ARIYANNUR AKSHARASLOKAKALAKSHETHRAM

അരിയന്നൂര്‍  

 

നവംബര്‍ 2017  ലക്കം 71   

പത്രാധിപര്‍ : അരിയന്നൂര്‍ ഉണ്ണിക്കൃഷ്ണന്‍ 

 

[മാസികയുടെ പഴയ ലക്കങ്ങള്‍ കാണുവാന്‍ ഹോംപേജില്‍ Archives ക്ലിക്കു ചെയ്യുക] 


തത്വമുക്തകം  67

 

ആലസ്യം ഹി മനുഷ്യാണാം
ശ‌രീരസ്ഥോ മഹാന്‍ രിപുഃ
നാസ്ത്യുദ്യമസമോ ബന്ധുഃ

യം കൃത്വാ നാവസീദതി

മടിയാണു മനുഷ്യ്രരുടെ ഉടലില്‍ കുടി കൊള്ളുന്ന‌ ഏറ്റവും വലിയ ശത്രു. ഉദ്യമത്തോളം വലിയ ബന്ധു ഇല്ല തന്നെ. ഉദ്യമത്താല്‍ ക്ഷീണം എന്നൊന്നുണ്ടാവുകയേ ഇല്ല‌

ശാന്തിഃ പത്നീഃ ക്ഷമാ പുത്രഃ 
ഷഡമീ മമ ബാന്ധവാഃ

സത്യം മാതാവു, ജ്ഞാനം പിതാവു, ധര്‍ മ്മം സഹോദരന്‍, ദയ സഖി, ശാന്തി പത്നി, ക്ഷമ പുത്രി ‍ ‍ ഈ ആറുമാണു എന്‍റെ ബന്ധുക്കള്‍

സംസ്ക്കൃതത്തില്‍ നിന്നൊരു മുത്ത് 69

 

നിര്‍വീര്യാ പൃഥിവീ,നിരോഷധിരസാ
നീചാ മഹത്വംഗതാ
ഭൂപാലാ നിജകര്‍ മ്മധര്‍ മ്മരഹിതാ
വിപ്രാഃ കുമാര്‍ഗ്ഗേ രതാഃ
ഭാര്യാ ഭര്‍ത്തൃവിരോധിനീ പരരതാ,
പുത്രാഃ പിതൃദ്വേഷിണോ
ഹാ! കഷ്ടം ഖലു വര്‍ത്തതേ കലിയുഗേ
ധന്യാ നരാ യേ മൃതാഃ

ഭൂമി തരിശാകും , ഔഷധങ്ങള്‍ ഗുണമില്ലാത്തതാകും , നീചാന്മാരുടെ എണ്ണം കൂടും , രാജാക്കന്മാര്‍ കര്‍ മ്മധര്‍ മ്മരഹിതരാകും , ബ്രാഹ്മണര്‍ ദുര്‍മ്മാര്‍ഗ്ഗചാരികളാകും , ഭാര്യമാര്‍ ഭര്‍ത്താക്കന്മാരോടെതിര്‍ത്തു പരപുരുഷരില്‍ ആസക്തരാകു‍ം, മക്കള്‍ പിതൃദ്വേഷികളാകും . അഹോ കഷ്ടം ഇങ്ങനെ കലികാലത്തില്‍ മരിച്ചു ജീവിയ്ക്കുന്നതില്‍ തൃപ്തിപ്പെടുന്നു.


മുത്തും പരിഭാഷയും 



മുത്ത് ‍ 68 

 

 

ഗൃഹേ പര്യന്തസ്ഥേ ദ്രവിണകണമോഷം ശ്രുതവതാ
സ്വവേശ്മന്യാരക്ഷാ ക്രിയത ഇതി മാര്‍ഗ്ഗോയമുചിതഃ
നരാന്‍ ഗേഹാത് ഗേഹാത് പ്രതിദിവസമാകൃഷ്യ നയതഃ
കൃതാന്താം കിം ശങ്കാം പരിഹരഥ ഹേ ജാഗൃത ജ‌നാഃ


അയല്‍വീട്ടില്‍ കള്ളന്‍ കടന്നു കുറച്ചു മുതല്‍ മോഷ്ടിച്ചെന്നു കേട്ടാല്‍ സ്വന്തം വീട്ടില്‍ സുരക്ഷിതത്വം ഉറപ്പു വരുത്തുന്നതു ഉചിതം തന്നെ. എന്നാല്‍ ഓരോ ദിവസവും ഓരോ വീട്ടില്‍ നിന്നും മനുഷ്യരെ കൊണ്ടു പോകുന്ന കാലനെക്കുറിച്ചുള്ള ശങ്കയെ പരിഹരിയ്ക്കാന്‍ ഉണര്‍ന്നിരിയ്ക്കുക മനുഷ്യ!

 

പരിഭാഷകൾ

 

1. ദിലീപ്  

 

അയൽവീട്ടിൽക്കള്ളൻ മുതലപഹരിച്ചെന്നൊരറിവാൽ

പ്രിയത്താൽ ചെയ്യാം തൻ ഗൃഹമതിനുരക്ഷാക്രിയകളും

പ്രയാസാന്യം നിത്യം പ്രതിഗൃഹഗതം മർത്യഹരണം

സ്വയം കാലൻ ചെയ്യും, പ്രതിവിധി നരാ, ജാഗ്രത ദൃഢം

 

2. അരിയന്നൂര്‍ ഉണ്ണിക്കൃഷ്ണന്‍


കടന്നൂ പോല്‍ കള്ളന്‍ പരിചൊടയല്‍വക്കത്തതറിവാ
യുടന്‍ ചിന്തിപ്പൂ നാം സ്വഗൃഹപരിരക്ഷയ്ക്കതുചിതം
എടുക്കുന്നൂ കാലന്‍ ദിനമനു ഗൃഹം തേടി നരനെ
ത്ത‌ടുക്കാനാരായാം വഴിയതിനുണര്‍ന്നേ മരുവുക‌

 
ശ്ലോകവും ലോകവും
 

അക്ഷരശ്ലോകസദസ്സ്

29/10/2017 നു കാവീട്ടിൽ നടന്ന അക്ഷരശ്ലോക അഹസ്സില്‍ താഴെപ്പറയുന്നവര്‍ പങ്കെടുത്തു
നാമംഗലം മാധവൻ,തൃക്കഴിപ്പുറം രാമൻ,അയിരിൽ നാരായണൻ,ദാമോദരപ്പണിക്കർ,മുതുപറമ്പു നാരായണൻ,മേഴത്തൂർ ഉണ്ണിക്കൃഷ്ണൻ പുരുഷോത്തമൻ നായർ,വിശ്വനാഥൻ നമ്പ്യാർ,കെ എസ്‌ രാജൻ,പ്രസന്നൻ,ജയൻ വാരിയർ,എസ്‌ എൻ കൊ ങ്ങൂ ർപ്പിള്ളി, ഉണ്ണിക്കൃഷ്ണൻ ചെറുതുരുത്തി, അരിയന്നൂർ ഉണ്ണിക്കൃഷ്ണൻ

പുതിയ അക്ഷരശ്ലോകഡയറക്ടറി

അക്ഷരശ്ലോകഡയറക്ടരിയില്‍ പേരു ചേര്‍ക്കാന്‍ സഹായിയ്ക്കുക‌

വിവരങ്ങള്‍ ഉടന്‍ അയയ്ക്കുക!

2000 ത്തിലാണു ഈയുള്ളവന്‍റെ ഉത്സാഹഫലമായി ആദ്യത്തെ
അക്ഷരശ്ലോകഡയറക്ടറി പ്രസിദ്ധീകരിച്ചത്. അതിനു ശേഷം ധാരാളം ശ്ലോകകലാകാരന്മാര്‍ രംഗത്തു വന്നിട്ടുണ്ട്. അന്നത്തെ ഡയറക്ടറിയില്‍ ചിലരെങ്കിലും ഉള്‍പ്പെടാത്തവരായിട്ടുണ്ടാകാനുള്ള സാദ്ധ്യതയും തള്ളിക്കളയാനാകില്ല. കൂടുതല്‍ സമഗ്രവും കാലികവുമായ ഒരു ഡയറക്ടറി ഉണ്ടാക്കാന്‍ ആഗ്രഹിയ്ക്കുന്നു. എല്ലാവരുടേയും സഹകരണം അഭ്യര്‍ത്ഥിയ്ക്കുന്നു.
അക്ഷരശ്ലോകരംഗത്തുള്ളവര്‍ പേര്, മേല്‍വിലാസം എന്നിവ അയച്ചു തരണമെന്നു അഭ്യര്‍ത്ഥിയ്ക്കുന്നു. ടെലിഫോണ്‍ നമ്പര്‍ ഇ മെയില്‍ അഡ്ഡ്രസ്സ് എന്നിവയും അയച്ചാല്‍ നന്നായിരിയ്ക്കും . സ്വന്തം വിവരവും പരിചയത്തിലുള്ളവരുടെ വിവരങ്ങളും അറിയിയ്ക്കുക. അക്ഷരശ്ലോകകലയുമായി ബന്ധപ്പെട്ടു ആലാപനം , സംഘാടനം , സാഹിത്യം എന്നീ രംഗങ്ങളിലുള്ളവരെല്ലാം ഡയറക്ടറിയിലുണ്ടാകണമെന്നാണു ആഗ്രഹം.
സംഘടനകളെക്കുറിച്ചുള്ള ലഘുവിവരണം രണ്ടാം ഘട്ടത്തില്‍ ശേഖരിയ്ക്കാനാണുദ്ദേശിയ്ക്കുന്നതു

 

താഴെ പറയുന്ന ഏതെങ്കിലും രീതിയില്‍ വിവരങ്ങള്‍ അയയ്ക്കുക.

whats app : 9447129500

e-mail : ariyannur@gmail.com

postal address:
ariyannur unnikrishnan
pallippaat house
post Ariyannur
Thrissur - 680102
Kerala

 

താഴെ പറയുന്ന വിവരങ്ങളാണു അയയ്ക്കേണ്ടത്.

