ARIYANNUR AKSHARASLOKAKALAKSHETHRAM

അരിയന്നൂര്‍  

 

മെയ് 2018 ലക്കം 77   

പത്രാധിപര്‍ : അരിയന്നൂര്‍ ഉണ്ണിക്കൃഷ്ണന്‍ 

 

[മാസികയുടെ പഴയ ലക്കങ്ങള്‍ കാണുവാന്‍ ഹോംപേജില്‍ Archives ക്ലിക്കു ചെയ്യുക] 

തത്വമുക്തകം  73

 

കാകഃ കൃഷ്ണഃ, പികഃ കൃഷ്ണഃ

കോ ഭേദഃ പികകാകയോഃ?

വസന്തകാലേ സമ്പ്രാപ്തേ

കാകഃ കാകഃ, പികഃ പികഃ 

 

കാക്ക കറുത്തതാണ്, കുയിലും കറുത്തതാണ്, കുയിലിനും കാക്കയ്ക്കും തമ്മില്‍ എന്തു വ്യത്യാസം? വസന്തകാലം വരുമ്പോള്‍ കാക്ക കാക്കയാണ് കുയില്‍ കുയിലും.

സാധാരണ സമയങ്ങളില്‍ ഒരുപോലെയുള്ള‌ കാക്കയും കുയിലും തമ്മിലുള്ള വ്യത്യാസം അറിയുന്നത് വസന്തകാലത്തില്‍ കുയില്‍ പാട്ടുപാടുമ്പോഴാണ് എന്നര്‍ത്ഥം. അതായത് കാഴ്ചയില്‍ ഒരുപോലെയുള്ള ആളുകളുടെ തനിസ്വഭാവം അറിയണമെങ്കില്‍ അതിനു പറ്റിയ സാഹചര്യം വരണം 


സംസ്ക്കൃതത്തില്‍ നിന്നൊരു മുത്ത് 75

 

പ്രസഹ്യ മണിമുദ്ധരേന്മകരവക്ത്രദംഷ്ട്രാന്തരാത്

സമുദ്രമപി സന്തരേത് പ്രചലദൂർമിമാലാകുലം

ഭുജങ്ഗമപി കോപിതം ശിരസി പുഷ്പവദ്ധാരയേത്

ന തു പ്രതിനിവിഷ്ടമൂർഖജനചിത്തമാരാധയേത്

 

അര്‍ത്ഥം 

 

മകര-വക്ത്ര-ദംഷ്ട്ര-അന്തരാത് : മുതലയുടെ വായിലെ                                                                                    ദംഷ്ട്രങ്ങളുടെ ഇടയിൽ നിന്ന്

പ്രസഹ്യ മണിം ഉദ്ധരേത്                 : അല്പം ബുദ്ധിമുട്ടിയാൽ രത്നം                                                                        വലിച്ചെടുക്കാം 

പ്രചലത്-ഊർമി-മാലാ-കുലം      : ഇളകുന്ന തിരമാലകൾ നിറഞ്ഞ 

സമുദ്രം അപി സന്തരേത്                 : കടലു പോലും നീന്തിക്കടക്കാം

കോപിതം ഭുജംഗം അപി                : ചീറ്റുന്ന പാമ്പിനെപ്പോലും

ശിരസി പുഷ്പ-വത് ധാരയേത്    : തലയിൽ പൂ പോലെ ചൂടാം

പ്രതി-നിവിഷ്ട-മൂർഖ-ജന-ചിത്തം : ദുരഭിമാനിയായ                                                                                              ഒരാളുടെമനസ്സിനെ

ന ആരാധയേത്                         : വശത്താക്കാൻ പറ്റില്ല


advt.

ഭാഷാനാരായണീയം 
 
അര്‍ത്ഥം അറിഞ്ഞു പഠിയ്ക്കുവാനും പഠിപ്പിയ്ക്കുവാനും റെഫറന്‍സിനും ഉതകുന്ന വിധത്തില്‍ നാരായണീയം മൂലവും ലളിതമായ ഭാഷാവൃത്തത്തിലുള്ള പരിഭാഷയും

പരിഭാഷകന്‍ അരിയന്നൂര്‍ ഉണ്ണിക്കൃഷ്ണന്‍


വില : 350 രൂപ‌


പുസ്തകം ലഭിയ്ക്കാന്‍ ബന്ധപ്പെടേണ്ട ഫോണ്‍/വാട്ട്സ് ആപ്പ് 

നമ്പര്‍ : 9447129500

advt.

 

പുതിയ കവിതകള്‍

 

പഞ്ചമുക്തകങ്ങള്‍
ഹരിദാസ് മംഗലപ്പിള്ളി
പ്രായം പമ്പകടക്കു,മൊപ്പമഴകും താരുണ്യവും കൈവരും, 
ശ്രേയസ്സേറു,മുണർവ്വുകൂടു,മുയിരിന്നായുസ്സു ദീർഘിച്ചിടും 
കായക്ളേശമൊഴിഞ്ഞിടും, പൊരിവെയിൽ ക്ഷിപ്രം നിലാവായിടും 
ചായക്കപ്പിലെടുത്തുതന്നൊരമൃതിൻ സ്വാദൊന്നിനാലോമലേ!!
അന്നാൾ വേലിപൊളിച്ചു പാഞ്ഞൊരുശിരൻ കാളക്കിടാവെന്നെയും 
പിന്നാലേ കയറിൽക്കുരുക്കിയുലകം കാണിച്ചു സൌജന്യമായ് 
ഇന്നും മേനിയിലുണ്ടതിന്റെ തെളിവായ് യാത്രാസുഖം തന്നൊരാ 
കന്നിൻ കുഞ്ഞണിയിച്ച മുദ്ര, പൊതിയാൻ കാലം ശ്രമിച്ചെങ്കിലും
ഇല്ലെൻ മുട്ടുമടക്കുകില്ല”, വിരലും പൊക്കിപ്പിടിച്ചെത്രയോ 
കൊല്ലം പാടിനടന്നിരുന്ന വിരുതൻ നേതാവൊരാളിന്നിതാ 
വല്ലാതായ്, നിജശയ്യവിട്ടു നിവരാൻ കാക്കുന്നു വൈദ്യൻ വരാൻ 
പൊല്ലാപ്പായിയുറഞ്ഞമുട്ടിലുഴിയാ,നായാൽ മടക്കീടുവാൻ!!
ചെണ്ടക്കോലിനു വിശ്രമം വരികയായ്, മേളം തുടർന്നീടുവാൻ 
കൊണ്ടൽത്തേരുതെളിച്ചു വർഷപുളകം വന്നെത്തുവാൻ നേരമായ് 
ആണ്ടോരോന്നിലുമെത്തി വാനിലനിശം കൊട്ടിത്തിർമിത്തീടുവാ- 
നുണ്ടേ പണ്ടുമുതൽക്കു സിദ്ധി, കരുതാൻ കെട്ടായ് മഴക്കോലുകൾ!!
കാക്കേ! മാങ്കനിയൊന്നുപോലുമിനിമേൽ കൊത്തിക്കളഞ്ഞീടുവാ- 
നൊക്കില്ലിക്കുറി ഞാനുമെത്തുമധികം വൈകാതെയെന്നൊർക്കണം 
ചക്കയ്ക്കും പ്രിയമുണ്ടു, നിന്റെ വിരുതൻ ചങ്ങാതിയണ്ണാനുമാ- 
യൊക്കെക്കേടുവരുത്തിടൊല്ല, വരവായ് ഗ്രാമോത്സവക്കാഴ്ചകൾ!!!
ചിന്ത‌
കുട്ടന്‍ ഗോപുരത്തിങ്കല്‍
മനസ്സിന്നടിത്തട്ടില്‍ ഘോരാന്ധകാരം
കനക്കുന്നനേരത്തൊരാലംബമായി
ഘനശ്യാമമേഘങ്ങളില്‍‌മിന്നല്‍‌പോലെന്‍
നിനയ്ക്കാത്ത മോഹങ്ങളില്‍ സാന്ത്വമായി
വിരുന്നെത്തിയേതോ ശരത്ക്കാല സന്ധ്യാം-
ബരത്തില്‍ തിളങ്ങുന്ന താരം കണക്കേ 
ഒരാലസ്യവും തോന്നിയില്ലായതിന്നാല്‍
പിരിഞ്ഞീടുമെന്നോര്‍ത്തതേയില്ല ഞാനും
ഫലം ശൂന്യമാണെന്നൊരാബോധമുള്ളില്‍
ജ്വലിക്കുമ്പൊഴും യാത്ര നിര്‍ത്താവതല്ല.
സ്ഥലം കാല മിത്യാദി സങ്കല്‍പ്പ മാര്‍ഗ്ഗേ
ചലിക്കുന്നുവെന്‍ സ്ഥൂലമാമീ ശരീരം.
മറക്കാന്‍ ശ്രമിക്കട്ടെ കൈവന്നതെല്ലാം
പറന്നെന്നെ വിട്ടങ്ങുപോമെങ്കില്‍ പോട്ടേ
നിറംചേര്‍ത്തു ചാലിച്ചതാം പൊയ്‌
മറഞ്ഞോട്ടെ, ഞാനേകനാണന്നുമിന്നും
സർഗ്ഗതപസ്യ
ദീപ കരുവാട്
ജന്തുക്കള്‍, കിളികള്‍, പ്രപഞ്ചനിയമം കാക്കുന്ന വൃക്ഷങ്ങളും
കാടത്തത്തിനുമുണ്ടു കാട്ടു നിയമം മാറ്റങ്ങളില്ലാത്തവർ
നാടേ നാറുകയാണു നീതിയളിയും ദുർഗ്ഗന്ധമായ് പ്പെണ്ണുടൽ
പിച്ചിച്ചീന്തിയിതെത്ര കുഞ്ഞുകവിളും, ചുണ്ടിൻത്തുടിപ്പിൽ മൃതി
കണ്ണില്ലാ ചെവിയില്ല മൂകനവനി ല്ലാ ബുദ്ധിയും കോപവും
തട്ടിത്തച്ചുതകർക്കുകിൽ പ്പൊടിയുകിൽ കൈക്കൊണ്ടിടും മൗനവും
ഇല്ലാ തെറ്റുകളൊക്കെയും ശരികളേ യുള്ളാണ്ടവന്‍ താൻ ദൈവം
കുഞ്ഞേ! നീയറിയേണമിതു വെറും കല്ലായിരിക്കുന്നവൻ
ബോധങ്ങൾ മൃതിയേറ്റു വീണുടയുമെ ന്നാത്മാവിനുള്ളം തപി-
ച്ചന്ധത്വമ്മുറയുന്ന കണ്ണുകളിലോ നോവായ് തിളയ്ക്കുമ്പൊഴേ
ഞാനീ സർഗ്ഗതപസ്സിനായലയുമീ ജന്മം കനൽ നീക്കിയി-
ന്നെന്നില്‍   മൂർച്ചയൊടിഞ്ഞിടാതെ പകരൂ വാക്കിന്റെ ഖഡ്‌ഗം, പ്രഭാ..!
♥♥♥

