഇതാ ഒരു സംസ്ക്കൃത കാവ്യം. എല്ലാ ശ്ലോകങ്ങളും വിലോമ
ങ്ങള്‍! മാത്രമല്ല, രണ്ടു ഇതിവൃത്തങ്ങള്‍ ഒരേസമയം പറഞ്ഞു പോകുക
യും ചെയ്യുന്നു. ശ്ലോകങ്ങളുടെ പൂര്‍വ്വാര്‍ദ്ധങ്ങള്‍ ശ്രീരാമകഥ പറഞ്ഞു 
പോകുമ്പോള്‍ ഉത്തരാര്‍ദ്ധങ്ങള്‍ ശ്രീകൃഷ്ണകഥ പറഞ്ഞു പോകുന്നു. കാ
വ്യകാരന്റെയും സംസ്ക്കൃത ഭാഷയുടെയും മഹത്വം! നമ്മുടെയെല്ലാം 
സുകൃതവും .
രാമകൃഷ്ണവിലോമകാവ്യത്തിനു മലയാളവ്യാഖ്യാനം തയ്യാറായിട്ടുള്ള
തു ഖണ്ഡശ: പ്രസിദ്ധീകരിക്കുന്നു. ആദ്യശ്ലോകത്തിന്റെ വ്യാഖ്യാനംകൊടു
ത്തിട്ടുണ്ട്.പണ്ഡിതോത്തമനായശ്രീ.മച്ചട്ട് ടി.നീലകണ്ഠന്‍ നമ്പീശനാണു 
വ്യാഖ്യാതാവ്.

10.ഗോശാല:

ഗ്രന്‍ഥകര്‍ത്താവ് : ഉണ്ണി എടക്കളത്തൂര്‍
ഉണ്ണി എടക്കളത്തൂര്‍ എന്ന തൂലികാനാമത്തില്‍ അറിയപ്പെടുന്ന കെ.പി.
നാരയണന്‍ നമ്പീശന്റെ ശ്ലോകരചനകള്‍ സമാഹരിച്ചതാണു കൃതി. 1994 
ലെ കവനകൌതുകം പുരസ്ക്കാരജേതാവാണു കവി. പുരസ്ക്കാരത്തിന
ര്‍ഹമായ കവിതയും ഇതില്‍ ഉള്‍പ്പെട്ടിട്ടുണ്ട്.

11.ഒറവങ്കര ശ്ലോകങ്ങള്‍:

ഒറവങ്കരയുടെ തെരഞ്ഞെടുത്ത കുറെ ശ്ലോകങ്ങള്‍

12.വൃത്തങ്ങളിലെ താളഘടന:

ഗ്രന്‍ഥകര്‍ത്താവ് : അത്തിപ്പറ്റ രവി. 
പരമ്പരാഗതരീതിയില്‍ നിന്നു വ്യത്യസ്തമായി, താളത്തെ അടിസ്ഥാനഘട
കമാക്കി വൃത്തങ്ങളെ വിശകലനം ചെയ്യാനുള്ള ഒരു ശ്രമം. സംസ്ക്കൃത
വൃത്തമായാലും ,ഭാഷാവൃത്തമായാലും , ചലച്ചിത്രഗാനമായാല്‍ പോലും 
അവയിലെല്ലാം പൊതുവായ ഒരു താളഘടനയെ കണ്ടെത്തുന്ന ഒരു .
സൈദ്ധാന്തികഗ്രന്‍ഥം

13. ശ്രീരാഘവയാദവീയം:

രാമകൃഷ്ണവിലോമകാവ്യം പോലെ തന്നെ മറ്റൊരു വിലോമകാവ്യം. 
വെങ്കിടാധ്വരി എന്ന കവിയാണ് ഇതിന്റെ രചയിതാവ്. രാമകഥ പറ
ഞ്ഞു പോകുന്ന ഓരോ ശ്ലോകത്തിനും കൃഷ്ണകഥ പറഞ്ഞു പോകുന്ന 
പ്രതിലോമശ്ലോകം എന്നാണു രചനയുടെ രീതി. ഓരോ ജോടി ശ്ലോകവും
വിലോമമാണെന്നര്‍ത്ഥം . പദച്ഛേദം കൂടെ കൊടുത്തിട്ടുണ്ട്.

14.നാരായണീയം ഭാഷാവൃത്തത്തില്‍ :

അരിയന്നൂര്‍ ഉണ്ണിക്കൃഷ്ണന്റെ പരിഭാഷ.

15.ഭര്‍ത്തൃഹരി എന്ന  ഫോറം:

ഭര്‍ത്തൃഹരിയുടെ ശതകത്രയം ഭാഷാവൃത്തത്തിലേക്കു പരിഭാഷപ്പെടു
ത്തുക എന്നതാണു ലക്ഷ്യം

16.അരിയന്നൂര്‍  E-Magazine :

ശ്ലോക വിവരങ്ങളടങ്ങുന്ന ഒരു മാസികപ്രസിദ്ധീകരണം.  എല്ലാ 10-ആം 
തിയ്യതിയും പ്രസിദ്ധീകരിക്കുന്നു.