പേര്‍:


മേല്‍വിലാസം:


ടെലിഫോണ്‍ നമ്പര്‍


ഇ മെയില്‍ അഡ്ഡ്രസ്സ്


ഒരു ഫൊട്ടോ അറ്റാച്ചു ചെയ്യുക‌

ഭാഷാനാരായണീയം

 

(ശ്രീമന്നാരായണീയം മൂലവും ഭാഷാവൃത്തത്തിലുള്ള ലളിതമായ പദ്യപരിഭാഷയും)

പരിഭാഷകന്‍ : അരിയന്നൂര്‍ ഉണ്ണിക്കൃഷ്ണന്‍ 


 

അവതാരിക : മഹാകവി അക്കിത്തം , ആലങ്കോടു ലീലാകൃഷ്ണന്‍,

ഡാ.ഇ.എന്‍.ഉണ്ണിക്കൃഷ്ണന്‍

 

ആകെ 500 പേജ്      മുഖ‌വില 350 രൂപ‌ 

 

ഇപ്പോള്‍ ആവശ്യപ്പെടുന്നവര്‍ക്കു പ്രത്യേക നിരക്ക് 

ഏകാദശി തീരുവോളം (നവംബര്‍ 30 വരെ) 

 

300 രൂപയ്ക്കു ലഭിയ്ക്കുന്നു. തപാല്‍ ചാര്‍ജ്ജു ഈടാക്കുന്നില്ല. കൂടാതെ 100 രൂപ വിലയുള്ള‌ ഒരു ശ്ലോകപുസ്തകം ഇതിനോടൊപ്പം  സൌജന്യമായി ലഭിയ്ക്കുന്നു. 

 

ബന്ധപ്പെടുക : 9447129500  (call / whats app) 

 

പുതിയ കവിതകള്‍

 

തുറവൂർ വിശ്വംഭരൻ - ജ്ഞാനസാഗരപാരംഗതൻ
 
ജോയ് വാഴയില്‍
 
സന്താപം പകരുന്ന വാർത്തയൊടു വ-
ന്നെത്തീ പ്രഭാതം, മഹാ-
ചിന്താദീപമണഞ്ഞുപോയി തുറവൂർ
വിശ്വംഭരൻ, കഷ്ടമേ.
എന്താവും മനുജേച്ഛയാൽ? വിധിയതൊ-
ന്നല്ലോ ജയിപ്പൂ, വ്യഥാ-
ക്രാന്തം കൈരളിയോടുചേർന്നു വിലപി-
ക്കുന്നൂ സുഹൃദ്കേരളം.
 
ഇല്ലാ ദേശികനീവിധം, നിറമന-
സ്സിൻ സൗമ്യപുഷ്പാർച്ചനം,
ഇല്ലാ താപസനീവിധം, നിറകുട-
ത്തിൽച്ചേർന്ന ചിത്സാഗരം,
ഇല്ലാ ഭാഷകനീവിധം, നിസൃതമാം
വാഗർത്ഥകല്ലോലിനി,
ഇല്ലാ സംസ്കൃതചിത്തനിങ്ങു തുറവൂർ
വിശ്വംഭരന്നൊപ്പമായ്.
 
വിജ്ഞാനപ്പൊൻതിളക്കം പകരുമമലസു-
സ്മേരപുഷ്പോജ്ജ്വലത്താം
പ്രജ്ഞാവൃക്ഷം കൊടുങ്കാറ്റടിയിലടി മറി-
ഞ്ഞീടുവാൻ പോന്ന മട്ടിൽ
ആജ്ഞാകാർക്കശ്യമേറും വിധി തടയുവതി-
ന്നാവതല്ലെങ്കിലും, തൻ
സംജ്ഞാവിഖ്യാതിയെന്നും ദ്യുതിയൊടു മലയാ-
ളാംബരത്തിൽ ജ്വലിക്കും.
 
മുക്തക മുകുളങ്ങള്‍
 
മോഹനന്‍ മൂലയില്‍
 
നീലാകാശനിലങ്ങൾ നീളെ വിളയും 
ഹീരങ്ങൾ ;താഴെപ്രഭാ-
നീരാളങ്ങൾ വിരിക്കുമിന്ദുകലത
ന്നേകാന്ത തീരങ്ങളും
ഹാ! ലീലാശുകനല്ലിവൻ ,രതി കലാ
ലോലാം ശുകാരാധകൻ
ലീലാമാധവരാധികാമധുമയ
സ്മേരം സ്മരിക്കട്ടെ ഞാൻ!
 
നീ നീരാടിയ ചന്ദനപ്പടവുകൾ
ക്കിന്നെന്തു ലാവണ്യ, മീ-
നീഹാരാർദ്രഹരിദ്ര തൻ മണമെഴും 
കാറ്റിന്നുമെന്തുന്മദം
നീലാപാംഗപതംഗഭംഗി പുണരും 
കണ്ണന്നു രാസോത്സവ -
ത്തേരാകുന്നൊരു ഗോപികേ ,മധുരമീ 
വൃന്ദാവ നോപാന്തവും!
 
പാടാൻ പാടവമില്ലതെല്ലു, മറിയാ 
വാഗർത്ഥ സാമർത്ഥ്യ മി-
ന്നാടാനുണ്ടൊരു മോഹമീ മയിലിനും 
സാനന്ദമമ്പാടിയിൽ
കാടേറും കരൾ കാടുകാട്ടുമിടയ
ക്കുഞ്ഞിന്റെ തൃക്കാലടി -
പ്പാടാൽ മൂടിടുമെങ്കിലെന്തു സുകൃതം! 
പാടാം മുകുന്ദസ്തവം...

പഞ്ചമുക്തകങ്ങള്‍

സന്തോഷ് വര്‍മ്മ‌
 
ശരദിന്ദുവുദിച്ചു വാനിടത്തിൽ
പകരും ദീപ്തിയതിന്നു കണ്ടിടുമ്പോൾ
ഒരു കൈത്തിരി ഞാൻ കൊളുത്തിവെയ്ക്കാം
മുരുകാ! നിൻ നടയിങ്കൽ നീ തുണയ്ക്കൂ
 
ശരണാഗതർക്കു വഴികാട്ടി നിത്യവും
ഗുരുവായുമന്ദിരനിവാസിയായിടും
ഹരി! നീയെനിക്കു ഗതിയേകിടേണമേ
ചരണാബ്‌ജയുഗ്മമടിയൻ തൊഴുന്നിതാ
 
നടനലീലയിലുന്നതനായിടും
നിടിലദൃഷ്ടിയെഴും ഗിരിജാപതേ!
തടിനി കാമിനിയായ ഭവാനെ ഞാ-
നുടനെ വീണു തൊഴുന്നു ഗിരീശ്വരാ!
 
കാണാകേണം ഹൃദയമതിലായ്‌ ശ്രീമൃദംഗാദ്രിനാഥേ!
ശോണാബ്‌ജത്തിൻ രുചിരതയെഴും നിൻപദംരണ്ടുമെന്നും
വീണീടുന്നേൻ കരുണയിവനിൽ ചേർക്കണേപോർക്കളത്തിൽ
കാണുന്നേൻ ഞാനരികളധികം പോർക്കലീ!രക്ഷ നീയേ
 
ചുറ്റും കാണ്മൂ സങ്കടമേകും ദുരിതങ്ങള്‍
പറ്റിക്കൂടനില്ലിവനെങ്ങും സ്ഥലമൊന്നും
ചുറ്റിക്കൊല്ലാ പാദയുഗം ഞാന്‍ തൊഴുതേനെ-
ന്നൊറ്റക്കൊമ്പാ ശ്രീഗണനാഥാ! വരമേകൂ

മഞ്ജുഭാഷിണികള്‍
 
അനില്‍ക്കൃഷ്ണന്‍ അരിയന്നൂര്‍
 
തെളിയിച്ച പൊൻ നിലവിളക്കണച്ചിടാൻ
കുളുര്‍തെന്നലെത്തി,യെതിരിട്ടിടാനിതാ
തുളസിത്തറയ്ക്കരികിലായ് ദിനാന്തിയില്‍
കളിയാടി നിന്നു കളവാണിഹൃദ്യമായ്!!
 
വിടരാന്‍ കൊതിച്ച മലരിന്‍ ദളങ്ങളി-
ന്നടരുന്നു വീണുപിടയുന്നു ഭൂമിയില്‍!
ഇടറുന്ന ഹൃത്തിലഴലേറിടുന്നൊരാ
ചെടിയോ, കരഞ്ഞു തളരുന്നു മൂകമായ്
ക്ഷൌമാംബരക്കരിമുകില്‍പ്പടലങ്ങള്‍ നീങ്ങി
ക്ഷാമാംഗിമാരുടെ  മുഖേന്ദു തെളിഞ്ഞു കാണായ്
കാമാര്‍ത്തനാം പുരുഷ! നിന്‍റെ മതാധികാര‌-
ഭീമാപരാധമതിനിന്ത്യയിലന്ത്യമായി
 


മുക്തകത്രയം

അരിയന്നൂര്‍ ഉണ്ണിക്കൃഷ്ണന്‍
 
വാടാതെ നില്പതൊരു വാസരകാലമെന്നൊ
രീടാര്‍ന്ന സത്യമറിയുമ്പൊഴു മുള്ളമൊട്ടും 
വാടാതെ നിന്നു ചിരിതൂകിന പൂവുരപ്പൂ
തേടായ്ക നാളെയെ നിനച്ചഴലിന്നു തെല്ലും 
ചാവുന്ന നേരമധികം ദുരിതം വരുന്ന‌-
തീവണ്ണമെന്തു സുജനത്തിനു? ഞാനുരയ്ക്കാം
ദൈവം നിനപ്പു, ചെറുതാം കടമല്ലി വീട്ടി-
പ്പോവട്ടെ; ജന്മമതിനായിനി വേണ്ട വേറെ
ക്ഷൌമാംബരക്കരിമുകില്‍പ്പടലങ്ങള്‍ നീങ്ങി
ക്ഷാമാംഗിമാരുടെ  മുഖേന്ദു തെളിഞ്ഞു കാണായ്
കാമാര്‍ത്തനാം പുരുഷ! നിന്‍റെ മതാധികാര‌-
ഭീമാപരാധമതിനിന്ത്യയിലന്ത്യമായി
 

 

♥♥♥

കവിസദസ്സ്

 

കവികളുടെ അക്ഷരശ്ലോകസദസ്സാണ്, ഇത്. അപ്രകാശിതങ്ങളായ സ്വരചിതശ്ലോകങ്ങള്‍ മാത്രം അനുവദനീയമായ ഇങ്ങനെ ഒരു സദസ്സു സൈറ്റില്‍ നടക്കുന്നു. കഴിഞ്ഞ ലക്കങ്ങളില്‍ സ്രഗ്ദ്ധര, ശാര്‍ദ്ദൂലവിക്രീഡിതം ,മന്ദാക്രാന്ത, മാലിനി, വസന്തതിലകം , രഥോദ്ധത, ദ്രുതവിളംബിതം, പുഷ്പിതാഗ്ര, മഞ്ജുഭാഷിണി, വസന്തമാലിക, വിയോഗിനി, ഭുജംഗപ്രയാതം, ശാലിനി, വംശസ്ഥം, ഇന്ദ്രവജ്ര/ഉപേന്ദ്രവജ്ര/ഉപജാതി, സമ്മത, അപരവക്ത്രം, പ്രഹര്‍ഷിണി, സ്രഗ്വിണി, സ്വാഗത, തോടകം, പഞ്ചചാമരം, ശിഖരിണി, പൃത്ഥ്വി,ശങ്കരചരിതം, ഹരിണി, മല്ലിക, കുസുമമഞ്ജരി, മത്തേഭം എന്നീ വൃത്തങ്ങള്‍ അഞ്ചു റൌണ്ടു വീതം പൂര്‍ത്തിയായി.