കവിസദസ്സ്

 

കവികളുടെ അക്ഷരശ്ലോകസദസ്സാണ്, ഇത്. അപ്രകാശിതങ്ങളായ സ്വരചിതശ്ലോകങ്ങള്‍ മാത്രം അനുവദനീയമായ ഇങ്ങനെ ഒരു സദസ്സു സൈറ്റില്‍ നടക്കുന്നു. കഴിഞ്ഞ ലക്കങ്ങളില്‍ സ്രഗ്ദ്ധര, ശാര്‍ദ്ദൂലവിക്രീഡിതം ,മന്ദാക്രാന്ത, മാലിനി, വസന്തതിലകം , രഥോദ്ധത, ദ്രുതവിളംബിതം, പുഷ്പിതാഗ്ര, മഞ്ജുഭാഷിണി, വസന്തമാലിക, വിയോഗിനി, ഭുജംഗപ്രയാതം, ശാലിനി, വംശസ്ഥം, ഇന്ദ്രവജ്ര/ഉപേന്ദ്രവജ്ര/ഉപജാതി, സമ്മത, അപരവക്ത്രം, പ്രഹര്‍ഷിണി, സ്രഗ്വിണി, സ്വാഗത, തോടകം, പഞ്ചചാമരം, ശിഖരിണി, പൃത്ഥ്വി,ശങ്കരചരിതം, ഹരിണി, മല്ലിക, കുസുമമഞ്ജരി, മത്തേഭം,ശംഭുനടനം എന്നീ വൃത്തങ്ങള്‍ അഞ്ചു റൌണ്ടു വീതം പൂര്‍ത്തിയായി.

അടുത്ത അഞ്ചു റൌണ്ടു ' ശ‍ംഭുനടനം ' വൃത്തം സ്വീകരിക്കാമെന്നു നിര്‍ദ്ദേശിക്കുന്നു.

സ്രഗ്ദ്ധര‌ വൃത്തം രണ്ടാമതും ആരംഭിക്കുന്നു.. സൈറ്റില്‍ സദസ്സു ഇപ്പോഴും തുടര്‍ന്നു കൊണ്ടിരിക്കുന്നു. 


പങ്കെടുക്കുന്ന കവികള്‍  1.അരിയന്നൂര്‍ ഉണ്ണിക്കൃഷ്ണന്‍ ,2.കൈതയ്ക്കല്‍ ജാതവേദന്‍, 3.രാമന്‍ നമ്പീശന്‍ കേശവത്ത്, 4.ശ്രീലകം വേണുഗോപാല്‍,5.വാരിയത്ത് കുട്ടി,6.അനിരുദ്ധ വര്‍മ്മ,  7.ജോയ് വാഴയില്‍, 8.ശ്രീജ പ്രശാന്ത്, 9.മധുരാജ് പി സി, 10.നാമംഗലം മാധവന്‍, 11.ആത്രശ്ശേരിശ്രീദാസന്‍, 12.ജയകൃഷ്ണന്‍, 13.ഹരിദാസ് മംഗലപ്പള്ളി, 14.ദാമോദരപ്പണിക്കര്‍ , 15.സുബ്രഹ്മണ്യന്‍ കുറ്റിക്കോള്‍, 16.രാജേഷ് വര്‍മ്മ, 17.പി എന്‍ വിജയന്‍, 18.ഗീത വാസുദേവന്‍, 19.തൃക്കഴിപ്പുറം രാമന്‍, 20.സന്തോഷ് വര്‍മ്മ, 21അനില്‍ക്കൃഷ്ണന്‍ അരിയന്നൂര്‍ 

 