17.ശയനപ്രദക്ഷിണം:

ശ്രീ.രാധാകൃഷ്ണന്‍ കാക്കശ്ശേരിയുടെ കവിതാസമാഹാരമാണു. സാഹിത്യ
ത്തിന്റെ വിവിധ ശാഖകളിലായി നിരവധി പുസ്തകങ്ങള്‍ രചിച്ചിട്ടുള്ള
ഗ്രന്‍ഥകര്‍ത്താവിന്റെ ഈ കൃതി ശ്ലോകങ്ങളും ഭാഷാവൃത്തത്തിലുള്ള
കവിതകളും ഉള്‍ക്കൊള്ളുന്നതാണ്.

18.കഥാത്രയീ ശ്ലേഷകാവ്യം: സമ്പൂര്‍ണ്ണമലയാളവ്യാഖ്യാനത്തോടുകൂടി.

രാമായണ-ഭാരത-ഭാഗവത കഥകള്‍ ഒരുമിച്ചു പറഞ്ഞു പോകുന്ന വിശി
ഷ്ടമായ ഒരു സംസ്ക്കൃതകാവ്യമാണ്. ഓരോ ശ്ലോകവും മൂന്നു രീതിയില്‍ 
അര്‍ത്ഥം ഉള്‍ക്കൊള്ളുന്നു. ചിദംബരകവിയുടെ ഈ കാവ്യത്തിനു മലയാ
ളവ്യാഖ്യാനം രചിച്ചിട്ടുള്ളതു മച്ചാട്ടു ടി. നീലകണ്ഠനാണ്.
വന്ദനശ്ലോകത്തിനു 10 അര്‍ത്ഥമാണു വ്യാഖ്യാതാവു കൊടുത്തിരിക്കുന്നത്.

19. അഷ്ടപ്രാസം :

സമ്പാദകന്‍ : അനില്‍ക്കൃഷ്ണന്‍ പി.യു.
ശാര്‍ദ്ദൂലവിക്രീഡിതം  വൃത്തത്തില്‍ ഓരോ ശ്ലോകത്തിലും എട്ടു സ്ഥല
ത്തു കൃത്യമായ താളത്തില്‍ ഒരേ പദം ആവര്‍ത്തിച്ചു വരുന്ന വിധം 
പദകുബേരന്മാര്‍ക്കു വിഹരിക്കാനുള്ള രചനാസങ്കേതമാണു അഷ്ടപ്രാസം. 
നാല്പതോളം കവികള്‍ ;നൂറ്റിഅമ്പതില്പരം ശ്ലോകങ്ങള്‍ ; ശ്ലോകസദസ്സു
കളിലൂടെയും കയ്യെഴുത്തു പുസ്തകങ്ങളിലൂടെയും മാത്രം തലമുറകള്‍ 
താണ്ടിയ നിരവധി രചനകള്‍. കുറെ പുതിയ രചനകളും.

20. പെട്ടരഴിയം കൃതികള്‍

പെട്ടരഴിയം വലിയ രാമനെളയതിന്റെ തെരഞ്ഞെടുത്ത കൃതികള്‍ ശ്ലേ
ഷം,പരല്‍ ഘടന,ശയ്യാഗുണം തുടങ്ങിയവയില്‍ അദ്വിതീയനായിരുന്നു 
ഗ്രന്‍ഥകര്‍ത്താവ്. വള്ളത്തോള്‍ പോലും പേട്ടരഴിയത്തിനെപ്പോലെ ശ്ലോകം
എഴുതാന്‍ കഴിയണമെന്നു കൊതിച്ചിട്ടുണ്ടത്രേ . സപ്തപ്രാസം ദീക്ഷിച്ചു 
രചിച്ചിട്ടുള്ള വഞ്ചിപ്പാട്ടു (നതോന്നത) രീതിയിലുള്ള ഒരു കവിത കൂടി .
ഇതില്‍ ചേര്‍ത്തിട്ടുണ്ട്

21.  കാതുകുത്ത്  

ഗ്രന്‍ഥകര്‍ത്താവ് : കുറുവല്ലൂര്‍ മാധവന്‍ 
കഴിഞ്ഞ രണ്ടു പതിറ്റാണ്ടു കാലമായി കൂനമ്മൂച്ചി അക്ഷരശ്ലോകവേദി
യുടെ അദ്ധ്യക്ഷനായി തുടരുന്ന  ശ്രീ കുറുവല്ലൂര്‍ മാധവന്റെ ശ്ലോകസ
മാഹാരം . കൂനമ്മൂച്ചി അക്ഷരശ്ലോകവേദി 1994 ല്‍ പ്രസിദ്ധീകരിച്ചതാണ് 
ഈ കൃതി.