അടുത്ത അഞ്ചു റൌണ്ടു ' ശ‍ംഭുനടനം ' വൃത്തം സ്വീകരിക്കാമെന്നു നിര്‍ദ്ദേശിക്കുന്നു.

ശംഭുനടനം വൃത്തം ആരംഭിക്കുന്നു.. സൈറ്റില്‍ സദസ്സു ഇപ്പോഴും തുടര്‍ന്നു കൊണ്ടിരിക്കുന്നു. 


പങ്കെടുക്കുന്ന കവികള്‍  1.അരിയന്നൂര്‍ ഉണ്ണിക്കൃഷ്ണന്‍ 2.കൈതക്കല്‍ ജാതവേദന്‍ 3.രാമന്‍ നമ്പീശന്‍ കേശവത്ത് 3.ശ്രീലകം വേണുഗോപാല്‍ 5.ഋഷികപ്ലിങ്ങാട് 6.വാരിയത്ത് കുട്ടി 7. ജിനന്‍ 8.ജ്യോതിര്‍ മ്മയി ശങ്കരന്‍ 9.ഉണ്ണിക്കൃഷ്ണന്‍ ശ്രീലകം 10.തൃക്കഴിപ്പുറം രാമന്‍ 11.ദിലീപ് 12.അനിരുദ്ധ വര്‍മ്മ 13.ഡോ: ആര്‍ .രാജന്‍ 14.ഡോ:ജോയ് വാഴയില്‍ 15.രാജേഷ വര്‍മ്മ 16.പി എന്‍ വിജയന്‍ 17.ഗീത വാസുദേവന്‍ 18. ശ്രീജ പ്രശാന്ത് 19. മധുരാജ് പി സി 20. ആര്യാംബിക 21.സന്തോഷ് വര്‍മ്മ 22.അനില്‍ക്കൃഷ്ണന്‍ അരിയന്നൂര്‍

 

 

2081
വിരിഞ്ചവദനാംബുജമതിന്നകമെഴുന്ന മധുരം കിനിവൊരാ സുകൃത‌മേ
ഹരിയ്ക്കുടയ മാറിലണയാത്ത മഹിതോജ്വലമഹത്വ‌ മണിദീപകലികേ
ഗിരിയ്ക്കുടയവന്നിടതു തൃത്തുടയിലാണ്ടു വിലസും കനകവിദ്രുമലതേ
ഹരിയ്ക്കുക മദീയ ഹൃദയാന്ധ്യമതിലക്ഷരവെളിച്ചമൊടു വന്നു വരദേ
 
അരിയന്നൂര്‍ ഉണ്ണിക്കൃഷ്ണന്‍ 

2082
ഗണേശ്വര! തുണച്ചിടുക കാവ്യപദമൊക്കെയിനിയിന്നു തരമായി വരണം
ഇണങ്ങിയ പദാവലികളൊക്കെയവിരാമമൊഴുകാന്‍ തവ മനം കനിയണം
ഗണങ്ങളവയൊക്കെ നിരയായിവരുമാറു ലഘുചേര്‍ന്നുഗുരുവൊത്തു വരണം
ഗുണം മഹിതമായപടിയെന്നു ജനമോതുവതിനായി വരമൊന്നു തരണം
 
ശ്രീലകം വേണുഗോപാല്‍

2083
ഗിരീശ നൊരുകാരണവുമില്ല പറയാനിവിടെയെങ്കിലു മിരുന്നു വെറുതേ
തപസ്സിലധിഗാഢമൊരു മാമുനി കണക്കെയതു കണ്ടു ഭയമാറ്ന്ന സുരരോ
തപസ്സിനെമുടക്കി ഹിമകന്യകയെ വേട്ടസുരഹിംസ തടയാനൊരു മകന്
ലഭിപ്പതിനു കാമനെയയച്ചു ഫലമോ, ത്രിനയനാഗ്നിയിലവന് മൃതനുമായ്!
 
വാരിയത്ത് കുട്ടി

2084
തൊടുത്ത ശരമേ, തിരിയെയിങ്ങു വരുവാനിനി നിനക്കു കഴിയില്ല,തരണം
ശരിയ്ക്കു പറയും വിധമറിഞ്ഞു ഫലമൊക്കെ,യെൻ ധനുസ്സിനറിയില്ല വഴിയും
വിതച്ചു പഴുതേ മൊഴിക,ളൊന്നു തടയാനിനി നമുക്കു കഴിയില്ല വിഷമം
കൊഴിഞ്ഞ ദിനമാമവസരങ്ങൾ പുനരൊന്നിനി തിരിച്ചു നൽകുകില്ല സമയം.
 
ജ്യോതിര്‍ മയി ശങ്കരന്‍

2085
വിനായകമുഖം ഹൃദി സദാ നിറയവേ മധുരകാവ്യസുമമായ് വിരിയവേ
പിനാകിസുത നിന്‍ പദയുഗം പണിയുവേന്‍, ഗജമുഖാ കനിവെനിക്കരുളണേ
വിനാശമൊഴിയാനൊരുവരം തരണമേ ഗണപതേ, തവപദേ പ്രതിദിനം
സുനാകൃതമുഴിഞ്ഞു തിരുമുമ്പിലിനിയെന്‍ കവനവും ഭജനയായ് നിറയണം
 
അനിരുദ്ധ വര്‍മ്മ

2086
വരേണ്ടതു വരും ധ്രുവമതിന്നൊരു വികല്പവുമൊരിക്കലുമിഹത്തിലണയാ 
പ്രയത്നവുമഹോ ഖലു വൃഥാഫലമതോര്‍ക്കുകില്‍ മനുഷ്യനു ഗുണം മടിയതാം
നിനച്ചിതു വിധം മടി പിടിച്ചിഹ ദിനങ്ങളെ മുഴുക്കനെ സുഷുപ്തിയിലഹോ
തുലച്ചു മരുവും ജളമതിക്കിഹ നിനയ്ക്കുകില്‍ ജയം ഭുവി കഥം വശഗമാം?
 
ഡോ രാജന്‍

2087
നിലാവുതിരുമാ വദനവും, രുചിരരാഗകിരണാർദ്രനയനദ്വയവു,മാ
പലാശകുസുമോജ്ജ്വലവിലോലമുടയാടയണി മേനിയഴകും പ്രിയതമേ,
വിലാസകിലകിഞ്ചിതസുധാധരവു,മൂഷ്മളമനോജ്ഞമൃദുചിത്തഗതിയും,
സുലാള്യകരപങ്കജപരിഗ്രഹണനിർവൃതിയുമെൻ കരളിലുണ്ടു സതതം.
 
ജോയ് വാഴയില്‍

2088
വരിപ്പതിനു ശങ്കരനെ,മോഹമൊടു ശൈലജ തപസ്സുതുടരുന്ന സമയേ
വടുപ്രകൃതിയാണ്ടുഹര,നുള്ളറിവതിന്നു മരികെത്തിയുരുവിട്ടമൊഴിയാല്‍
തിരിഞ്ഞുനടകൊണ്ടു കലിയോടുമുരചെയ്തിതു ശകാരമിതുവേണ്ടയിവിടേ 
കടക്കുകപുറ,ത്തതുപറഞ്ഞളവു മുന്നി,ലുമകണ്ട ഹരനേ തൊഴുതിടാം
 
ഗീത വാസുദേവന്‍

2089
തനിച്ചു നടകൊള്ളുമൊരുപാടു സമചിന്തകരടുത്തു വരവായ നിമിഷം
തൊടുത്ത കളിവാക്കിനുമടുത്ത ചിരിവായ്പ്പിനുമിടയ്ക്കിടെയടുത്തു ഹൃദയം
തുടുത്ത മുകുളങ്ങളിലുദിച്ചിടുമുഷസ്സു ഭുവിയാകെയഴകോടെ നിറയാൻ
തുണയ്ക്കു തിരിയോടു തിരിയേറ്റു തെളിയിച്ചു കനവാകെ വിരിയിയ്ക്കയിരവിൽ
 
ശ്രീജ പ്രശാന്ത്

2090
തമാലമരമില്ല,യതുപോലെയരയന്നവു,മസത്യകവികല്പനകളാ-
ണതൊക്കെ,യിതിഹാസകഥപോൽ മുനിചമച്ച,തതുനമ്പരുതു ബുദ്ധിയെഴുവോര്"
പറഞ്ഞതു പുരോഗമനസാഹിതികലാദിയുടെ കുത്തകയെഴുന്നവ,രതേ
കുബുദ്ധികളുരച്ചു മലയാളിയജപാല,രിവിടില്ലൊരു ജിഹാദിയുമിതി!
 
മധുരാജ് പി സി

2091
പറഞ്ഞ മൊഴി ചെയ്യരുതു ചെയ്യുക പ റഞ്ഞതിനു നേരെയെതിരീവഴിയിലേ
കുറച്ചു ദിനമേറിയുമിറങ്ങിയുമൊരു ങ്ങുകിലുറച്ചു ജനസേവക പദം
കുറച്ചു നരസേവ നിജദാരസുത സേവയിലുറഞ്ഞി ടുക, രോഷ ഭരിതം
വിറപ്പവരെ മദ്യമദിരാക്ഷികളിൽ വീഴ്‌ ത്തുക , ജയം സകല ദോഷഹരമാം
 
നാമംഗലം മാധവന്‍

2092
കരുത്തുപകരും വിവിധമാം ഹൃദയചോദന കളിന്നു വിരിയുന്നു സുദൃഢം
സ്വരത്തിലുണരും തരളിതം മൃദുലഭാവനയതിന്നു രുചിചേർന്നു വരുമോ?
കരത്തിലണയും വിഭവവും വിഫലമായതു നിനയ്ക്കുകിലിതും പരമമാം
പെരുത്തബലശാലിയുടെതാം കളികളായതു ധരിച്ചു മരുവുന്നു ഭുവി ഞാൻ
 
സന്തോഷ് വര്‍മ്മ‌

2093
കഴുത്തിലണിയും പവിഴമാലയഴകായ് നിറമെഴുന്നരിയൊരാകുറിയുമായ്
അഴിച്ചമുടിതന്നിടയിലായ് തുളസിതന്‍ കതിരുമായരികിലായണയുവോ‍ള്‍
മിഴിത്തളികയില്‍ പ്രണയമാം സുമവുമേന്തിയിവനായ്പ്പതിയെ നീട്ടിടുമൊരാ
കഴിഞ്ഞ മമനിദ്രയിലണഞ്ഞ കനവെന്തുരമോര്‍ത്തു മധുരം നുണയുവാന്‍
 
അനില്‍ക്കൃഷ്ണന്‍ അരിയന്നൂര്‍

 



സമസ്യ 


(സൈറ്റില്‍ കൊടുക്കുന്ന സമസ്യകളും പൂരണങ്ങളും )

 

സമസ്യ നമ്പർ 270

മർത്ത്യനെന്തു ഭാവിയോർക്കിലൂഴിയിൽ?