2115
ഇല്ലാ ദാരിദ്ര്യമാര്‍ക്കും, മഴ വെയില്‍ കുളുര്‍ മ
ഞ്ഞൊന്നുമേ കഷ്ടമേകാ
നില്ലാ, കാഠിന്യമേറും പണി പണിവതിനു
ണ്ടന്യനാട്ടാരനേകം,
ചൊല്ലാളും തത്വചിന്താമയമിഹ ദിവസം
നീക്കിടാമോര്‍ക്കിലെല്ലാം
സ്വര്‍ല്ലോകം തന്നെയത്രേ പരമവനിയിലീ
പേരെഴും കേരളശ്രീ
അരിയന്നൂര്‍ ഉണ്ണിക്കൃഷ്ണന്‍ 
2116
ചൊല്‍‌ക്കൊള്ളും പ്രേംനസീറൊത്തഴകിയ വിജയശ്രീ നടിച്ചുള്ളതാം കു -
ഞ്ചാക്കോച്ചിത്രങ്ങളാര്‍ക്കും കരളിനുകുളിരും നര്‍ത്തനത്തിന്റെ വായ്പാല്‍
ഇക്കാലത്തും സ്മരിപ്പേന്‍ സിനിമകള്‍ മലയാണ്മക്കു പൊന്നാപുരം കോ -
ട്ടയ്ക്കൊത്തേതൊന്നു നല്കും കിടുകിടുവിറ തന്‍ വാള്‍പ്പയറ്റിന്റെ മാറ്റാല്‍
രാമന്‍ നമ്പീശന്‍ കേശവത്ത്
2117
ഇന്നേറ്റം ഭക്തിപൂര്‍വ്വം പലവിധ നിറവില്‍ തീര്‍ത്ത മാല്യങ്ങളെല്ലാം
നിന്‍മുന്നില്‍ വച്ചതില്ലേ, കൃപയൊടിവനെയും കാത്തിടേണേ, ഗണേശാ
വന്നീടും ദുഃഖമെല്ലാമുടനടി മുടിയാന്‍ നിന്‍ വരംതന്നെ വേണം
വന്നാലും ദീനബന്ധോ, തവകരമതിലായ് വച്ചിടാം മോദകം ഞാന്‍.
ശ്രീലകം വേണുഗോപാല്‍
2118
നിറ്മാല്യം കാണുവാന് ഞാനിവിടെ ദിവസവും കാത്തുനില്ക്കും പ്രഭാതേ
കാണാറുണ്ടേപ്രസന്നാനനയെ തൊഴുതു കൈകൂപ്പി നില്ക്കും ശുഭാംഗേ
മിണ്ടീട്ടില്ലാപറഞ്ഞില്ല മനസിലുണരും സ്നേഹമെന്നാലുമയ്യോ
പേടിക്കുന്നൂ നിഗൂഢാശ വിധിവിഹിതമോയെന്നു ചിന്തിച്ചു നിത്യം.
വാരിയത്ത് കുട്ടി
2119
മാഹാത്മ്യം ചൊല്ലിടട്ടേ , യറിയുക “ശിവരാത്രത്തിലായ് പാതി നോൽമ്പിൻ
പ്രാധാന്യം തുല്യമല്ലോ ദശശതമധുനാ നോറ്റൊ“രേകാശി““യോതും .
ഏറും പഞ്ചാക്ഷരത്തിൻ ധ്വനികളിൽ ഭഗവാനെസ്തുതിയ്ക്കേ, മനസ്സാം
തേരിന്നേകുന്നു വെട്ടം, ശിവ! ശിവ! ശിവരാത്രീവ്രതം ശ്രേഷ്ഠമേറ്റം.
അനിരുദ്ധ വര്‍മ്മ
2120
ഏതാണ്ടായസ്തമിക്കാനിനനുസമയ,മാ
പശ്ചിമാകാശദേശേ
ഭീതാവുംമട്ടുകാണാം ദഹനനെരിയുമാ
റുള്ളതാം കാഴ്ച, കഷ്ടം!
ആതങ്കക്കോളിളക്കം പടിപടിയുയരാം,
തീക്ഷ്ണമാമാന്ധ്യമുണ്ടാം
കാതങ്ങള്‍ക്കപ്പുറത്തായുയരുമൊരു വിപത്
ഘോഷവുംവന്നടുക്കാം!
ഉണ്ണിക്കൃഷ്ണന്‍ ശ്രീലകം
2121
ആരാഞ്ഞാൾ കുന്തി മുന്നം വിവിധവിധബൃഹ
ത്തീരുമാനത്തിലെത്താ-
നോരോ തൻപുത്രരോടും മത,മതുമെളിയോ
നാദ്യമെന്നാം ക്രമത്തിൽ
നേരോടെച്ചൊന്നിതപ്പോളവരവരവർതൻ
ന്യായവാദങ്ങളേറ്റം
ധൈര്യത്തിൽത്താൻ, മുതിർന്നൊർ മൊഴിയുടെയെതിരായ്
ചൊൽകവേണ്ടെന്ന മൂലം.
തൃക്കഴിപ്പുറം രാമന്‍
2122
നാകേന്ദ്രാദിപ്രണമ്യ, ത്രിപുരനിധന, ഹേ
ദക്ഷഗർവാദ്ധ്വരഘ്ന,
ശ്രീകൈലാസാധിനാഥ, ശ്രുതിവിദിത, മഹാ-
ദേവ, ശംഭോ, സ്മരാരേ
രാകാനാഥാല്പധാരിൻ, തുഹിനഗിരിസുതാ
പ്രാണനാഥ, ത്രിശൂലിൻ,
ശോകം മേ ചിത്തടത്തിൽ വരുവതഖിലവും
നീങ്ങുവാനായ് വണങ്ങാം
ദിലീപ്
2123
രാഷ്ട്രീയക്കാര്‍ക്കു പാടാന്‍ വിവിധകഥകളും വാദവും മറ്റുമാകാം
രാഷ്ട്രത്തിന്‍ കാര്യമൊന്നും പറയുക പതിവീ പാര്‍ട്ടികള്‍ക്കില്ല സത്യം
ദംഷ്ട്രം കാട്ടും ചിരിക്കും, ഹൃദയപരിധിയില്‍ സ്നേഹമൊന്നില്ല നൂനം
രാഷ്ട്രം വില്‍ക്കാനൊരുങ്ങും പുനരിവിടെവരും വോട്ടു ചോദിക്കുവാനായ്
അനിരുദ്ധ വര്‍മ്മ‌
2124
ദുഷ്ടന്മാര്‍ സ്വാര്‍ത്ഥലാഭക്കൊതി പെരുകുകയാലക്ഷരശ്ലോകരംഗേ
കഷ്ടം നമ്മോടു കല്‍പ്പിപ്പിതു രസമതിനായ് രാഗമാം പാലു ചേര്‍ക്കാന്‍
സംഗീതത്തിന്നു പണ്ടേയിതിലൊരു ലവവും സ്ഥാനമില്ലെന്ന സത്യം
ശങ്കാപേതം മറച്ചിട്ടിവരിവിടെ ജയം കൊയ്തു കൂട്ടുന്നു പാട്ടാല്‍
ഡോ രാജന്‍
2125
സംസ്കാരത്തിന്റെ സാരം സഹജനപരനും
നന്മയെസ്സഞ്ചയിക്കാ-
നുൾക്കാമ്പാർന്നോരു സന്മാനസ,മതിലുയരും
കാവ്യസംഗീതശില്പം.
ഇക്കാലത്തുണ്ടനേകം കപടമതികളാം
നേതൃമോഹാർത്തരോടി-
സ്സംസ്കാരത്തിന്റെ സിംഹാസനമതിലവരോ-
ധിക്കുവോർ തങ്ങളെത്താൻ.
ജോയ് വാഴയില്‍
2126
ഇന്നും വന്നില്ല സൂര്യൻ, വഴിയിലെവിടെയും നല്ലിരുട്ടാ,ണിരുട്ടിൽ
മിന്നും മിന്നാമിനുങ്ങിൻ ചെറിയ ബഹളമാണിപ്പെരും പൂരമെല്ലാം
തന്നിൽത്താനേയുരുക്കിത്തെളിവോടു തികവിൽ കത്തിയൊന്നുജ്ജ്വലിക്കാ- 
ന്നൊന്നായ് മുന്നേറിടട്ടേ വനിതകള,വരിൽ നിന്നുയിർക്കും വിഭാതം!

ശ്രീജ പ്രശാന്ത്

 

2127
തെങ്ങിൽക്കേറുന്നതല്ലോ വലിയൊരുകഴിവെന്നോർത്തു കൌമാരകാലം
തെങ്ങേറ്റം ഞാൻ പഠിച്ചെങ്കിലു,മൊരുവനുമിങ്ങില്ല തെങ്ങൊന്നുപോലും!
വ്യങ്ഗ്യം താൻ കാവ്യശൈലിക്കുചിതമിതിനിനച്ചാണു ശീലിച്ചതാമ; -
ട്ടങ്ഗീകാരങ്ങൾ പച്ചത്തെറി പകലുമുറഞ്ഞോതുവോർക്കെന്നു മാത്രം !
പി സി മധുരാജ്
2128
വള്ളത്തോളിൻ വിപഞ്ചിക്കരികിലൊരു ദിനം
സ്തബ്ധനായ് കേരഭൂവി-
ന്നുള്ളം കണ്ടാർത്തമോദം സ്വര നദിയിലഹോ
മുങ്ങിനീന്തുന്നു ഞാനും!
വെള്ളം തഞ്ചിത്തുഴഞ്ഞക്കവിതയതിമുദാ
കൊഞ്ചിയാടുന്ന നേരം
കള്ളം പാടിത്തെളിയ്ക്കും മമ രഥമനിശം
പാഞ്ഞിടുന്നൂ നഭസ്സിൽ!
ആത്രശ്ശേരിശ്രീദാസന്‍
2129
വാക്കിൻസ്ഥാനം,പ്രയോഗം,പിഴവുകളിവയിൽ -
സ്സംഭവിച്ചെന്നു വന്നാ-
ലാർക്കുംതെറ്റാംമനസ്സിൻസമനില നിമിഷo
കൊണ്ടൊരായുസ്സു തീരാം;
കേൾക്കാനിമ്പം കുറഞ്ഞാൽ ജ്ജന മതിനൊരു പാ -
ടർത്ഥ ഭേദം ചമയ്ക്കാം
വാക്കേ സർവ്വ പ്രധാനം കരുതുകി ലതു ന-
ന്നേതു പോലീസുകാർക്കും.
ദാമോദരപ്പണിക്കര്‍ 
2130
കേളീ നമ്മൾ കളിക്കും കളിയിതിലൊരുനാൾ തോല്ക്കുവാനുള്ളവൻ ഞാൻ
നീങ്ങാമെങ്ങോട്ടുമെന്നാൽ നിലയിതൊരു വെറും കള്ളിയിൽമാത്രമല്ലോ!
നീളുന്നെന്നും മുഷിപ്പൻ സമനിലകളിലായ് തെല്ലു വ‌ത്യാസമെന്യേ
നീയും ഞാനും നരച്ച,ല്ലടിയറവരശിന്നേതു കള്ളിക്കകത്തോ
സുബ്രഹ്മണ്യന്‍ കുറ്റിക്കോല്‍
2131
നാദം, സ്പന്ദം, വെളിച്ചം, സമയ, മളവെഴാപ്പഞ്ചഭൂതങ്ങളെല്ലാം
തോതിൽച്ചേർത്തിട്ടു വിശ്വം പണിവൊരു വിരുതൻ ബ്രഹ്മനാശാരിപോലും
ആർതൻ കണ്ണിൻ മുഴക്കോലണുവിട വെടിയാതേ മുറുക്കെപ്പിടിക്കു-
ന്നായമ്മേ വന്നു ചെമ്മേ നടമരുളണമേ നാവിലമ്മേ മുദാ മേ.
രാജേഷ് ആർ. വർമ്മ
2132
അത്യന്തംസുന്ദരംനിൻമിഴിയിണ,യതിനി
ല്ലൊട്ടുമേശങ്കയെന്നാ-
ലത്യാപത്തിങ്കലാണേയധരയുഗവുമാ
പ്പല്ലുനാലെണ്ണവുംകേൾ
സത്യംഞാനാചരിക്കാംപരിചൊടുപതിതൻ
നിത്യകർത്തവ്യമെന്നാൽ
പ്രീത്യാഞാൻചൊല്ലിടട്ടേ,പറയരുതിവനോ
ടൊന്നുനീയുമ്മവെയ്ക്കാൻ.
പി എന്‍ വിജയന്‍
2133
സാരംകൂടുന്നു, മക്കള്‍ക്കമിതസുഖ മതേകീടുവാന്‍ വെമ്പലാര്‍ന്നൂ
സാരം ചൊല്ലിക്കൊടുക്കേണ്ടതു പലതുമഹോ പാര്‍ക്കില്‍ നിസ്സാരമാര്‍ക്കും
ആരായാന്‍ നേരമില്ലാ,യപരനുടെ സുഖം തന്നിലേക്കങ്ങൊതുങ്ങീ-
ട്ടാരോടും പത്ഥ്യമില്ലാതി വിടെ നരകുലം സ്വാര്‍ത്ഥലോകത്തില്‍ മഗ്നര്‍
ഗീത വാസുദേവന്‍
2134
സത്തേറും പൂർവ്വികന്മാർ പടിവരെ പതിവായ്
പോയ് തിരക്കുന്നതാം, " കേ -
ളത്താഴപ്പട്ടിണിക്കാരിവിടെയൊരുവനു
ണ്ടെങ്കിലിങ്ങുണ്ണുവാനായ്
എത്തേണം വേഗ"മെന്നങ്ങവനവനുടെയൂ
ണിന്നുമുമ്പായ്, മുറയ്ക്കീ-
കൃത്യം തെറ്റിച്ചിടാതാനരവയറു നിറ
യ്ക്കുന്നതാം കൂട്ടർ പോലും.
തൃക്കഴിപ്പുറം രാമന്‍ 