22. പച്ചമലയാളം

സാധാരണപ്രയോഗത്തിലുള്ള മണിപ്രവാളമലയാളത്തിന്റെ നിഷേധമാണ് 
പച്ചമലയാളം.സംസ്ക്കൃതപദങ്ങള്‍ ഒഴിവാക്കിയുള്ള മലയാളമെന്നാണ് 
ഉദ്ദേശിക്കുന്നത്. മനസ്സ്, ദുഃഖം ,വിഷമം ....തുടങ്ങി സമ്സ്ക്കൃതത്തില്‍ നി
ന്നു സ്വീകരിക്കപ്പെട്ടിട്ടുള്ള പദങ്ങളെല്ലാം നിഷിദ്ധം . ഇങ്ങനെയുള്ള 
കാവ്യങ്ങളുടെ ഒരു ശേഖരം .

23. അക്ഷരശ്ലോക സദസ്സ്  ഫോറം

അംഗങ്ങള്‍ക്കു  ശ്ലോകങ്ങള്‍ പൊസ്റ്റു ചെയ്തു സദസ്സില്‍ പങ്കെടുക്കാം .

24.  സ്തവപുഷ്പമാലിക

ഗ്രന്‍ഥകര്‍ത്താവ് : പണ്ഡിതഭൂഷണം പി.കെ.രാമന്‍ നമ്പ്യാര്‍ 
ശിഖരിണി വൃത്തത്തില്‍ 50 സംസ്ക്കൃതശ്ലോകങ്ങള്‍ വ്യാഖ്യാനത്തോടു 
കൂടി . തട്ടകത്തമ്മയായ പനങ്ങാട്ടുകര ഭഗവതിയെ സ്തുതിച്ചുള്ളതാണ് 
ഇതിവൃത്തം .കൊല്ലവര്‍ഷം 1106 ല്‍ പ്രസിദ്ധീകൃതമായത്.

25. .ശ്രീവിജയോദയം മഹാകാവ്യം

ഗ്രന്‍ഥകര്‍ത്താ : മഹാകവി പന്തളം കേരളവര്‍മ്മ
മഹാകവിയുടെ രണ്ടു മഹാകാവ്യങ്ങളില്‍ കൂടുതല്‍ പ്രശസ്തമായതു 
രുഗ്മാംഗദചരിതം ആണ്. എന്നാല്‍ വിജയോദയം കാവ്യവും കാവ്യമേന്മ 
കൊണ്ടും പന്തളത്തിന്റെ സ്വതസ്സിദ്ധമായ ശബ്ദാലങ്കാരവൈദഗ്ദ്ധ്യം  
കൊണ്ടും അതീവ മനോഹരമാണ്.
 
26. കളിയോഗത്തില്‍ 

ഗ്രന്‍ഥകര്‍ത്താവ് : ഉണ്ണി എടക്കളത്തൂര്‍ 
 
ഗ്രന്‍ഥകര്‍ത്താവിന്റെ ആദ്യത്തെ കാവ്യ സമാഹാരമാണ്‍ 1990 ല്‍ പ്രസി
ദ്ധീകരിക്കപ്പെട്ട ഈ പുസ്തകം ..

27. ഉഷയുടെ ശയനഗൃഹം

ഗ്രന്‍ഥകര്‍ത്താവ് : മഹാകവി കുട്ടമത്ത്
 
മഹാകവിയുടെ മുഖമുദ്രയായ രചനയിലെ  ശബ്ദസൌന്ദര്യവും ശാലീന
തയും നിറഞ്ഞു നില്‍ ക്കുന്ന ഒരു കൃതി.
 
28.  ആന്തര സാമ്രാജ്യങ്ങള്‍

 
കവിതാസമാഹാരം 
ഗ്രന്‍ഥകര്‍ത്താവ് : രാധാകൃഷ്ണന്‍ കാക്കശ്ശേരി 
 
29.  കേരളം


ഗ്രന്‍ഥകര്‍ത്താവ് : മഹാകവി കൊടുങ്ങല്ലൂര്‍ കുഞ്ഞിക്കുട്ടന്‍ തമ്പുരാന്‍ 
കേരളത്തിന്റെ ചരിത്രവും ഐതിഹ്യങ്ങളും ക്രോഡീകരിക്കപ്പെട്ടിട്ടുള്ള
കാവ്യം . ഈ വിഭാഗത്തിലെ ഏറ്റവും പ്രശസ്തവും സമഗ്രവും , അതേ
സമയം മനോഹരവുമായ മലയാളകാവ്യം .  
 
30. പുലരി 
 
കവിതാ സമാഹാരം 
ഗ്രന്‍ഥകര്‍ത്താവ്: : ടി വി ജോസ്മാസ്റ്റര്‍ 
 
കൂനംമുച്ചി അക്ഷരശ്ലോക വേദിയുടെ സെക്രട്ടറി ആയിരിക്കേ 1997ല്‍ അ
ന്തരിച്ച ടി വി ജോസ് മാസ്റ്റരുടെ കാവ്യ രചനകള്‍ സമാഹരിച്ച കൃതി.






♥