സമസ്യാകാരൻ: ജോയ് വാഴയില്‍
വൃത്തം: പഞ്ചചാമരം

1
അരിച്ചുകൂട്ടി ജീവിതം നയിച്ചിടുന്നവര്‍ ചിലര്‍
എരിച്ചിടിന്നു ജീവിതത്തെ ഭോഗപാതയില്‍ ച്ചിലര്‍
മരിച്ചുപോയിടേണ്ടയാ ദിനംസുനിശ്ചയം വരും
ചിരിച്ചിടുന്ന “മര്‍ത്യനെന്തുഭാവിയോര്‍ക്കിലൂഴിയില്‍
 
കുട്ടന്‍ ഗോപുരത്തിങ്കല്‍

2
ഒരുക്കിടുന്നു യന്ത്രശക്തിയാൽ മനുഷ്യനെന്നപോൽ
ചരിച്ചിടുന്ന, തേവമായി ജീനിലും പരീക്ഷണം
വരുത്തി വച്ചിടുന്ന ദുർഘടളാണി, തൊക്കെയി-
ങ്ങൊരുക്കിടുന്ന "മർത്ത്യനെന്തു ഭാവിയോർക്കിലൂഴിയിൽ?
 
വിനോദ് വര്‍മ്മ

3
സമസ്ത ധർമ്മ ചിന്തയും പറത്തിടുന്നു കാറ്റിലായ്  
ശ്ര‌മിച്ചിടുന്നു മർത്ത്യനുർവി കയ്യടക്കി വാഴുവാൻ
ശമത്തിനുളള പാത വിട്ടു സഞ്ചരിച്ചുകെൊണ്ടുതാൻ 
തിമിർത്തിടുന്ന മർത്ത്യനെന്തു    ഭാവിയോർക്കിലൂഴിയിൽ
 
ഗീത വാസുദേവന്‍

4
ദുരാഗ്രഹം വളർന്നിതാ വിഴുങ്ങിടുന്നു ഭൂമിയെ,
നിരാശയേറി ജീവജാലമാകെ മാറി ദീനരായ്.
ധരാതലം കടുത്ത താപമാർന്നുഴന്നിടുമ്പൊഴും
പരാദമായ മർത്ത്യനെന്തു ഭാവിയോർക്കിലൂഴിയിൽ?
 
ജോയ് വാഴയില്‍

5
വെറുപ്പെനിയ്ക്കു തെല്ലുമില്ല ചൊല്ലിടട്ടെയെങ്കിലും
തുറിച്ചു നോക്കിയെന്തിനായ് ശപിച്ചിടുന്ന തീവിധം
ഉറച്ചു നിലക്ക, കാൽച്ചുവട്ടിൽ മണ്ണൊലിച്ചുപോകിലും,
പറഞ്ഞിടൊല്ല മർത്ത്യനെന്തു ഭാവിയോർക്കിലൂഴിയിൽ
 
ദാമോദരപ്പണിക്കര്‍

6
പ്രസിദ്ധി,രൂപഭംഗി,യോഗ്യവംശജന്മമോ മഹാ-
സ്വസിദ്ധികൾ തുടങ്ങിയുള്ളതൊക്കെയൊക്കിലും പരം
നശിച്ചിടുന്ന ദേഹമായതിൽ തെളിഞ്ഞൊരീശ്വര-
പ്രസാദഹീനമർത്ത്യനെന്തു ഭാവിയോർക്കിലൂഴിയിൽ
 
ദിലീപ്

സമസ്യ നമ്പർ 271

.....നെഞ്ചില്‍ക്കുളിരാത്മഹര്‍ഷം

സമസ്യാകാരൻ: ഋഷി കപ്ലിങ്ങാട്
വൃത്തം: ഇന്ദ്രവജ്ര‌

1
കുന്നോളമാശാമലരോടെ ഞാനെന്‍
പൊന്നോമലാളിന്നരികത്തുചെന്നു
ഒന്നേചിരിച്ചുള്ളു സുരാഗി, കണ്ണാല്‍
തന്നെന്റെ “നെഞ്ചില്‍ക്കുളിരാത്മഹര്‍ഷം
 
കുട്ടന്‍ ഗോപുരത്തിങ്കല്‍

2
ലാളിച്ചു പി‍ഞ്ചോമലെയൊന്നുയർത്തീ
മേളിച്ചു മാറിൽക്കുതിയാൽച്ചവിട്ടീ
കേളീരസത്താൽ നറുപുഞ്ചിരിക്കു-
ഞ്ഞോളത്തിൽ ""നെഞ്ചില്‍ക്കുളിരാത്മഹര്‍ഷം."
 
ഗീത വാസുദേവന്‍

3
നിന്നെസ്മരിച്ചിങ്ങു സദാ വസിക്കു-
ന്നെന്മാനസേ കൃഷ്ണ! പദാരവിന്ദം 
നന്നായ് തെളിഞ്ഞീടണമേയതൊന്നേ
തന്നീടു  “നെഞ്ചില്‍ക്കുളിരാത്മഹര്‍ഷം
 
വിനോദ് വര്‍മ്മ

4
പീതാംബരം പുല്കിയൊരാ വപുസ്സും
ചേതോഹരം കാല്‍ത്തളിരിന്‍ തുടിപ്പും
വാതാലയേശാ! യദുഗോപബാലാ!
നീ തന്നു "നെഞ്ചിൽക്കുളിരാത്മഹർഷം
 
ദീപ കരുവാട്

5
ആനന്ദരൂപൻ ചെറുബാലരൊത്തി-
ട്ടാനന്ദമായ് കേളികളാടിടുമ്പോൾ
അമ്പാടിയിൽക്കണ്ടതു പുണ്യമിന്നീ
യമ്മയ്ക്കു നെഞ്ചില്‍ക്കുളിരാത്മഹര്‍ഷം
 
ഋഷി കപ്ലിങ്ങാട്

6
മാധുര്യമേറും തവവേണുനാദം
സ്നേഹം പൊഴിയ്ക്കും നറുമന്ദഹാസം
രാധയ്ക്കു നിത്യം ഹരിതന്‍ കടാക്ഷം
നല്‍കുന്നു നെഞ്ചില്‍ക്കുളിരാത്മഹര്‍ഷം
 
അനില്‍ക്കൃഷ്ണന്‍ അരിയന്നൂര്‍

7
തോടിന്റെ വക്കത്തു നിലാച്ചുവട്ടിൽ
പാടങ്ങൾ പച്ചച്ചു കിടന്നിടുമ്പോൾ
ഓടിട്ടവീട്ടിന്റെയകത്തു വാഴും
ചൂടുള്ളനെഞ്ചിൽ കുളിരാത്മഹർഷം
 
പി എന്‍ വിജയന്‍

സമസ്യ നമ്പർ 272

പാതിയായ് വ്യഥ‌ കുറഞ്ഞു പോയിടും

സമസ്യാകാരൻ: പി എന്‍ വിജയന്‍
വൃത്തം: രഥോദ്ധത‌

1
ഓതിടാം ജലകണം പതിക്കുകിൽ
ബ്ഭൂതിയായ് കനലമർന്നിടുംപടി
ഭീതി വേണ്ട: നയനാംബു തൂകിലോ
പാതിയായ് വ്യഥ കുറഞ്ഞു പോയിടും
 
കൈതയ്ക്കല്‍ ജാതവേദന്‍

2
നീതിബോധമിയലാതെ വാണിടും
രീതി കാണ്കെ പതറുന്നു മാനസം
പാതിയെന്റെ തുണയായിരിക്കവേ
പാതിയായ് വ്യഥ കുറഞ്ഞു പോയിടും
 
വിനോദ് വര്‍മ്മ

3
പ്രേതമുള്ള ഭവനത്തിലിന്നൊരീ
രാത്രിതങ്ങിടണമെന്നതോര്‍ക്കവേ
ഭീതിയായ്, തുണയൊരാളെഴുമ്പൊഴോ
പാതിയായ് വ്യഥ കുറഞ്ഞു പോയിടും
 
അനില്‍ക്കൃഷ്ണന്‍ അരിയന്നൂര്‍

4
പാതിതോർന്ന മഴയുള്ളവീഥിയിൽ
പാതിരാവിനി നടപ്പു ദുഷ്കരം
ഓതു നീ സഖി തുണയ്ക്കു പോരുകിൽ
പാതിയായ്‌വ്യഥ കുറഞ്ഞു പോയിടും
 
ശ്രീകല നായർ

5
ജാതമോദമരികത്തു നിന്നിടും
പാതിമെയ്യുമൃദുകൈത്തലത്തിനാല്‍
പ്രീതി പൂണ്ടു നിടിലം തലോടുകില്‍
പാതിയായ് വ്യഥ കുറഞ്ഞുപോയിടും
 
രാമന്‍ നമ്പീശന്‍ കേശവത്ത്

6
പാതിരാവുകഴിയുന്ന വേളയെന്‍-
പാതി ചൊല്ലിയൊരു നൂറുകാരിയം
പാതികേട്ടതുമറന്നുവെങ്കിലോ
“പാതിയായ് വ്യഥ‌ കുറഞ്ഞു പോയിടും 
 
കുട്ടന്‍ ഗോപുരത്തിങ്കല്‍

7
ഭൂതകാലമഖിലം നിനച്ചുനിൻ
ചേതനക്കനലെരിപ്പതെന്തിനോ
പാതമുന്നിലുതിരുന്നതോർക്ക നീ
പാതിയായ് വ്യഥ കുറഞ്ഞുപോയിടും
 
ഹരിദാസ് മംഗലപ്പിള്ളി

8
പാതിയാകു മറിവൊത്ത കാരണം
പാതിയിട്ട ഗതിയാ പ്രവൃത്തിയും
പാതിചൊല്ലുവതു കേട്ടതെങ്കിലോ
പാതിയായ് വ്യഥ കുറഞ്ഞു പോയിടും
 
യദു മേയ്ക്കാട്

9
വാതുവെച്ചുകളിതോൽക്കുമെങ്കിലും
വീതമായകൃഷിഭൂമി പോകിലും
പാതവക്കിലൊരുഷാപ്പുകാണുകിൽ
പാതിയും വൃഥ കുറഞ്ഞു പോയിടും
 