 

2135
ഏറും കൂറോടെയെന്നും പകലുമിരവുമായ് 
ദേവികേ! നിൻപദാബ്‌ജം 
വീറോടല്ലോ ഭജിപ്പൂ കവനകുതുകിയാ-
മീയിവൻ കാമമെന്യേ 
മാറോടൊന്നിച്ചു ചേർത്താ,ക്കരയുഗളബല-
ത്തള്ളലാലെന്നെയിപ്പോൾ-
ത്തീറാക്കീടൊല്ല, വീണേനടിയിലഭയദേ!
കൈരളീകാവ്യകന്യേ!
സന്തോഷ് വര്‍മ്മ‌
2136
മാനത്തിന്തേ തെളിഞ്ഞൂ നിറമെഴുമഴകാം 
മാരിവില്‍?  പൂമണം തൂ
വാനായെന്തേ നിരന്നൂ സുമഗണസുരഭീ
സുസ്മിതം വാടിതോറും!
താനേകൂകാന്‍ തുടങ്ങീ കുയിലിണകളഹാ 
വന്നണഞ്ഞൂ വസന്തം
ഞാനോര്‍ത്തീടുന്നുവെന്നാല്‍ ഹൃദയമഴലിനാല്‍ 
തേങ്ങിടുന്നൂ നിരന്തം
അനില്‍ക്കൃഷ്ണന്‍ അരിയന്നൂര്‍

 

♥♥♥ 

സമസ്യ 

(സൈറ്റില്‍ കൊടുക്കുന്ന സമസ്യകളും പൂരണങ്ങളും )

 

സമസ്യ നമ്പർ 286
ഈ നാലുമോർക്ക, ദുരിതാഗ്നിയണയ്ക്കുമാർക്കും
സമസ്യാകാരൻ: എ ആര്‍ ശ്രീകൃഷ്ണന്‍
വൃത്തം: വസന്തതിലകം
1
നിന്‍ നാവിലെന്നുമുയരേണമവന്റെ നാമം
തന്നാല്‍ക്കഴിഞ്ഞവിധമുള്ള സഹായ, സാന്ത്വം
എന്നാളുമേകിടുക, മാപ്പുകൊടുക്ക ദുഷ്ടര്‍-
“ക്കീ നാലുമോർക്ക, ദുരിതാഗ്നിയണയ്ക്കുമാർക്കും“
കുട്ടന്‍ ഗോപുരത്തിങ്കല്‍
2
ആനപ്പുറത്ത് കനകക്കുടയേന്തി ദേവൻ
സാനന്ദമീ നഗര വീഥിയിലുല്ലസിക്കേ 
വേണം പ്രദക്ഷിണ, ജപം, തൊഴുകാം നമിക്കാം 
ഈ നാലുമോർക്ക, ദുരിതാഗ്നിയണക്കുമാർക്കും -
നരേന്ദ്രന്‍ പി കെ
3
ആനപ്പുറത്തു കയറുന്നതു, കാട്ടുതീ തന്‍
ചാരെഗ്ഗമിപ്പതു, കരുത്തനൊടേറ്റുമുട്ടല്‍
നാരീജനങ്ങള്‍ പറയുന്നതു വിശ്വസിക്ക-
ലീ നാലുമോര്‍ക്ക ദുരിതാഗ്നിയണയ്ക്കുമാര്‍ക്കും
ഡോ രാജന്‍
4
തേനായിടഞ്ഞമൊഴിമാരൊടു ചാര്‍ച്ച, വമ്പ
ന്മാരോടു ശത്രുത, ധനത്തിലതീവ സക്തി 
താനാണു സര്‍വ്വരിലുമുന്നതനെന്ന ചിന്ത
യീ നാലുമോര്‍ക്ക ദുരിതാഗ്നിയണയ്ക്കുമാര്‍ക്കും
ഡോ രാജന്‍
5
ഈ നാടുവാഴുമരചന്നു നയം നടത്താൻ
ഈനാശുമന്ത്രി ചെവിയിൽ പകരുന്നു മന്ത്രം:
ഈനാളിലത്രെ ശമനം ധന,ഭേദ,ദണ്ഡം
ഈ നാലുമോർക്ക, ദുരിതാഗ്നിയണയ്ക്കുമാർക്കും
സുബ്രഹ്മണ്യന്‍ കുറ്റിക്കോല്‍
6
ഈ നാവിനാൽ മൊഴിയുമേഷണിവാക്കു, നീതി-
മാനായ മർത്ത്യനൊടു വൻചതി, ദുഷ്ടനേകും
മാനാദരങ്ങ,ളബലയ്ക്കരുളുന്ന ഭീതി-
ഈ നാലുമോർക്ക, ദുരിതാഗ്നിയണയ്ക്കുമാർക്കും
ജോയ് വാഴയില്‍
7
എന്നുംപരിശ്രമ, മചഞ്ചലഭക്തി, യുള്ളിൽ-
മിന്നുന്നകൂറു, മിടറാത്തമനക്കരുത്തും
വേനൽക്കൊടുംവെയിലിലൊട്ടൊരു വർഷമേകാ-
നീനാലുമോർക്ക, ദുരിതാഗ്നിയണയ്ക്കുമാർക്കും
രാധാദേവി
8
ദീനാനുകമ്പ, ദൃഢചിത്തത, കര്‍ മ്മ‌മാര്‍ഗ്ഗേ
മാനാവമാനനിരപേക്ഷത, ദാനശീലം
മാനാഥഭക്തിയൊടു ചേര്‍ന്നു വരുന്നതെങ്കി
ലീ നാലുമോര്‍ക്ക ദുരിതാഗ്നിയണയ്ക്കുമാര്‍ക്കും
അരിയന്നൂര്‍ ഉണ്ണിക്കൃഷ്ണന്‍ 
9
തേനായുടുന്ന മൊഴി, ഹാ! നിറസാന്ത്വനത്താ
ലാനന്ദമേകിടുമൊരാ കരലാളനങ്ങള്‍
സസ്നേഹചിത്ത,മഹ‌നിര്‍ഭയമിത്ര,മേറും
ഈ നാലുമോര്‍ക്ക ദുരിതാഗ്നിയണയ്ക്കുമാര്‍ക്കും
അനില്‍ക്കൃഷ്ണന്‍ അരിയന്നൂര്‍
10
തള്ളേണ്ടവ
നാനാതരം മദ, മദമ്യതയാർന്ന മദ്യ-
പാനാദിശീല, മധികാരവിലോലചിത്തം
ഹീനാന്തരംഗമെഴുവോരൊടിയന്ന സംഗം
- ഈ നാലുമോർക്ക, ദുരിതാഗ്നിയണയ്ക്കുമാർക്കും.
ആര്‍ ശ്രീകൃഷ്ണന്‍
11
കൊള്ളേണ്ടവ
ശ്രീനാഥഭക്തി, ബുധസംഗമ,മംഗജന്നു
പീനാന്ധ്യമോടടി പണിഞ്ഞമരാത്ത ചിത്തം.
ദീനാവനത്തിനുതകും പൃഥുകർമ്മമാർഗം
-ഈ നാലുമോർക്ക, ദുരിതാഗ്നിയണയ്ക്കുമാർക്കും.
ആര്‍ ശ്രീകൃഷ്ണന്‍

 

 

 

കാവ്യകേളി


(ഭാഷാവൃത്തകവിസദസ്സ് )

ഭാഷാവൃത്തത്തിലുള്ള സ്വരചിതങ്ങളായ കവിതാഖണ്ഡങ്ങള്‍ കവികള്‍ കാവ്യകേളിയുടെ നിയമമനുസരിച്ചു പോസ്റ്റു ചെയ്യുന്ന സദസ്സാണ് ഇത്. ഇതില്‍ പങ്കെടുക്കുന്ന ഏഴു കവികള്‍ ഈ ക്രമത്തിലാണ്, ഇരിക്കുന്നത്:

1.അരിയന്നൂര്‍ ഉണ്ണിക്കൃഷ്ണന്‍ , 2..രാമന്‍ നമ്പീശന്‍ കേശവത്ത്, 3. ശ്രീലകം വേണുഗോപാല്‍, 4.അനില്‍ക്കൃഷ്ണന്‍ അരിയന്നൂര്‍ ,  5. വാരിയത്ത് കുട്ടി, 6.പൊതാളൂര്‍ വിജയന്‍ 8. ഉണ്ണിക്കൃഷ്ണന്‍ ശ്രീലകം 9. തൃക്കഴിപ്പുറം രാമ‍ന്‍ 10. സന്തോഷ് വര്‍മ്മ

ഈ സദസ്സ് 01-01-2013 നു ആരംഭിച്ചു

815
ആരുണ്ടിവിടെ ആണായൊരുത്തന്‍
നേരു പുലരാന്‍ വേണമൊരുത്തന്‍
ആയുസ്സൊടുങ്ങാത്ത ചാവു തടയാന്‍
അന്തിക്കു പെണ്ണിനു കാവലു നില്ക്കാന്‍
എരിവയറങ്കിലും പ്രാണന്‍ പുലര്‍ത്താന്‍
അരവയറന്നം നയിച്ചു നല്കാന്‍
ഉയിരു കളഞ്ഞിട്ടും നാടിന്‍റെ മാനം
ഉലകിലെമ്പാടുമുയര്‍ത്തി നാട്ടാന്‍
അരിയന്നൂര്‍ ഉണ്ണിക്കൃഷ്ണന്‍
816
ഏവനും കുലീനത്വം ധനത്തിനാ -
ലാവതാമൊപ്പം പാണ്ഡിത്യഭാവവും 
കീര്‍ത്തിയും വരുമേതു വിഷയവും 
പാര്‍ത്തു നിര്‍ണ്ണയം ചെയ്യാം ഗുണാഗുണം 
തന്മയത്വം പ്രസംഗിക്കാം വേഷത്താല്‍ 
കണ്‍മയക്കാം സദസ്യരെയാകവെ 
ആശ്രയം നല്കുമെല്ലാ ഗുണങ്ങള്‍ക്കും 
ശാശ്വതമായ കാഞ്ചനം വിശ്രുതം 
രാമന്‍ നമ്പീശന്‍ കേശവത്ത്
817
തീക്ഷ്ണനൈരാശ്യമേ,ദുഃഖമേ,വേദന-
യാര്‍ക്കും സ്മൃതികളേ നിങ്ങള്‍
വന്നാലുമെന്നുടെകൂടെ സ്വര്‍ഗ്ഗത്തിലും
എന്‍ സഹചാരികളായി
സ്വര്‍ഗ്ഗത്തിലാര്‍ക്കുമമാനമാനന്ദമാ-
ണെന്നു ഞാന്‍ കേള്‍പ്പതിനാലേ
നിങ്ങള്‍ക്കുമാ സൌഖ്യമേകുവാനെന്‍ മനം
വൈരാഗ്യമെന്യേ തുടിപ്പൂ
ശ്രീലകം വേണുഗോപാല്‍
818
സങ്കടമുള്ളിലൊട്ടേറെയു,ണ്ടെന്നിലായ്
എങ്കിലും കണ്ണുനീര്‍ത്തുള്ളിയൊന്നും
തെല്ലുമേ വീഴ്ത്തില്ല‌! തീര്‍ച്ച,യെന്നാധിയൊ
ന്നില്ല ഞാനാരോടുമോതുകില്ല‌
മഞ്ജിമശ്രീയെഴും മന്ദസ്മിതങ്ങള്‍ ഞാന്‍
ചെഞ്ചുണ്ടിലാകേ വരച്ചുചേര്‍ക്കും
പുഞ്ചിരിപ്പൂക്കള്‍ തന്‍ സൌരഭ്യമേകിയെന്‍
നെഞ്ചിലെ ദുഃഖം മറച്ചുവെയ്ക്കും
അനില്‍ക്കൃഷ്ണന്‍ അരിയന്നൂര്‍
819
മാതാവു കുഞ്ഞിനമ്മിഞ്ഞ കൊടുക്കുന്ന
ചിത്രമിന്നേറെ വിവാദവിഷയമായ്
കാണുവാനെന്താണു കാരണമെന്നുഞാൻ
എന്നുള്ളിലേയ്ക്കു ചികഞ്ഞു ചിന്തിക്കവേ
കണ്ടതു പണ്ടത്തെ കൂട്ടുകുടുംബവുമെത്രയും
നിർമ്മലരായുള്ള ചേച്ചിമാർ തെക്കിനിത്തിണ്ണയിൽ
മാറും മറയ്ക്കാതെ കുഞ്ഞിനെയൂട്ടുന്നതും, നാട്ടു
കാര്യങ്ങൾ തമ്മിൽ പറഞ്ഞു രസിപ്പതും.
വാരിയത്ത് കുട്ടി
820
കണ്മണീ നിന്‍മുഖം കാണുന്ന നേരത്തു
കണ്ണനെന്‍‍ മുമ്പില്‍വന്നെന്നപോല
മഞ്ജുളമായുള്ള കൊഞ്ചല്‍കേള്‍ക്കുന്നതോ
സഞ്ചിതസ്നേഹാമൃതോപമാനം
പുഞ്ചിരിച്ചങ്ങനെ നില്ക്കുമേ നീ നല്ല
ചെമ്പനീര്‍പ്പൂവു വിടര്‍ന്നപോലെ
എന്മനസ്സെപ്പൊളും നിന്നെക്കുറിച്ചുള്ള ‍
സങ്കീര്‍ത്തനങ്ങള്‍ താന്‍ മൂളുന്നു
ഉണ്ണിക്കൃഷ്ണന്‍ ശ്രീലകം
821
പഴയ കാലത്തോരോ സംസ്ക്കാര ബീജങ്ങൾ
പുഴയുടെ തീരത്തു പൊന്തി വന്നൂ;
നദിയിലെ വെള്ളത്തിൻവൃദ്ധിപോലായവ
യതിവേഗം നന്നായ് തഴച്ചുവന്നൂ.
മതിമാനാം മർത്യനാപ്പുഴകളെക്കൊന്നിട്ടൊ-
ട്ടിതു കാലമാദിക്കിൽക്കൊണ്ടു തള്ളി
മലമൂത്രാദ്യങ്ങളാം മാലിന്യം പിന്നെപ്പോ -
യലയുന്നൂ കുടവുമായ് കുടിനീരിന്നായ്
തൃക്കഴിപ്പുറം രാമന്‍ 
822
മാറീടുന്നുലകിലെഴും വസ്തുവെല്ലാം കാലത്തിന്റെ
വീറെഴുന്ന കുത്തൊഴുക്കിൽ പെടുമളവിൽ
നീറീടേണ്ടക്കാര്യമോർത്തു വലുതാമീ പ്രപഞ്ചവും
താറുമാറായി നശിച്ചു പോകുമൊരുനാൾ
ഏറിടുന്ന മോഹമൊരു ഭൗതിക വസ്തുവിൽ ചേർന്നു
പേറിടുന്ന മനസ്സിനു വ്യഥയേകുമ്പോൾ
വേറിടുന്ന ചിന്തകളിൽ മുങ്ങിപ്പൊങ്ങി വലയാതെ
കൂറോടെ കർമ്മമാർഗത്തിൽ ചരിക്കുക നാം