പി എന്‍ വിജയന്‍

സമസ്യ നമ്പർ 273

വിളിപ്പുറത്തുണ്ടതു വിശ്വസിക്കണം

സമസ്യാകാരൻ: ദേവദാസ് മായന്നൂര്‍
വൃത്തം: വംശസ്ഥം

1
എളുപ്പമല്ലായിഹലോകജീവിത-
ക്കളിക്കളത്തില്‍ വിജയിച്ചുകേറുവാന്‍
തെളിഞ്ഞഹൃത്തോടെഭജിക്കിലംബിക
“വിളിപ്പുറത്തുണ്ടതു വിശ്വസിക്കണം
 
കുട്ടന്‍ ഗോപുരത്തിങ്കല്‍

2
തെളിഞ്ഞ ചിത്തത്തിലുറച്ചരൂപമായ്
വിളങ്ങിനില്പ്പൂ ജഗദീശ്വരൻ സദാ
തളർന്നുവീണീടുകിലെത്തികാക്കുവാൻ
"വിളിപ്പുറത്തുണ്ടതു വിശ്വസിക്കണം
 
ദീപ കരുവാട്

3
വിളിക്കുവാൻ പേരവനുണ്ടൊരായിരം
വിളിക്ക നാവേ മടി വിട്ടു നിത്യവും
കളിക്കു ചൊല്ലീടുകയല്ല മാധവൻ
“വിളിപ്പുറത്തുണ്ടതു വിശ്വസിക്കണം
 
വിനോദ് വര്‍മ്മ

4
തിളച്ച വാഴക്ക,യരച്ച തേങ്ങയും
പുളിച്ചമോരിൽ കടു,കുപ്പുചേർത്തതും
ഇളക്കിയാകാളനൊഴിച്ചുകൂട്ടുവോൻ
വിളിപ്പുറത്തുണ്ടതു വിശ്വസിക്കണം
 
സുബ്രഹ്മണ്യന്‍ കുറ്റിക്കോല്‍ 

5
തളര്‍ന്നു പോകാം മന,മേറെയുള്ളിലായ്
വള‍ര്‍ന്നിടുന്നീ കദനത്തി,ലപ്പൊഴായ്
വിളിച്ചുനോക്കൂ! ഹരിനാമമന്ത്ര,മാ
വിളിപ്പുറത്തുണ്ടതു വിശ്വസിക്കണം
 
അനില്‍ക്കൃഷ്ണന്‍ അരിയന്നൂര്‍

6
ഒളിച്ചിരിപ്പുണ്ടകമേ മനസ്സിനെ
ക്കളിച്ചിടാൻവിട്ടു രസിച്ചുമീശ്വരൻ!
തെളിച്ചിടും സത്ത,യറിഞ്ഞവർ,ക്കവൻ
വിളിപ്പുറത്തുണ്ടതു വിശ്വസിക്കണം
 
ദേവദാസ് മായന്നൂര്‍

7
കളിച്ചു കൊണ്ടങ്ങനെയുല്ലസിയ്ക്കുമെന്‍
കളേബരം വാടിയ കൊച്ചുപയ്യനെ
തെളിഞ്ഞു കണ്ടില്ല, പറഞ്ഞു കൂട്ടുകാര്‍
വിളിപ്പുറത്തുണ്ടതു വിശ്വസിയ്ക്കണം
 
വി.വിശ്വനാഥന്‍ നമ്പ്യാര്‍ 

 

 

 

ശ്ലോകേതരവിഭാഗം 

 

പുതിയ കവിതകള്‍

ചുമർ
 
സച്ചിതാനന്ദന്‍ പുഴങ്കര‌
 
പണിപ്പുരയ്ക്കുള്ളിൽ
പുരപ്പണി; പണി -
ത്തിരക്കൊഴിഞ്ഞെന്നാ -
ണിരിക്കുവാനിനി?
 
പുഴയ്ക്കും കാറ്റിനും
കരയ്ക്കും സൂര്യനും
മരത്തിനും കയ്ക്കു -
മിലയ്ക്കും പൂവിനും
കിളിക്കും കുഞ്ഞിനും
നിലാവിനും മുറി
പണിഞ്ഞുവെച്ചു ഞാൻ...
നമുക്കില്ലാ മുറി..
 
കനക്കെപ്പെയ്യുന്ന
മഴയ്ക്കുമോർമ്മയ്ക്കും
മിഴിക്കുമെന്തിനീ
കൊളുത്തും കുറ്റിയും..
 
ഒന്നര സെന്റിലെ ഇന്ത്യൻ സ്വപ്നങ്ങൾ
 
പി എന്‍ വിജയന്‍
 
ഒന്നരസ്സെന്റേയുള്ളു
സ്വന്തമെന്നോതീടുവാൻ
ഇന്നതിൽനിന്നാണമർ
ജിത്തിന്റെതാരോദയം.
പന്തുതട്ടുവാനുള്ള
യോഗ്യത ചരിത്രത്തിൽ
ഇന്ത്യയിൽ മണിപ്പൂരിൽ
തൗബാലിൽ തുടങ്ങുന്നു.
അച്ഛനാം ചന്ദ്രമണി-
ക്കൊപ്പാഴും പണിയാണ്
തുച്ഛമാം വരുമാനം
മകന്നു കളിക്കുവാൻ
അമ്മയാം അഷാംഗ്ബി തൻ
മത്സ്യ വില്പനപോലും
തൻ മകൻ കളിക്കുവാൻ
കളിച്ചു മുന്നേറുവാൻ.
ഒന്നര സെന്റിൽ നിന്നാ-
ണിന്ത്യ തൻ താരോദയം
ഒന്നു നില്ക്കുവിൻ അമർ
ജിത്തിനെയറിയുവിൻ.
ജീവിക്കാൻ പെടാപ്പാടു
പെടുന്ന രണ്ടാളുമീ
കൗമാരപ്രതിഭതൻ
അച്ഛനമ്മമാരാണ്.
ആസ്ബെസ്റ്റോസ് ഷീറ്റാണവർ -
ക്കുളളതു വീടിൻ മോളിൽ
താഴത്തെത്തറയിലോ
രണ്ടു സ്റ്റൂളുകൾ മാത്രം.
 
നമ്മുടെ അമർജിത്തു
സൗദിയിൽ കളിക്കുന്ന -
തക്കിയാം ഏഷ്യാ കപ്പ്
യോഗ്യത നേടീടുവാൻ.
 
തൻ മകൻ ഇന്ത്യൻ ടീമിൻ
ക്യാപ്റ്റനായ് ഉയർന്നാലും
തൻ പണി തുടരുമെ-
ന്നവന്റെയച്ഛൻ ചൊൽവൂ;
ഇംഫാലിൽ മത്സ്യംവില്ക്കാൻ
കടയുണ്ടായാൽ മതി
ഇത്രയേ അവനെപ്പെ -
നമ്മതൻഒരേ സ്വപ്നം.
ആകെയുള്ളതുവീട്ടിൽ
രണ്ടു സൈക്കിളുമാത്രം
വൈകരുതിവർക്കു നാ-
മൊരു കൈത്താങ്ങേകുവാൻ.
ഒന്നര സെന്റിൽ നിന്നു
ള്ളിന്ത്യ തൻ താരം, അമർ
ജിത്തിന്റെയുയർച്ചയ്ക്കായ്
ഇന്ത്യ, നീയുണരുക.
ആയിരമയോഗ്യമാർ
കോടികൾ വിഴുങ്ങുമ്പോൾ
ഈയൊരു യുവയോഗ്യ-
ന്നായി നീയുണരുക.
 
സാഹോദര്യം
 
ജിനദേവന്‍ വെളിയനാട്
 
സൗഹൃദസ്സാഹോദര്യം
പൂത്തുനിന്നാലേ മണ്ണിൽ
സൗഭാഗ്യക്കിടാങ്ങളായ് -
തീർന്നിടൂ പൈതങ്ങളേ.
അമ്മ തന്നാഹ്ളാദത്തെ 
തച്ചുടച്ചാലോ നിങ്ങൾ
ആ വിധിക്കൊത്തേവാഴൂ 
അന്ത്യനാൾ വരേക്കുമേ.
ജീവിതസ്സു ഖാമൃതം 
നുണയും നേരത്തല്ലോ
താതനെ പിരിഞ്ഞതെ -
ന്നോർക്കണം മക്കൾ നിങ്ങൾ.
സ്വാർത്ഥയായ്ത്തീർന്നീടാതേ 
മക്കളെപ്പുലർത്തുവാൻ
സമരാന്തരീക്ഷത്തിൽ 
ജീവിതം ഹോമിച്ചമ്മ.
എന്തെന്തു വൈഷമ്യങ്ങ,
ളെത്രയോ ആക്രോശങ്ങൾ
ഒന്നുമേ തളർത്തിയി-
ല്ലമ്മയാം സത്യത്തിനെ.
കണ്ണുനീർ പൊടിഞ്ഞതി -
ല്ലാരുടേ മുന്നിൽപ്പോലും
ദുഃഖങ്ങൾ തന്നിൽച്ചേർത്തു 
കാത്തുപോന്നിതേവരേ.
ഇന്നു കൈത്തണ്ടിൻബലം 
വാർന്നുപോയ് നിശ്ചേഷ്ടയായ്
പാദങ്ങളുറയ്ക്കാതേ-
വേച്ചുവേച്ചല്ലോ വാഴ്വൂ.
അമ്മയെ നിന്ദിക്കാതേ-
നെഞ്ചിലേയ്ക്കടുപ്പിച്ചാ
മൂർദ്ധാവിൽ ചുംബിക്കേണം 
മക്കളാം നിങ്ങൾരണ്ടും.
ഓർത്തു വയ്ക്കേണം നാളെ 
തൻകുഞ്ഞിൻ മനസ്സിലായ്-
ക്കോറിടും ചിത്രത്തിനീ 
ഛായയും വന്നീടുവേൻ.
ജ്യേഷ്ഠനുമനുജനു -
മൊന്നു ചേർന്നാലേ മണ്ണിൽ
സൗഹൃദസ്സാഹോദര്യം 
വന്നിടൂ ശ്രമിച്ചാലും .
 
സുമംഗലി
 
(വിവാഹം കഴിഞ്ഞു ഭര്‍ത്താവിന്റെ വീട്ടിലേയ്ക്ക് 
പോകാനൊരുങ്ങുന്ന ഒരു പെണ്‍കുട്ടിയുടെ ചിന്തകള്‍)
 
അനില്‍ക്കൃഷ്ണന്‍ അരിയന്നൂര്‍
 
പടിയിറങ്ങുന്നിവള്‍ സീമന്തരേഖയില്‍
നിറകുങ്കുമശ്രീയണിഞ്ഞും
നയനാംബുവിറ്റിറ്റുവീഴുന്ന കണ്‍കളി‍ല്‍
കനവിന്‍ മഷിക്കൂട്ടണിഞ്ഞും
 
കൊതിയെനിക്കെന്റെ ബാല്യത്തിലേയ്ക്കൊന്നു
തിരികെയായ് വെറുതേ നടക്കാന്‍
മധുരോര്‍ മ്മ തഴുകുന്ന ഹൃദയത്തിന്‍ തന്ത്രിയില്‍
പതിയെയായ് തംബുരു മീട്ടാന്‍
ഇനിയും നിന്‍ കൈവിരല്‍ തുമ്പില്‍ പിടിച്ചു നിന്‍
അനിയത്തിയായൊന്നിരിക്കാന്‍
മൃദുലമായോതുന്ന വാക്കുകള്‍ കേട്ടെന്റെ
ഹൃദയമോ കോരിത്തരിയ്ക്കാന്‍
 
മലര്‍ മണമുതിരുന്ന വാടിയിലെങ്ങും നാം
ശലഭങ്ങളായി പറക്കും
മഴപെയ്ത നേരമാ ചേമ്പിന്നിലക്കുട‌
അഴകോടെ നീര്‍ത്തിപ്പിടിയ്ക്കും
അരികത്തു വന്നൊരാ തെന്നലൊന്നെന്തിനോ
പരിഭവമോടേ തലോടും
കുളിരാര്‍ന്നു നമ്മളോ ചെമ്പകച്ചോട്ടിലെ
തളിരിലക്കുടിലില്‍ ഒളിയ്ക്കും
 
ഇലകളില്‍ നിന്നിറ്റുവീഴുന്ന നീര്‍കണം
പലതായ് ചിതറുന്ന കാണും
കുറുകിയെത്തുന്നൊരാ പ്രാവുകള്‍ മൂളിടും
അരിയൊരാ സംഗീതം കേള്‍ക്കും
നിറമോടു മഴവില്ലുദിയ്ക്കുന്ന നേരത്തു
നിറവാര്‍ന്നതൊന്നു നാം കാണും
മനതാരിനുള്ളിലായ് നന്മകള്‍ പിന്നെയും
അനുഭവിച്ചാമോദമേറും
 
പകല്‍ മാഞ്ഞു സന്ധ്യവന്നിരുളിന്റെ നേര്‍ത്തൊരാ
ശകലങ്ങളെങ്ങും പരക്കേ
ഒരുമിച്ചിരുന്നു നാം ഭയഭക്തിയോടെന്നും
തിരുനാമമന്ത്രങ്ങളോതും
 
ഇനിയെന്റെ കൂടെ നീയില്ലയെന്നറിയുമ്പോള്‍
നനയുന്നു മിഴിരണ്ടുമേറേ
വലുതായിടാതെ നാം ചെറുബാല്യമായെന്നും
നിലനിന്നുവെങ്കില്‍ കൊതിച്ചൂ
വിടപറഞ്ഞീടുവാന്‍ സമയമായെന്നുടെ
പടിവാതില്‍ മെല്ലേ തുറന്നൂ
അറിയേതെ നെഞ്ചിലായൊരു നേര്‍ത്ത സങ്കട‌
ത്തരികളോ മിഴിനീര്‍ പൊഴിച്ചൂ

 

കാവ്യകേളി


(ഭാഷാകവിസദസ്സ് )

ഭാഷാവൃത്തത്തിലുള്ള സ്വരചിതങ്ങളായ കവിതാഖണ്ഡങ്ങള്‍ കവികള്‍ കാവ്യകേളിയുടെ നിയമമനുസരിച്ചു പോസ്റ്റു ചെയ്യുന്ന സദസ്സാണ് ഇത്. ഇതില്‍ പങ്കെടുക്കുന്ന ഏഴു കവികള്‍ ഈ ക്രമത്തിലാണ്, ഇരിക്കുന്നത്:

1.അരിയന്നൂര്‍ ഉണ്ണിക്കൃഷ്ണന്‍ , 2..രാമന്‍ നമ്പീശന്‍ കേശവത്ത്, 3. ശ്രീലകം വേണുഗോപാല്‍, 4.അനില്‍ക്കൃഷ്ണന്‍ അരിയന്നൂര്‍ ,  5. വാരിയത്ത് കുട്ടി, 6.പൊതാളൂര്‍ വിജയന്‍ 8. ഉണ്ണിക്കൃഷ്ണന്‍ ശ്രീലകം 9. തൃക്കഴിപ്പുറം രാമ‍ന്‍ 10. സന്തോഷ് വര്‍മ്മ

ഈ സദസ്സ് 01-01-2013 നു ആരംഭിച്ചു

 

792
ചെല്ലുന്നിടത്തെല്ലാം തല്ലിപ്പൊളിയ്ക്കുന്നി
തല്ലാഹുവിന്‍ തിരുനാമമോതി
പാരുഷ്യമീവിധം കാട്ടിയോ നിങ്ങളാ
കാരുണ്യവാനുള്ള സേവ ചെയ് വൂ
എങ്ങു ചെന്നാകിലുമീവിധമുള്ളൊരീ
നിങ്ങള്‍ തന്‍ ചെയ്തി തന്‍ ദുഷ്ഫലങ്ങള്‍
സാധുക്കളാകും സ്വധര്ംമത്തില്‍ പെട്ടവര്‍
ക്കാധി വരുത്തുമെന്നോര്‍ത്തു കൊള്‍ക‌
 
അരിയന്നൂര്‍ ഉണ്ണിക്കൃഷ്ണന്‍ 

793
എഴുരണ്ടുലോകങ്ങളഖിലവും കാരുണ്യ-
മഴയില്‍ മൂടീടുമനാദ്യശക്തി !
പിഴവില്ലാതക്ഷരം വടിവൊത്ത ലിപികളി-
ലെഴുതാനും തെളിവോടു  വായിപ്പാനും 
അഴകോലും നാദത്തില്‍ പാടാനും മഞ്ജിമാ -
വൊഴുകുന്ന നൃത്തങ്ങളാടുവാനും 
തൊഴുതീടുന്നൊമ്പതു രാത്രിയും തൃക്കണ്ണാല്‍ 
തഴുകീടൂ സര്‍വദേ! സര്‍വധാത്രി!
 
രാമന്‍ നമ്പീശന്‍ കേശവത്ത്

794
അച്ഛനോടമ്മയോടൊപ്പമാ ഭാര്യയോ-
ടാര്‍ത്തുനടക്കുന്ന മക്കളോടും
ഒത്തുചേര്‍ന്നുത്തരവാദിത്വമോര്‍പ്പിച്ചു
മര്‍ത്ത്യവികാരമായ് നീ ലസിപ്പൂ
എന്‍ പ്രിയവാക്കേ! നീയെങ്ങും പറന്നിടൂ
നിന്‍പ്രഭാവാമൃതം തൂകിടൂ നീ
മന്നിതില്‍ മര്‍ത്ത്യന്റെ മാനസംതന്നിലെ
മിന്നിടും പൊന്‍വിളക്കായ് വിളങ്ങൂ.
 
ശ്രീലകം വേണുഗോപാല്‍

795
എന്തിനായ് മൌനത്തിനുടയാടയില്‍ സീ
മന്തിനീ നീയന്നൊളിച്ചുവെച്ചൂ
സ്നേഹസൌന്ദരമൂറുന്നതാം നിന്‍ മൃദു
മോഹനാംഗങ്ങളാമാ പദങ്ങള്‍
കാലങ്ങളേത്ര ഞാന്‍ കാത്തു നിന്നു നിന്റെ
ചേലൊത്തൊരാ മൊഴിക്കൊഞ്ചലെന്റെ
കാതില്‍ കുളിര്‍തൂകി വീണലിയാന്‍, പ്രേമ‌
വാതില്‍ തുറന്നു നീ വന്നണയാന്‍!!
 
അനില്‍ക്കൃഷ്ണന്‍ അരിയന്നൂര്‍

796
കരയല്ലെയോമനേ, കരിനീലക്കണ്ണുകൾ
മിഴിനീരു വന്നു നിറഞ്ഞിടുമ്പോൾ
കരളിന്നകത്തേക്കു ചാട്ടുളി വീശിയെൻ
ജീവന്റെ സ്പന്ദന താളം മറിക്കുന്നു.
എണ്ണിച്ചുട്ടപ്പം കണക്കു കിട്ടുന്നൊരെൻ
വേതനം കൊണ്ടു കഴിയുന്ന ജീവിതം
ആശിപ്പതൊക്കെയും നേടുവാനാകാതെ
ഭഗ്ന പ്രതീക്ഷകൾ വീണടിയും ചിതാഭൂമി.
 
വാരിയത്ത് കുട്ടി

797
ഏതാശയുമുടന്‍ നേടുവാനായെങ്കില്‍ 
പാശമായ്ത്താനതു കൂടെക്കൂടും
നാശത്തിലേക്കുള്ള മാര്‍ഗം തെളിക്കുവാന്‍
വാശിയാണായതിന്‍ പ്രേരകത്വം
ആശിച്ചിടാതൊട്ടു നേട്ടമില്ലാകയാല്‍
വാശിയും യത്നവും വേണംതാനും
ആശയും വാശിയും നേര്‍ വഴിക്കാകുകില്‍
മോശമല്ലെന്നതും സത്യമത്രേ
 
ഉണ്ണിക്കൃഷ്ണന്‍ ശ്രീലകം

798
അന്തകാന്തകൻ തന്നുടെ തൃപ്പദം
ചിന്ത ചെയ്തു മരുവുന്ന കൂട്ടരെ
അന്ത്യകാല മടുക്കുന്ന വേളയി-
ലന്തകഭയം തീണ്ടുന്നതല്ലതാൻ
ഈഷലൊട്ടുമിയലാതെ നിത്യവു-
മീശനെബ്ഭജിച്ചീടുന്നതാകിലൊ
ക്ലേശമെല്ലാമൊടുങ്ങിടുമെന്നുള്ളോ-
രാശയോടെത്താൻപാർത്തിടാമേവർക്കും
 
തൃക്കഴിപ്പുറം രാമന്‍ 

799
ഇക്ഷിതിയിലനാദിയായ് മാനവ-
സംസ്കൃതിക്കു ബലം പകർന്നീടുവാൻ
പക്ഷഭേദമില്ലുണ്ടായിരിന്നിതു
സത്യ, ധർമ്മ, ദയാദികളൊക്കെയും
സാക്ഷരത പെരുത്തുള്ള നമ്മുടെ
രാക്ഷസീയത മേല്മേൽ വളർന്നിതാ
തക്ഷകൻ തോറ്റിടും വിഷമുള്ളവർ
ഘോരകൃത്യങ്ങൾ ചെയ്തു രമിക്കുന്നു
 
സന്തോഷ് വര്‍മ്മ‌

 

♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥♥


 

www.aksharaslokam.com

 

സൈറ്റില്‍ അംഗമാകാന്‍  ഇപ്പോള്‍ തന്നെ റജിസ്റ്റര്‍   ചെയ്യുക.(ഹോം പേജില്‍

റജിസ്റ്റെര്‍ ഇന്‍ ക്ലിക്കു ചെയ്തു കോളങ്ങള്‍ പൂരിപ്പിക്കുക)

 

സൈറ്റില്‍ ലഭ്യമായ പുസ്തകങ്ങള്‍ 

 

 
1.സഹസ്രദളം :


ഗ്രന്‍ഥകര്‍ത്താവ് : അരിയന്നൂര്‍ ഉണ്ണിക്കൃഷ്ണന്‍

അഷ്ടപ്രാസം ,യമകവിദ്യ, ഗോഹത്യയും ബ്രഹ്മഹത്യയും എന്ന മണി
പ്രവാള ഖണ്ഡകാവ്യം ,കറുത്ത ചേകവന്‍ എന്ന പച്ചമലയാളം കാവ്യം,
രസരാജന്‍, കുറിമാനം (എഴുത്തുകുത്തുകള്‍ , ആശംസകള്‍ , ചരമശ്ലോക
ങ്ങള്‍), അക്ഷരശ്ലോകമാഹാത്മ്യം (നൂറു പൂക്കള്‍, അംബോപദേശം) , തിരു
ശേഷിപ്പ് എന്നിങ്ങനെ എട്ടു അദ്ധ്യായങ്ങളിലായി ആയിരത്തിലധികം 
ശ്ലോകങ്ങള്‍ അടങ്ങുന്ന കൃതി. 2000ത്തില്‍ കൂനംമൂച്ചി അക്ഷരശ്ലോകവേദി 
പ്രസിദ്ധീകരിച്ചു.