സന്തോഷ് വര്‍മ്മ‌

പുതിയ കവിതകള്‍ 

കൊന്ന 
സുബ്രഹ്മണ്യന്‍ കുറ്റിക്കോല്‍
കൊന്ന നില്ക്കുന്നൂ ദൂരെ പൊന്നുപൂങ്കുലയോടെ 
ഇന്നലെ നോക്കുന്നേരം കണ്ടതില്ലവളെഞാൻ 
എന്നുമീ ജനാലതന്നഴികൾക്കിടയിലൂ 
ടൊന്നുമേ കാണാറില്ലാ പച്ചിലച്ചാർത്തല്ലാതെ 
വന്നുവോ വിഷു? പുലർക്കാക്കകളോടോതി ഞാൻ 
കേട്ടഭാവമില്ലാതെ കൂട്ടമായ് പറന്നുപോയ് 
നാളെയാണല്ലോ വിഷു ചായയുമായെത്തിയ 
ചിഞ്ചുമോൾ ചിരിച്ചോതി പൂത്തിരി കത്തുന്നപോൽ. 
കൊണ്ടുവന്നൊരു പത്രം കണ്ടുഞാൻ നടുങ്ങിപ്പോയ് 
ഹൃദയം തുടിക്കവേ കാലുകൾ തളർന്നുപോയ്
വീണുപോകാതേവേഗം കട്ടിലിലിരുന്നു ഞാൻ 
കൊന്നപ്പൊന്നൊളിയെന്തേ നിണമായ്പ്പടരുവാൻ?
കണ്ണടച്ചിട്ടും പൂവിൻ  കുങ്കുമമുഖമെന്റെ 
നെഞ്ചിലെക്കനൻപോലെ ചുട്ടു നീറുകയല്ലോ. 
കണ്ണടച്ചിരുട്ടാക്കി ഞാൻ കിടക്കവേ കേൾക്കാം 
തകർന്ന ക്ഷേത്രത്തിലെ വിഗ്രഹത്തിൽ രോദനം 
ചത്തകാക്കയ്ക്കായ് കാക്കക്കൂട്ടവും കരയുന്നൂ 
കൊന്ന കേഴുന്നൂ ദൂരെ കൊന്നതില്ലാരേയും ഞാൻ 
ഇന്നേഞാനെത്തീ നിന്നെക്കണികാണിക്കാനായി 
പൊന്നണിഞ്ഞുനില്ക്കുന്നൂ കണ്ണുകൾ തുറക്കുക 
എത്തുമിന്നവർ കാതും കഴുത്തും കവർന്നീടാൻ 
കൊന്നുനേടുന്നൂ കണിക്കൊന്നയെക്കച്ചോടക്കാർ  
പൊന്നൊളിയല്ലാ തെളിയുന്നതെൻ നെഞ്ചിന്നുള്ളിൽ  
കനലായെരിയുന്നൂ കുങ്കുമപ്പൂവിൻ മുഖം
ഇനി എങ്ങോട്ട്?
ഗീത വാസുദേവന്‍
കാലമേ നീയെങ്ങോട്ടു പോകുന്നൂ തലതല്ലി 
ച്ചാകുവാന്‍ പോലും ഗതികെട്ടൊരീയവസ്ഥയില്‍
മാതൃ ധര്‍മ്മവും,പിതൃ ധര്‍മ്മം ,സോദരധര്‍മ്മം
മാനവ ധര്‍മ്മാദികള്‍ ഭൂവിനെ വെടിഞ്ഞു പോയ്
ചപലവികാരമാര്‍ഗ്ഗങ്ങളില്‍ ചരിക്കുന്ന 
മനുജന്‍,! അവനെയമ്മട്ടു ചൊല്ലുവാനാമോ?
വെന്തു വെണ്ണീറാകുവാനുള്ളൊരു ശരീരത്തി-
ന്നന്തമില്ലാത്ത കാമദാഹത്തെത്തീര്‍ത്തീടുവാന്‍
നൊന്തുപെറ്റ കുഞ്ഞിന്റെ പിഞ്ചിളം ശരീരത്തെ
ഹന്ത! ജാരനു കാഴ്ചവെച്ച, രും കൊലചെയ്ത
അമ്മയെന്ന വാക്കവള്‍ കേള്‍ക്കുവാനുമര്‍ഹയ-
ല്ലമ്മ പെറ്റതോയിവള്‍ അന്തകന്‍ ഭയന്നു പോം
പുത്രനെക്കൊല ചെയ്തു മറ്റൊരുത്തിയിങ്ങിതാ
തീര്‍ത്തിതു കലി ജഡത്തിന്മേലെന്നല്ലൊ കേള്‍പ്പൂ
പുത്രനാണെന്നാകിലും മര്‍ത്ത്യ ദ്രോഹിയെന്നാകില്‍ 
വധ്യനെന്നൊരു തത്വം കേട്ടു കേള്‍വിയുണ്ടല്ലൊ 
എന്നാല്‍,ദുര്‍ന്നടത്തയ്ക്കായ് മക്കളെ ക്കൊന്നീടുവോര്‍
ക്കെന്തു ശിക്ഷ യെന്നോതാനാവില്ലാ ശാസ്ത്രത്തിനും
ഭൂമി മാതാവേ! തവ കോപ ജ്വാലയാമഗ്നി 
യീദുരാത്മാക്കളെയു മെരിച്ചു കളയട്ടേ
,പാത തന്‍ മദ്ധ്യേ കെട്ടി പ്പാഷാണ മെറിയണം 
വേദനയെന്തെന്നതു വേണ്ട പോലറിയണം
കാലമേ നിനക്കുമി ക്കോലങ്ങള്‍ വഹിക്കാതെ 
പോകുവാനാവില്ലല്ലോ ദുസ്സഹമതും പാര്‍ത്താല്‍
ഓര്‍മ്മകള്‍
അനില്‍ക്കൃഷ്ണന്‍ അരിയന്നൂര്‍ 
ആരാമമാകേ വിരിഞ്ഞൂ പൂക്കള്‍
സൌരഭ്യമേറേ ചൊരിഞ്ഞൂ
പാറിടും ശലഭങ്ങളെത്തീ വാടി
തോറുമേ ഭംഗി വിടര്‍ത്തീ
പിച്ചകത്തെച്ചികള്‍ പൂത്തൂ നല്ല‌
കൊച്ചുകാറ്റേറ്റൂ തളിര്‍ത്തൂ
മന്ദമായാടുന്നു തെല്ലാ കുഞ്ഞു
മന്ദാരപുഷ്പങ്ങളെല്ലാം
ചന്തമാം കാഴ്ചകളിന്നും എന്റെ
അന്തരംഗേയൊളി ചിന്നും
ഓര്‍മ്മയായോടി കളിയ്ക്കും ഞാനാ
നൈര്‍മ്മല്യമൊന്നു ലാളിയ്ക്കും

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥



 

www.aksharaslokam.com

 

സൈറ്റില്‍ അംഗമാകാന്‍  ഇപ്പോള്‍ തന്നെ റജിസ്റ്റര്‍   ചെയ്യുക.(ഹോം പേജില്‍

റജിസ്റ്റെര്‍ ഇന്‍ ക്ലിക്കു ചെയ്തു കോളങ്ങള്‍ പൂരിപ്പിക്കുക)

 

സൈറ്റില്‍ ലഭ്യമായ പുസ്തകങ്ങള്‍ 

 

 
1.സഹസ്രദളം :


ഗ്രന്‍ഥകര്‍ത്താവ് : അരിയന്നൂര്‍ ഉണ്ണിക്കൃഷ്ണന്‍

അഷ്ടപ്രാസം ,യമകവിദ്യ, ഗോഹത്യയും ബ്രഹ്മഹത്യയും എന്ന മണി
പ്രവാള ഖണ്ഡകാവ്യം ,കറുത്ത ചേകവന്‍ എന്ന പച്ചമലയാളം കാവ്യം,
രസരാജന്‍, കുറിമാനം (എഴുത്തുകുത്തുകള്‍ , ആശംസകള്‍ , ചരമശ്ലോക
ങ്ങള്‍), അക്ഷരശ്ലോകമാഹാത്മ്യം (നൂറു പൂക്കള്‍, അംബോപദേശം) , തിരു
ശേഷിപ്പ് എന്നിങ്ങനെ എട്ടു അദ്ധ്യായങ്ങളിലായി ആയിരത്തിലധികം 
ശ്ലോകങ്ങള്‍ അടങ്ങുന്ന കൃതി. 2000ത്തില്‍ കൂനംമൂച്ചി അക്ഷരശ്ലോകവേദി 
പ്രസിദ്ധീകരിച്ചു.


2.അരിയന്നൂര്‍ :


അരിയന്നൂര്‍ ഗ്രാമത്തിന്റെ സാംസ്ക്കാരിക ചരിത്രം . ക്ഷേത്രത്തെക്കുറി
ച്ചുള്ള വിശദവിവരങ്ങള്‍ . ആധുനിക കാലഘട്ടത്തിലെ സം ഭവങ്ങളുടെ 
വിവരണം . കൂടാതെ നൂറോളം സരസശ്ലോകങ്ങള്‍ editor അരിയന്നൂര്‍ 
ഉണ്ണിക്കൃഷ്ണന്‍


3.അക്ഷരശ്ലോക ഡയറക്ടറി 2000:


ഗ്രന്‍ഥകര്‍ത്താവ് : അരിയന്നൂര്‍ ഉണ്ണിക്കൃഷ്ണന്‍

അക്ഷരശ്ലോകകലാരംഗത്തുള്ള സംഘടനകളുടെയും വ്യക്തികളുടെയും 
വിവരങ്ങള്‍ അടങ്ങുന്ന ഇത:പര്യന്തമുണ്ടായിട്ടുള്ള ഏക കൃതി.


4.ഉപനയനം :

ഗ്രന്‍ഥകര്‍ത്താവ്: ആദരേടത്ത് നീലകണ്ഠന്‍ ഭട്ടതിരിപ്പാട്
ആദരേടത്തിന്റെ ശ്ലോകങ്ങളുടെ സമാഹാരം .'മയൂരദൂത്' എന്ന സന്ദേശ
കാവ്യത്തിന്റെ പരിഭാഷ പൂര്‍ണ്ണ രൂപത്തില്‍ ഈ പുസ്തകത്തില്‍ഉണ്ട്.