2.അരിയന്നൂര്‍ :


അരിയന്നൂര്‍ ഗ്രാമത്തിന്റെ സാംസ്ക്കാരിക ചരിത്രം . ക്ഷേത്രത്തെക്കുറി
ച്ചുള്ള വിശദവിവരങ്ങള്‍ . ആധുനിക കാലഘട്ടത്തിലെ സം ഭവങ്ങളുടെ 
വിവരണം . കൂടാതെ നൂറോളം സരസശ്ലോകങ്ങള്‍ editor അരിയന്നൂര്‍ 
ഉണ്ണിക്കൃഷ്ണന്‍


3.അക്ഷരശ്ലോക ഡയറക്ടറി 2000:


ഗ്രന്‍ഥകര്‍ത്താവ് : അരിയന്നൂര്‍ ഉണ്ണിക്കൃഷ്ണന്‍

അക്ഷരശ്ലോകകലാരംഗത്തുള്ള സംഘടനകളുടെയും വ്യക്തികളുടെയും 
വിവരങ്ങള്‍ അടങ്ങുന്ന ഇത:പര്യന്തമുണ്ടായിട്ടുള്ള ഏക കൃതി.


4.ഉപനയനം :

ഗ്രന്‍ഥകര്‍ത്താവ്: ആദരേടത്ത് നീലകണ്ഠന്‍ ഭട്ടതിരിപ്പാട്
ആദരേടത്തിന്റെ ശ്ലോകങ്ങളുടെ സമാഹാരം .'മയൂരദൂത്' എന്ന സന്ദേശ
കാവ്യത്തിന്റെ പരിഭാഷ പൂര്‍ണ്ണ രൂപത്തില്‍ ഈ പുസ്തകത്തില്‍ഉണ്ട്.

5.കണ്ണോക്ക് :

ടി.എം . പോള്‍ മാസ്റ്റര്‍ സ്മരണിക. കേരളത്തിലെ പ്രഗത്ഭരായ അക്ഷര
ശ്ലോകപ്രവര്‍ത്തകരുടെ പ്രൌഢലേഖനങ്ങള്‍,പഴയ നൂറു കവികളുടേതാ
യി നൂറു ശ്ലോകങ്ങള്‍ ,കൊച്ചുണ്ണിത്തമ്പുരാന്റെ 'കാന്തവൃത്തം ' എന്ന 
പുസ്തകത്തിന്റെ പൂര്‍ ണ്ണരൂപം എന്നിവ ഉള്ളടക്കത്തില്‍ പെടുന്നു.

6.തിലാഞ്ജലി:

പണ്ഡിതവര്യനും ബഹുമുഖപ്രതിഭയുമായിരുന്ന കാര്യാട്ടുശങ്കുണ്ണിനായര്‍
കൂനമ്മൂച്ചി അക്ഷരശ്ലോകവേദി അദ്ധ്യക്ഷനായിരിക്കെ 1989ല്‍ അന്തരിച്ചു. 
അക്കാലത്തു പ്രസിദ്ധീകരിച്ച ഒരു സ്മരണികയാണു 'തിലാഞ്ജലി'. മാട
മ്പു കുഞ്ഞുകുട്ടന്റെ അനുസ്മരണലേഖനം, മണ്മറഞ്ഞു പോയ എന്‍.ഡി. 
കൃഷ്ണനുണ്ണി,കെ.എന്‍ഡി., ആദരേടം ,നെല്ലുവായ് കെ.എന്‍ നമ്പീശന്‍ തു
ടങ്ങി പലരുടെയും ശ്ലോകരചനകള്‍ എന്നിവ ഉള്ളടക്കത്തില്‍ പെടുന്നു.

7.ശിവൊള്ളിക്കൃതികള്‍ :

ശിവൊള്ളിയുടെ ലഘു ജീവചരിത്രക്കുറിപ്പു, ദാത്യൂഹസന്ദേശം കാവ്യം, 
തെരഞ്ഞെടുത്ത 60 ശ്ലോകങ്ങള്‍ എന്നിവയാണ് ഉള്‍ക്കൊള്ളിച്ചിട്ടുള്ളത്.

8.ശ്ലോകമേവ ജയതേ :

മണ്മറഞ്ഞ ശ്ലോകപ്രതിഭകളെ പരിചയപ്പെടുത്തുക എന്ന ഉദ്ദേശത്തോടെ 
ആരംഭിച്ചിട്ടുള്ള ഒരു പംക്തിയാണു ഇത്.

9.രാമകൃഷ്ണവിലോമകാവ്യം :

ഗ്രന്‍ഥകര്‍ത്താവ് : സൂര്യകവി
ജലജ എന്ന വാക്കു അനുലോമമായും പ്രോമമായും ഒരേ പോലെ വാ
യിക്കാവുന്ന പദമാണ്. മോരു തരുമോ എന്ന വാക്യം ഇപ്രകാരം തന്നെ. 
വിലോമപദം ,വിലോമവാക്യം എന്നിങ്ങനെ ഇവയെ വിളിക്കാം. വാക്യം
വലുതാകും തോറും ഇത്തരം ​ഘടന ക്ലിഷ്ടമാകുന്നു. ഇംഗ്ലീഷില്‍ ഒരു ആ
ശയം പ്രകടിപ്പിക്കുന്ന ഏറ്റവും വലിയ വിലോമവാക്യം a man, a plan, a 
canal, panama എന്നാണെന്നു ഗിന്നസ് ബുക്കില്‍ കൊടുത്തിട്ടുണ്ട്.
ഇവിടെ ഇതാ ഒരു സംസ്ക്കൃത കാവ്യം. എല്ലാ ശ്ലോകങ്ങളും വിലോമ
ങ്ങള്‍! മാത്രമല്ല, രണ്ടു ഇതിവൃത്തങ്ങള്‍ ഒരേസമയം പറഞ്ഞു പോകുക
യും ചെയ്യുന്നു. ശ്ലോകങ്ങളുടെ പൂര്‍വ്വാര്‍ദ്ധങ്ങള്‍ ശ്രീരാമകഥ പറഞ്ഞു 
പോകുമ്പോള്‍ ഉത്തരാര്‍ദ്ധങ്ങള്‍ ശ്രീകൃഷ്ണകഥ പറഞ്ഞു പോകുന്നു. കാ
വ്യകാരന്റെയും സംസ്ക്കൃത ഭാഷയുടെയും മഹത്വം! നമ്മുടെയെല്ലാം 
സുകൃതവും .
രാമകൃഷ്ണവിലോമകാവ്യത്തിനു മലയാളവ്യാഖ്യാനം തയ്യാറായിട്ടുള്ള
തു ഖണ്ഡശ: പ്രസിദ്ധീകരിക്കുന്നു. ആദ്യശ്ലോകത്തിന്റെ വ്യാഖ്യാനംകൊടു
ത്തിട്ടുണ്ട്.പണ്ഡിതോത്തമനായശ്രീ.മച്ചട്ട് ടി.നീലകണ്ഠന്‍ നമ്പീശനാണു 
വ്യാഖ്യാതാവ്.

10.ഗോശാല:

ഗ്രന്‍ഥകര്‍ത്താവ് : ഉണ്ണി എടക്കളത്തൂര്‍
ഉണ്ണി എടക്കളത്തൂര്‍ എന്ന തൂലികാനാമത്തില്‍ അറിയപ്പെടുന്ന കെ.പി.
നാരയണന്‍ നമ്പീശന്റെ ശ്ലോകരചനകള്‍ സമാഹരിച്ചതാണു കൃതി. 1994 
ലെ കവനകൌതുകം പുരസ്ക്കാരജേതാവാണു കവി. പുരസ്ക്കാരത്തിന
ര്‍ഹമായ കവിതയും ഇതില്‍ ഉള്‍പ്പെട്ടിട്ടുണ്ട്.

11.ഒറവങ്കര ശ്ലോകങ്ങള്‍:

ഒറവങ്കരയുടെ തെരഞ്ഞെടുത്ത കുറെ ശ്ലോകങ്ങള്‍

12.വൃത്തങ്ങളിലെ താളഘടന:

ഗ്രന്‍ഥകര്‍ത്താവ് : അത്തിപ്പറ്റ രവി. 
പരമ്പരാഗതരീതിയില്‍ നിന്നു വ്യത്യസ്തമായി, താളത്തെ അടിസ്ഥാനഘട
കമാക്കി വൃത്തങ്ങളെ വിശകലനം ചെയ്യാനുള്ള ഒരു ശ്രമം. സംസ്ക്കൃത
വൃത്തമായാലും ,ഭാഷാവൃത്തമായാലും , ചലച്ചിത്രഗാനമായാല്‍ പോലും 
അവയിലെല്ലാം പൊതുവായ ഒരു താളഘടനയെ കണ്ടെത്തുന്ന ഒരു .
സൈദ്ധാന്തികഗ്രന്‍ഥം

13. ശ്രീരാഘവയാദവീയം:

രാമകൃഷ്ണവിലോമകാവ്യം പോലെ തന്നെ മറ്റൊരു വിലോമകാവ്യം. 
വെങ്കിടാധ്വരി എന്ന കവിയാണ് ഇതിന്റെ രചയിതാവ്. രാമകഥ പറ
ഞ്ഞു പോകുന്ന ഓരോ ശ്ലോകത്തിനും കൃഷ്ണകഥ പറഞ്ഞു പോകുന്ന 
പ്രതിലോമശ്ലോകം എന്നാണു രചനയുടെ രീതി. ഓരോ ജോടി ശ്ലോകവും
വിലോമമാണെന്നര്‍ത്ഥം . പദച്ഛേദം കൂടെ കൊടുത്തിട്ടുണ്ട്.