5.കണ്ണോക്ക് :

ടി.എം . പോള്‍ മാസ്റ്റര്‍ സ്മരണിക. കേരളത്തിലെ പ്രഗത്ഭരായ അക്ഷര
ശ്ലോകപ്രവര്‍ത്തകരുടെ പ്രൌഢലേഖനങ്ങള്‍,പഴയ നൂറു കവികളുടേതാ
യി നൂറു ശ്ലോകങ്ങള്‍ ,കൊച്ചുണ്ണിത്തമ്പുരാന്റെ 'കാന്തവൃത്തം ' എന്ന 
പുസ്തകത്തിന്റെ പൂര്‍ ണ്ണരൂപം എന്നിവ ഉള്ളടക്കത്തില്‍ പെടുന്നു.

6.തിലാഞ്ജലി:

പണ്ഡിതവര്യനും ബഹുമുഖപ്രതിഭയുമായിരുന്ന കാര്യാട്ടുശങ്കുണ്ണിനായര്‍
കൂനമ്മൂച്ചി അക്ഷരശ്ലോകവേദി അദ്ധ്യക്ഷനായിരിക്കെ 1989ല്‍ അന്തരിച്ചു. 
അക്കാലത്തു പ്രസിദ്ധീകരിച്ച ഒരു സ്മരണികയാണു 'തിലാഞ്ജലി'. മാട
മ്പു കുഞ്ഞുകുട്ടന്റെ അനുസ്മരണലേഖനം, മണ്മറഞ്ഞു പോയ എന്‍.ഡി. 
കൃഷ്ണനുണ്ണി,കെ.എന്‍ഡി., ആദരേടം ,നെല്ലുവായ് കെ.എന്‍ നമ്പീശന്‍ തു
ടങ്ങി പലരുടെയും ശ്ലോകരചനകള്‍ എന്നിവ ഉള്ളടക്കത്തില്‍ പെടുന്നു.

7.ശിവൊള്ളിക്കൃതികള്‍ :

ശിവൊള്ളിയുടെ ലഘു ജീവചരിത്രക്കുറിപ്പു, ദാത്യൂഹസന്ദേശം കാവ്യം, 
തെരഞ്ഞെടുത്ത 60 ശ്ലോകങ്ങള്‍ എന്നിവയാണ് ഉള്‍ക്കൊള്ളിച്ചിട്ടുള്ളത്.

8.ശ്ലോകമേവ ജയതേ :

മണ്മറഞ്ഞ ശ്ലോകപ്രതിഭകളെ പരിചയപ്പെടുത്തുക എന്ന ഉദ്ദേശത്തോടെ 
ആരംഭിച്ചിട്ടുള്ള ഒരു പംക്തിയാണു ഇത്.

9.രാമകൃഷ്ണവിലോമകാവ്യം :

ഗ്രന്‍ഥകര്‍ത്താവ് : സൂര്യകവി
ജലജ എന്ന വാക്കു അനുലോമമായും പ്രോമമായും ഒരേ പോലെ വാ
യിക്കാവുന്ന പദമാണ്. മോരു തരുമോ എന്ന വാക്യം ഇപ്രകാരം തന്നെ. 
വിലോമപദം ,വിലോമവാക്യം എന്നിങ്ങനെ ഇവയെ വിളിക്കാം. വാക്യം
വലുതാകും തോറും ഇത്തരം ​ഘടന ക്ലിഷ്ടമാകുന്നു. ഇംഗ്ലീഷില്‍ ഒരു ആ
ശയം പ്രകടിപ്പിക്കുന്ന ഏറ്റവും വലിയ വിലോമവാക്യം a man, a plan, a 
canal, panama എന്നാണെന്നു ഗിന്നസ് ബുക്കില്‍ കൊടുത്തിട്ടുണ്ട്.
ഇവിടെ ഇതാ ഒരു സംസ്ക്കൃത കാവ്യം. എല്ലാ ശ്ലോകങ്ങളും വിലോമ
ങ്ങള്‍! മാത്രമല്ല, രണ്ടു ഇതിവൃത്തങ്ങള്‍ ഒരേസമയം പറഞ്ഞു പോകുക
യും ചെയ്യുന്നു. ശ്ലോകങ്ങളുടെ പൂര്‍വ്വാര്‍ദ്ധങ്ങള്‍ ശ്രീരാമകഥ പറഞ്ഞു 
പോകുമ്പോള്‍ ഉത്തരാര്‍ദ്ധങ്ങള്‍ ശ്രീകൃഷ്ണകഥ പറഞ്ഞു പോകുന്നു. കാ
വ്യകാരന്റെയും സംസ്ക്കൃത ഭാഷയുടെയും മഹത്വം! നമ്മുടെയെല്ലാം 
സുകൃതവും .
രാമകൃഷ്ണവിലോമകാവ്യത്തിനു മലയാളവ്യാഖ്യാനം തയ്യാറായിട്ടുള്ള
തു ഖണ്ഡശ: പ്രസിദ്ധീകരിക്കുന്നു. ആദ്യശ്ലോകത്തിന്റെ വ്യാഖ്യാനംകൊടു
ത്തിട്ടുണ്ട്.പണ്ഡിതോത്തമനായശ്രീ.മച്ചട്ട് ടി.നീലകണ്ഠന്‍ നമ്പീശനാണു 
വ്യാഖ്യാതാവ്.

10.ഗോശാല:

ഗ്രന്‍ഥകര്‍ത്താവ് : ഉണ്ണി എടക്കളത്തൂര്‍
ഉണ്ണി എടക്കളത്തൂര്‍ എന്ന തൂലികാനാമത്തില്‍ അറിയപ്പെടുന്ന കെ.പി.
നാരയണന്‍ നമ്പീശന്റെ ശ്ലോകരചനകള്‍ സമാഹരിച്ചതാണു കൃതി. 1994 
ലെ കവനകൌതുകം പുരസ്ക്കാരജേതാവാണു കവി. പുരസ്ക്കാരത്തിന
ര്‍ഹമായ കവിതയും ഇതില്‍ ഉള്‍പ്പെട്ടിട്ടുണ്ട്.

11.ഒറവങ്കര ശ്ലോകങ്ങള്‍:

ഒറവങ്കരയുടെ തെരഞ്ഞെടുത്ത കുറെ ശ്ലോകങ്ങള്‍

12.വൃത്തങ്ങളിലെ താളഘടന:

ഗ്രന്‍ഥകര്‍ത്താവ് : അത്തിപ്പറ്റ രവി. 
പരമ്പരാഗതരീതിയില്‍ നിന്നു വ്യത്യസ്തമായി, താളത്തെ അടിസ്ഥാനഘട
കമാക്കി വൃത്തങ്ങളെ വിശകലനം ചെയ്യാനുള്ള ഒരു ശ്രമം. സംസ്ക്കൃത
വൃത്തമായാലും ,ഭാഷാവൃത്തമായാലും , ചലച്ചിത്രഗാനമായാല്‍ പോലും 
അവയിലെല്ലാം പൊതുവായ ഒരു താളഘടനയെ കണ്ടെത്തുന്ന ഒരു .
സൈദ്ധാന്തികഗ്രന്‍ഥം

13. ശ്രീരാഘവയാദവീയം:

രാമകൃഷ്ണവിലോമകാവ്യം പോലെ തന്നെ മറ്റൊരു വിലോമകാവ്യം. 
വെങ്കിടാധ്വരി എന്ന കവിയാണ് ഇതിന്റെ രചയിതാവ്. രാമകഥ പറ
ഞ്ഞു പോകുന്ന ഓരോ ശ്ലോകത്തിനും കൃഷ്ണകഥ പറഞ്ഞു പോകുന്ന 
പ്രതിലോമശ്ലോകം എന്നാണു രചനയുടെ രീതി. ഓരോ ജോടി ശ്ലോകവും
വിലോമമാണെന്നര്‍ത്ഥം . പദച്ഛേദം കൂടെ കൊടുത്തിട്ടുണ്ട്.

14.നാരായണീയം ഭാഷാവൃത്തത്തില്‍ :

അരിയന്നൂര്‍ ഉണ്ണിക്കൃഷ്ണന്റെ പരിഭാഷ.

15.ഭര്‍ത്തൃഹരി എന്ന  ഫോറം:

ഭര്‍ത്തൃഹരിയുടെ ശതകത്രയം ഭാഷാവൃത്തത്തിലേക്കു പരിഭാഷപ്പെടു
ത്തുക എന്നതാണു ലക്ഷ്യം

16.അരിയന്നൂര്‍  E-Magazine :

ശ്ലോക വിവരങ്ങളടങ്ങുന്ന ഒരു മാസികപ്രസിദ്ധീകരണം.  എല്ലാ 10-ആം 
തിയ്യതിയും പ്രസിദ്ധീകരിക്കുന്നു.

17.ശയനപ്രദക്ഷിണം:

ശ്രീ.രാധാകൃഷ്ണന്‍ കാക്കശ്ശേരിയുടെ കവിതാസമാഹാരമാണു. സാഹിത്യ
ത്തിന്റെ വിവിധ ശാഖകളിലായി നിരവധി പുസ്തകങ്ങള്‍ രചിച്ചിട്ടുള്ള
ഗ്രന്‍ഥകര്‍ത്താവിന്റെ ഈ കൃതി ശ്ലോകങ്ങളും ഭാഷാവൃത്തത്തിലുള്ള
കവിതകളും ഉള്‍ക്കൊള്ളുന്നതാണ്.

18.കഥാത്രയീ ശ്ലേഷകാവ്യം: സമ്പൂര്‍ണ്ണമലയാളവ്യാഖ്യാനത്തോടുകൂടി.

രാമായണ-ഭാരത-ഭാഗവത കഥകള്‍ ഒരുമിച്ചു പറഞ്ഞു പോകുന്ന വിശി
ഷ്ടമായ ഒരു സംസ്ക്കൃതകാവ്യമാണ്. ഓരോ ശ്ലോകവും മൂന്നു രീതിയില്‍ 
അര്‍ത്ഥം ഉള്‍ക്കൊള്ളുന്നു. ചിദംബരകവിയുടെ ഈ കാവ്യത്തിനു മലയാ
ളവ്യാഖ്യാനം രചിച്ചിട്ടുള്ളതു മച്ചാട്ടു ടി. നീലകണ്ഠനാണ്.
വന്ദനശ്ലോകത്തിനു 10 അര്‍ത്ഥമാണു വ്യാഖ്യാതാവു കൊടുത്തിരിക്കുന്നത്.

19. അഷ്ടപ്രാസം :

സമ്പാദകന്‍ : അനില്‍ക്കൃഷ്ണന്‍ പി.യു.
ശാര്‍ദ്ദൂലവിക്രീഡിതം  വൃത്തത്തില്‍ ഓരോ ശ്ലോകത്തിലും എട്ടു സ്ഥല
ത്തു കൃത്യമായ താളത്തില്‍ ഒരേ പദം ആവര്‍ത്തിച്ചു വരുന്ന വിധം 
പദകുബേരന്മാര്‍ക്കു വിഹരിക്കാനുള്ള രചനാസങ്കേതമാണു അഷ്ടപ്രാസം. 
നാല്പതോളം കവികള്‍ ;നൂറ്റിഅമ്പതില്പരം ശ്ലോകങ്ങള്‍ ; ശ്ലോകസദസ്സു
കളിലൂടെയും കയ്യെഴുത്തു പുസ്തകങ്ങളിലൂടെയും മാത്രം തലമുറകള്‍ 
താണ്ടിയ നിരവധി രചനകള്‍. കുറെ പുതിയ രചനകളും.

20. പെട്ടരഴിയം കൃതികള്‍

പെട്ടരഴിയം വലിയ രാമനെളയതിന്റെ തെരഞ്ഞെടുത്ത കൃതികള്‍ ശ്ലേ
ഷം,പരല്‍ ഘടന,ശയ്യാഗുണം തുടങ്ങിയവയില്‍ അദ്വിതീയനായിരുന്നു 
ഗ്രന്‍ഥകര്‍ത്താവ്. വള്ളത്തോള്‍ പോലും പേട്ടരഴിയത്തിനെപ്പോലെ ശ്ലോകം
എഴുതാന്‍ കഴിയണമെന്നു കൊതിച്ചിട്ടുണ്ടത്രേ . സപ്തപ്രാസം ദീക്ഷിച്ചു 
രചിച്ചിട്ടുള്ള വഞ്ചിപ്പാട്ടു (നതോന്നത) രീതിയിലുള്ള ഒരു കവിത കൂടി .
ഇതില്‍ ചേര്‍ത്തിട്ടുണ്ട്

21.  കാതുകുത്ത്  

ഗ്രന്‍ഥകര്‍ത്താവ് : കുറുവല്ലൂര്‍ മാധവന്‍ 
കഴിഞ്ഞ രണ്ടു പതിറ്റാണ്ടു കാലമായി കൂനമ്മൂച്ചി അക്ഷരശ്ലോകവേദി
യുടെ അദ്ധ്യക്ഷനായി തുടരുന്ന  ശ്രീ കുറുവല്ലൂര്‍ മാധവന്റെ ശ്ലോകസ
മാഹാരം . കൂനമ്മൂച്ചി അക്ഷരശ്ലോകവേദി 1994 ല്‍ പ്രസിദ്ധീകരിച്ചതാണ് 
ഈ കൃതി.

22. പച്ചമലയാളം

സാധാരണപ്രയോഗത്തിലുള്ള മണിപ്രവാളമലയാളത്തിന്റെ നിഷേധമാണ് 
പച്ചമലയാളം.സംസ്ക്കൃതപദങ്ങള്‍ ഒഴിവാക്കിയുള്ള മലയാളമെന്നാണ് 
ഉദ്ദേശിക്കുന്നത്. മനസ്സ്, ദുഃഖം ,വിഷമം ....തുടങ്ങി സമ്സ്ക്കൃതത്തില്‍ നി
ന്നു സ്വീകരിക്കപ്പെട്ടിട്ടുള്ള പദങ്ങളെല്ലാം നിഷിദ്ധം . ഇങ്ങനെയുള്ള 
കാവ്യങ്ങളുടെ ഒരു ശേഖരം .

23. അക്ഷരശ്ലോക സദസ്സ്  ഫോറം

അംഗങ്ങള്‍ക്കു  ശ്ലോകങ്ങള്‍ പൊസ്റ്റു ചെയ്തു സദസ്സില്‍ പങ്കെടുക്കാം .

24.  സ്തവപുഷ്പമാലിക

ഗ്രന്‍ഥകര്‍ത്താവ് : പണ്ഡിതഭൂഷണം പി.കെ.രാമന്‍ നമ്പ്യാര്‍ 
ശിഖരിണി വൃത്തത്തില്‍ 50 സംസ്ക്കൃതശ്ലോകങ്ങള്‍ വ്യാഖ്യാനത്തോടു 
കൂടി . തട്ടകത്തമ്മയായ പനങ്ങാട്ടുകര ഭഗവതിയെ സ്തുതിച്ചുള്ളതാണ് 
ഇതിവൃത്തം .കൊല്ലവര്‍ഷം 1106 ല്‍ പ്രസിദ്ധീകൃതമായത്.

25. .ശ്രീവിജയോദയം മഹാകാവ്യം

ഗ്രന്‍ഥകര്‍ത്താ : മഹാകവി പന്തളം കേരളവര്‍മ്മ
മഹാകവിയുടെ രണ്ടു മഹാകാവ്യങ്ങളില്‍ കൂടുതല്‍ പ്രശസ്തമായതു 
രുഗ്മാംഗദചരിതം ആണ്. എന്നാല്‍ വിജയോദയം കാവ്യവും കാവ്യമേന്മ 
കൊണ്ടും പന്തളത്തിന്റെ സ്വതസ്സിദ്ധമായ ശബ്ദാലങ്കാരവൈദഗ്ദ്ധ്യം  
കൊണ്ടും അതീവ മനോഹരമാണ്.
 
26. കളിയോഗത്തില്‍ 

ഗ്രന്‍ഥകര്‍ത്താവ് : ഉണ്ണി എടക്കളത്തൂര്‍ 
 
ഗ്രന്‍ഥകര്‍ത്താവിന്റെ ആദ്യത്തെ കാവ്യ സമാഹാരമാണ്‍ 1990 ല്‍ പ്രസി
ദ്ധീകരിക്കപ്പെട്ട ഈ പുസ്തകം ..

27. ഉഷയുടെ ശയനഗൃഹം

ഗ്രന്‍ഥകര്‍ത്താവ് : മഹാകവി കുട്ടമത്ത്
 
മഹാകവിയുടെ മുഖമുദ്രയായ രചനയിലെ  ശബ്ദസൌന്ദര്യവും ശാലീന
തയും നിറഞ്ഞു നില്‍ ക്കുന്ന ഒരു കൃതി.
 
28.  ആന്തര സാമ്രാജ്യങ്ങള്‍

 
കവിതാസമാഹാരം 
ഗ്രന്‍ഥകര്‍ത്താവ് : രാധാകൃഷ്ണന്‍ കാക്കശ്ശേരി 
 
29.  കേരളം


ഗ്രന്‍ഥകര്‍ത്താവ് : മഹാകവി കൊടുങ്ങല്ലൂര്‍ കുഞ്ഞിക്കുട്ടന്‍ തമ്പുരാന്‍ 
കേരളത്തിന്റെ ചരിത്രവും ഐതിഹ്യങ്ങളും ക്രോഡീകരിക്കപ്പെട്ടിട്ടുള്ള
കാവ്യം . ഈ വിഭാഗത്തിലെ ഏറ്റവും പ്രശസ്തവും സമഗ്രവും , അതേ
സമയം മനോഹരവുമായ മലയാളകാവ്യം .  
 
30. പുലരി 
 
കവിതാ സമാഹാരം 
ഗ്രന്‍ഥകര്‍ത്താവ്: : ടി വി ജോസ്മാസ്റ്റര്‍ 
 
കൂനംമുച്ചി അക്ഷരശ്ലോക വേദിയുടെ സെക്രട്ടറി ആയിരിക്കേ 1997ല്‍ അ
ന്തരിച്ച ടി വി ജോസ് മാസ്റ്റരുടെ കാവ്യ രചനകള്‍ സമാഹരിച്ച കൃതി.






♥