14.നാരായണീയം ഭാഷാവൃത്തത്തില്‍ :

അരിയന്നൂര്‍ ഉണ്ണിക്കൃഷ്ണന്റെ പരിഭാഷ.

15.ഭര്‍ത്തൃഹരി എന്ന  ഫോറം:

ഭര്‍ത്തൃഹരിയുടെ ശതകത്രയം ഭാഷാവൃത്തത്തിലേക്കു പരിഭാഷപ്പെടു
ത്തുക എന്നതാണു ലക്ഷ്യം

16.അരിയന്നൂര്‍  E-Magazine :

ശ്ലോക വിവരങ്ങളടങ്ങുന്ന ഒരു മാസികപ്രസിദ്ധീകരണം.  എല്ലാ 10-ആം 
തിയ്യതിയും പ്രസിദ്ധീകരിക്കുന്നു.

17.ശയനപ്രദക്ഷിണം:

ശ്രീ.രാധാകൃഷ്ണന്‍ കാക്കശ്ശേരിയുടെ കവിതാസമാഹാരമാണു. സാഹിത്യ
ത്തിന്റെ വിവിധ ശാഖകളിലായി നിരവധി പുസ്തകങ്ങള്‍ രചിച്ചിട്ടുള്ള
ഗ്രന്‍ഥകര്‍ത്താവിന്റെ ഈ കൃതി ശ്ലോകങ്ങളും ഭാഷാവൃത്തത്തിലുള്ള
കവിതകളും ഉള്‍ക്കൊള്ളുന്നതാണ്.

18.കഥാത്രയീ ശ്ലേഷകാവ്യം: സമ്പൂര്‍ണ്ണമലയാളവ്യാഖ്യാനത്തോടുകൂടി.

രാമായണ-ഭാരത-ഭാഗവത കഥകള്‍ ഒരുമിച്ചു പറഞ്ഞു പോകുന്ന വിശി
ഷ്ടമായ ഒരു സംസ്ക്കൃതകാവ്യമാണ്. ഓരോ ശ്ലോകവും മൂന്നു രീതിയില്‍ 
അര്‍ത്ഥം ഉള്‍ക്കൊള്ളുന്നു. ചിദംബരകവിയുടെ ഈ കാവ്യത്തിനു മലയാ
ളവ്യാഖ്യാനം രചിച്ചിട്ടുള്ളതു മച്ചാട്ടു ടി. നീലകണ്ഠനാണ്.
വന്ദനശ്ലോകത്തിനു 10 അര്‍ത്ഥമാണു വ്യാഖ്യാതാവു കൊടുത്തിരിക്കുന്നത്.

19. അഷ്ടപ്രാസം :

സമ്പാദകന്‍ : അനില്‍ക്കൃഷ്ണന്‍ പി.യു.
ശാര്‍ദ്ദൂലവിക്രീഡിതം  വൃത്തത്തില്‍ ഓരോ ശ്ലോകത്തിലും എട്ടു സ്ഥല
ത്തു കൃത്യമായ താളത്തില്‍ ഒരേ പദം ആവര്‍ത്തിച്ചു വരുന്ന വിധം 
പദകുബേരന്മാര്‍ക്കു വിഹരിക്കാനുള്ള രചനാസങ്കേതമാണു അഷ്ടപ്രാസം. 
നാല്പതോളം കവികള്‍ ;നൂറ്റിഅമ്പതില്പരം ശ്ലോകങ്ങള്‍ ; ശ്ലോകസദസ്സു
കളിലൂടെയും കയ്യെഴുത്തു പുസ്തകങ്ങളിലൂടെയും മാത്രം തലമുറകള്‍ 
താണ്ടിയ നിരവധി രചനകള്‍. കുറെ പുതിയ രചനകളും.

20. പെട്ടരഴിയം കൃതികള്‍

പെട്ടരഴിയം വലിയ രാമനെളയതിന്റെ തെരഞ്ഞെടുത്ത കൃതികള്‍ ശ്ലേ
ഷം,പരല്‍ ഘടന,ശയ്യാഗുണം തുടങ്ങിയവയില്‍ അദ്വിതീയനായിരുന്നു 
ഗ്രന്‍ഥകര്‍ത്താവ്. വള്ളത്തോള്‍ പോലും പേട്ടരഴിയത്തിനെപ്പോലെ ശ്ലോകം
എഴുതാന്‍ കഴിയണമെന്നു കൊതിച്ചിട്ടുണ്ടത്രേ . സപ്തപ്രാസം ദീക്ഷിച്ചു 
രചിച്ചിട്ടുള്ള വഞ്ചിപ്പാട്ടു (നതോന്നത) രീതിയിലുള്ള ഒരു കവിത കൂടി .
ഇതില്‍ ചേര്‍ത്തിട്ടുണ്ട്

21.  കാതുകുത്ത്  

ഗ്രന്‍ഥകര്‍ത്താവ് : കുറുവല്ലൂര്‍ മാധവന്‍ 
കഴിഞ്ഞ രണ്ടു പതിറ്റാണ്ടു കാലമായി കൂനമ്മൂച്ചി അക്ഷരശ്ലോകവേദി
യുടെ അദ്ധ്യക്ഷനായി തുടരുന്ന  ശ്രീ കുറുവല്ലൂര്‍ മാധവന്റെ ശ്ലോകസ
മാഹാരം . കൂനമ്മൂച്ചി അക്ഷരശ്ലോകവേദി 1994 ല്‍ പ്രസിദ്ധീകരിച്ചതാണ് 
ഈ കൃതി.

22. പച്ചമലയാളം

സാധാരണപ്രയോഗത്തിലുള്ള മണിപ്രവാളമലയാളത്തിന്റെ നിഷേധമാണ് 
പച്ചമലയാളം.സംസ്ക്കൃതപദങ്ങള്‍ ഒഴിവാക്കിയുള്ള മലയാളമെന്നാണ് 
ഉദ്ദേശിക്കുന്നത്. മനസ്സ്, ദുഃഖം ,വിഷമം ....തുടങ്ങി സമ്സ്ക്കൃതത്തില്‍ നി
ന്നു സ്വീകരിക്കപ്പെട്ടിട്ടുള്ള പദങ്ങളെല്ലാം നിഷിദ്ധം . ഇങ്ങനെയുള്ള 
കാവ്യങ്ങളുടെ ഒരു ശേഖരം .

23. അക്ഷരശ്ലോക സദസ്സ്  ഫോറം

അംഗങ്ങള്‍ക്കു  ശ്ലോകങ്ങള്‍ പൊസ്റ്റു ചെയ്തു സദസ്സില്‍ പങ്കെടുക്കാം .

24.  സ്തവപുഷ്പമാലിക

ഗ്രന്‍ഥകര്‍ത്താവ് : പണ്ഡിതഭൂഷണം പി.കെ.രാമന്‍ നമ്പ്യാര്‍ 
ശിഖരിണി വൃത്തത്തില്‍ 50 സംസ്ക്കൃതശ്ലോകങ്ങള്‍ വ്യാഖ്യാനത്തോടു 
കൂടി . തട്ടകത്തമ്മയായ പനങ്ങാട്ടുകര ഭഗവതിയെ സ്തുതിച്ചുള്ളതാണ് 
ഇതിവൃത്തം .കൊല്ലവര്‍ഷം 1106 ല്‍ പ്രസിദ്ധീകൃതമായത്.

25. .ശ്രീവിജയോദയം മഹാകാവ്യം

ഗ്രന്‍ഥകര്‍ത്താ : മഹാകവി പന്തളം കേരളവര്‍മ്മ
മഹാകവിയുടെ രണ്ടു മഹാകാവ്യങ്ങളില്‍ കൂടുതല്‍ പ്രശസ്തമായതു 
രുഗ്മാംഗദചരിതം ആണ്. എന്നാല്‍ വിജയോദയം കാവ്യവും കാവ്യമേന്മ 
കൊണ്ടും പന്തളത്തിന്റെ സ്വതസ്സിദ്ധമായ ശബ്ദാലങ്കാരവൈദഗ്ദ്ധ്യം  
കൊണ്ടും അതീവ മനോഹരമാണ്.
 
26. കളിയോഗത്തില്‍ 

ഗ്രന്‍ഥകര്‍ത്താവ് : ഉണ്ണി എടക്കളത്തൂര്‍ 
 
ഗ്രന്‍ഥകര്‍ത്താവിന്റെ ആദ്യത്തെ കാവ്യ സമാഹാരമാണ്‍ 1990 ല്‍ പ്രസി
ദ്ധീകരിക്കപ്പെട്ട ഈ പുസ്തകം ..

27. ഉഷയുടെ ശയനഗൃഹം

ഗ്രന്‍ഥകര്‍ത്താവ് : മഹാകവി കുട്ടമത്ത്
 
മഹാകവിയുടെ മുഖമുദ്രയായ രചനയിലെ  ശബ്ദസൌന്ദര്യവും ശാലീന
തയും നിറഞ്ഞു നില്‍ ക്കുന്ന ഒരു കൃതി.
 
28.  ആന്തര സാമ്രാജ്യങ്ങള്‍

 
കവിതാസമാഹാരം 
ഗ്രന്‍ഥകര്‍ത്താവ് : രാധാകൃഷ്ണന്‍ കാക്കശ്ശേരി 
 
29.  കേരളം


ഗ്രന്‍ഥകര്‍ത്താവ് : മഹാകവി കൊടുങ്ങല്ലൂര്‍ കുഞ്ഞിക്കുട്ടന്‍ തമ്പുരാന്‍ 
കേരളത്തിന്റെ ചരിത്രവും ഐതിഹ്യങ്ങളും ക്രോഡീകരിക്കപ്പെട്ടിട്ടുള്ള
കാവ്യം . ഈ വിഭാഗത്തിലെ ഏറ്റവും പ്രശസ്തവും സമഗ്രവും , അതേ
സമയം മനോഹരവുമായ മലയാളകാവ്യം .  
 
30. പുലരി 
 
കവിതാ സമാഹാരം 
ഗ്രന്‍ഥകര്‍ത്താവ്: : ടി വി ജോസ്മാസ്റ്റര്‍ 
 
കൂനംമുച്ചി അക്ഷരശ്ലോക വേദിയുടെ സെക്രട്ടറി ആയിരിക്കേ 1997ല്‍ അ
ന്തരിച്ച ടി വി ജോസ് മാസ്റ്റരുടെ കാവ്യ രചനകള്‍ സമാഹരിച്ച കൃതി.






♥